నెహెమ్యా

9 ఆ నెల 24వ రోజున ఇశ్రాయేలీయులు సమావేశమయ్యారు; వాళ్లు గోనెపట్ట కట్టుకొని, తలమీద బూడిద పోసుకొని ఉపవాసం ఉన్నారు.+ 2 అప్పుడు ఇశ్రాయేలు వంశాలవాళ్లు వేరే దేశాల వాళ్లందరి నుండి తమను తాము ప్రత్యేకపర్చుకున్నారు,+ వాళ్లు నిలబడి తమ పాపాలు, తమ తండ్రుల పాపాలు ఒప్పుకున్నారు.+ 3 తర్వాత తాము ఉన్న చోట నిలబడి దాదాపు మూడు గంటలపాటు తమ దేవుడైన యెహోవా ధర్మశాస్త్ర గ్రంథాన్ని బిగ్గరగా చదివారు;+ మరో మూడు గంటలపాటు పాపాలు ఒప్పుకుంటూ తమ దేవుడైన యెహోవాకు సాష్టాంగపడుతూ ఉన్నారు.

4 యేషూవ, బానీ, కద్మీయేలు, షెబన్యా, బున్నీ, షేరేబ్యా,+ బానీ, కెనానీ లేవీయుల పీఠం మీద నిలబడి+ తమ దేవుడైన యెహోవాకు గట్టిగా మొరపెట్టారు. 5 లేవీయులైన యేషూవ, కద్మీయేలు, బానీ, హషబ్నెయా, షేరేబ్యా, హోదీయా, షెబన్యా, పెతహయా ఇలా అన్నారు: “నిలబడి, మీ దేవుడైన యెహోవాను శాశ్వతకాలం* స్తుతించండి.+ దేవా, సమస్తమైన దీవెనకు, స్తుతికి మించిన నీ మహిమగల పేరును వాళ్లు స్తుతించాలి.

6 “నువ్వు మాత్రమే యెహోవావు;+ నువ్వు ఆకాశ మహాకాశాల్ని, వాటి సైన్యమంతటినీ సృష్టించావు; భూమినీ దానిమీద ఉన్న సమస్తాన్నీ, సముద్రాలనూ వాటిలో ఉన్న సమస్తాన్నీ సృష్టించావు. నువ్వే వాటన్నిటినీ సజీవంగా ఉంచుతున్నావు, ఆకాశ సైన్యం నీకు వంగి నమస్కారం చేస్తోంది. 7 అబ్రామును ఎంచుకొని,+ అతన్ని కల్దీయుల ప్రాంతమైన ఊరు నుండి తీసుకొచ్చి+ అతనికి అబ్రాహాము అని పేరు పెట్టిన+ సత్యదేవుడైన యెహోవావు నువ్వే. 8 అతని హృదయం నీకు నమ్మకంగా ఉందని నువ్వు చూశావు.+ అందుకే నువ్వు కనానీయుల, హిత్తీయుల, అమోరీయుల, పెరిజ్జీయుల, యెబూసీయుల, గిర్గాషీయుల దేశాన్ని అతనికీ, అతని సంతానానికీ* ఇస్తానని అతనితో ఒప్పందం చేశావు;+ నువ్వు నీతిమంతుడివి కాబట్టి నీ వాగ్దానాల్ని నిలబెట్టుకున్నావు.

9 “ఐగుప్తులో* మా పూర్వీకుల బాధల్ని నువ్వు చూశావు,+ ఎర్రసముద్రం దగ్గర వాళ్ల మొర విన్నావు. 10 ఫరో, అతని సేవకులంతా, అతని దేశంలోని ప్రజలంతా నీ ప్రజల పట్ల గర్వంగా ప్రవర్తించారని+ నీకు తెలుసు. అందుకే నువ్వు వాళ్లకు వ్యతిరేకంగా సూచనలు, అద్భుతాలు చేశావు;+ ఈ రోజు వరకు నిలిచివుండే గొప్ప పేరు తెచ్చుకున్నావు.+ 11 వాళ్లు సముద్రం గుండా పొడి నేల మీద దాటి వెళ్లేలా వాళ్ల ముందు సముద్రాన్ని విడగొట్టావు.+ అల్లకల్లోలంగా ఉన్న నీళ్లలోకి రాయిని విసిరేసినట్టు వాళ్లను తరిమేవాళ్లను అగాధ జలాల్లోకి విసిరేశావు.+ 12 పగలు మేఘస్తంభంతో, రాత్రుళ్లు వాళ్లు వెళ్లాల్సిన దారిలో వెలుగు ఇవ్వడానికి అగ్నిస్తంభంతో వాళ్లను నడిపించావు.+ 13 నువ్వు సీనాయి పర్వతం మీదికి దిగి వచ్చి,+ పరలోకం నుండి వాళ్లతో మాట్లాడావు.+ వాళ్లకు సరైన న్యాయనిర్ణయాల్ని, సత్యమైన* నియమాల్ని, మంచి విధుల్ని, ఆజ్ఞల్ని ఇచ్చావు.+ 14 పవిత్రమైన నీ విశ్రాంతి రోజు*+ గురించి నువ్వు వాళ్లకు తెలియజేశావు. నీ సేవకుడైన మోషే ద్వారా ఆజ్ఞల్ని, నియమాల్ని, ధర్మశాస్త్రాన్ని వాళ్లకు ఇచ్చావు. 15 వాళ్లు ఆకలితో ఉన్నప్పుడు నువ్వు ఆకాశం నుండి వాళ్లకు ఆహారం ఇచ్చావు,+ వాళ్లకు దాహమేసినప్పుడు బండ నుండి నీళ్లు రప్పించావు;+ నువ్వు వాళ్లకు ఇస్తానని వాగ్దానం చేసిన దేశంలోకి ప్రవేశించమని, దాన్ని స్వాధీనం చేసుకోమని వాళ్లకు చెప్పావు.

16 “కానీ వాళ్లు, అంటే మా పూర్వీకులు అహంకారంగా ప్రవర్తించారు,+ మొండిగా తయారయ్యారు,+ వాళ్లు నీ ఆజ్ఞలకు లోబడేవాళ్లు కాదు. 17 వాళ్లు వినడానికి ఇష్టపడలేదు,+ వాళ్ల మధ్య నువ్వు చేసిన అసాధారణ కార్యాల్ని వాళ్లు గుర్తుంచుకోలేదు; వాళ్లు మొండిగా తయారై, ఐగుప్తు బానిసత్వంలోకి తిరిగెళ్లడానికి తమ మీద ఒక నాయకుణ్ణి నియమించుకున్నారు.+ కానీ నువ్వు క్షమించడానికి సిద్ధంగా ఉండే దేవుడివి, కనికరం,* కరుణ, ఓర్పు గలవాడివి,* ఎంతో విశ్వసనీయ ప్రేమను* చూపించేవాడివి;+ అందుకే నువ్వు వాళ్లను విడిచిపెట్టలేదు.+ 18 వాళ్లు తమకోసం పోతపోసిన ఒక దూడ విగ్రహాన్ని చేసుకుని, ‘ఐగుప్తు నుండి మనల్ని బయటికి తీసుకొచ్చిన మన దేవుడు ఇదే’ అని అన్నారు,+ వాళ్లు తమ పనులతో నిన్ను ఘోరంగా అవమానించారు. 19 అప్పుడు కూడా నువ్వు గొప్ప కరుణ చూపించావు, వాళ్లను ఎడారిలో* విడిచిపెట్టలేదు.+ పగలు వాళ్లను నడిపించిన మేఘస్తంభం గానీ, రాత్రుళ్లు వాళ్లు వెళ్లాల్సిన దారిలో వెలుగిచ్చిన అగ్నిస్తంభం గానీ వాళ్ల మీద నుండి వెళ్లిపోలేదు.+ 20 వాళ్లు లోతైన అవగాహనతో నడుచుకునేలా నువ్వు వాళ్లకు నీ పవిత్రశక్తిని* ఇచ్చావు,+ వాళ్లకు మన్నా ఇవ్వడం ఆపలేదు.+ వాళ్లు దాహంతో ఉన్నప్పుడు నీళ్లు ఇచ్చావు.+ 21 40 సంవత్సరాలు ఎడారిలో వాళ్లకు ఆహారం పెట్టావు.+ వాళ్లకు ఏదీ తక్కువ కాలేదు. వాళ్ల బట్టలు పాతబడి చిరిగిపోలేదు,+ వాళ్ల కాళ్లకు వాపు రాలేదు.

22 “రాజ్యాల్ని, జనాల్ని వాళ్లకు అప్పగించి, దేశాన్ని కొంచెంకొంచెంగా వాళ్లకు పంచి ఇచ్చావు.+ అప్పుడు వాళ్లు హెష్బోను రాజైన సీహోను ప్రాంతాన్ని, బాషాను రాజైన ఓగు ప్రాంతాన్ని స్వాధీనం చేసుకున్నారు. 23 వాళ్ల పిల్లలు ఆకాశ నక్షత్రాలంతమంది అయ్యేలా చేశావు.+ తర్వాత నువ్వు, ఈ దేశంలోకి ప్రవేశించి దీన్ని స్వాధీనం చేసుకోమని వాళ్ల పూర్వీకులకు వాగ్దానం చేసిన దేశంలోకి వాళ్లను తీసుకొచ్చావు.+ 24 కాబట్టి వాళ్ల పిల్లలు ఆ దేశంలోకి ప్రవేశించి, దాన్ని స్వాధీనం చేసుకున్నారు.+ నువ్వు ఆ దేశంలో నివసిస్తున్న కనానీయుల్ని వాళ్ల ముందు ఓడించి, వాళ్లకు నచ్చినట్టు చేసుకోవడానికి ఆ దేశ రాజుల్ని, జనాల్ని వాళ్ల చేతికి అప్పగించావు. 25 వాళ్లు ప్రాకారాలుగల నగరాల్ని,+ సారవంతమైన* దేశాన్ని+ స్వాధీనం చేసుకున్నారు. వాళ్లు అన్నిరకాల మంచి వస్తువులు ఉన్న ఇళ్లను, అప్పటికే తవ్వి ఉన్న బావుల్ని, ద్రాక్షతోటల్ని, ఒలీవ తోటల్ని, విస్తారంగా ఉన్న పండ్ల చెట్లను స్వాధీనం చేసుకున్నారు. కాబట్టి వాళ్లు తిని, తృప్తిపడి, పుష్టినొంది, నీ గొప్ప మంచితనాన్ని బట్టి ఎంతో సంతోషించారు.

26 “అయితే తర్వాత వాళ్లు అవిధేయులై, నీ మీద తిరుగుబాటు చేశారు,+ నీ ధర్మశాస్త్రాన్ని తిరస్కరించారు. వాళ్లను నీ దగ్గరికి తిరిగి తీసుకురావడానికి హెచ్చరించిన నీ ప్రవక్తల్ని చంపారు, వాళ్లు నిన్ను ఘోరంగా అవమానించారు.+ 27 అందుకే నువ్వు వాళ్లను వాళ్ల శత్రువుల చేతికి అప్పగించావు.+ ఆ శత్రువులు వాళ్లను బాధపెడుతూ వచ్చారు.+ కానీ కష్టాల్లో వాళ్లు నీకు మొరపెట్టినప్పుడల్లా నువ్వు పరలోకం నుండి వినేవాడివి; నీ గొప్ప కరుణ వల్ల, వాళ్ల శత్రువుల చేతిలో నుండి వాళ్లను రక్షించడానికి రక్షకుల్ని ఇచ్చేవాడివి.+

28 “కానీ వాళ్లు ఉపశమనం పొందగానే మళ్లీ నీ దృష్టిలో చెడ్డగా ప్రవర్తించేవాళ్లు,+ నువ్వు వాళ్లను వాళ్ల శత్రువుల చేతికి అప్పగించేవాడివి. ఆ శత్రువులు వాళ్ల మీద అధికారం చెలాయించేవాళ్లు.*+ తర్వాత వాళ్లు మళ్లీ తిరిగొచ్చి నీ సహాయం అర్థించేవాళ్లు;+ నువ్వు పరలోకం నుండి విని, నీ గొప్ప కరుణను బట్టి పదేపదే వాళ్లను కాపాడుతూ వచ్చావు.+ 29 వాళ్లు నీ దగ్గరికి తిరిగొచ్చి నీ ధర్మశాస్త్రాన్ని పాటించాలని నువ్వు వాళ్లను హెచ్చరించినా, వాళ్లు గర్వంగా ప్రవర్తించి నీ ఆజ్ఞల్ని వినడానికి ఇష్టపడలేదు;+ వాళ్లు నీ విధులకు వ్యతిరేకంగా పాపం చేశారు, నిజానికి వాటిని పాటించేవాళ్లకు అవి జీవాన్ని ఇస్తాయి.+ కానీ వాళ్లు మొండిగా తిరస్కరించారు, తలబిరుసుగా తయారయ్యారు. వాళ్లు వినడానికి ఇష్టపడలేదు. 30 ఎన్నో సంవత్సరాల పాటు నువ్వు వాళ్ల విషయంలో ఓర్పు చూపించావు.+ నీ పవిత్రశక్తి ద్వారా నీ ప్రవక్తల చేత వాళ్లను హెచ్చరిస్తూ వచ్చావు కానీ వాళ్లు వినడానికి ఇష్టపడలేదు. చివరికి నువ్వు వాళ్లను చుట్టుపక్కల దేశాలవాళ్లకు అప్పగించావు.+ 31 నీ గొప్ప కరుణ వల్ల నువ్వు వాళ్లను పూర్తిగా నాశనం చేయలేదు,+ విడిచిపెట్టలేదు. ఎందుకంటే నువ్వు కనికరం,* కరుణ గల దేవుడివి.+

32 “అయితే ఇప్పుడు, మా దేవా, గొప్ప దేవా, బలమైన దేవా, సంభ్రమాశ్చర్యాలు పుట్టించే దేవా, నీ ఒప్పందాన్ని నిలబెట్టుకొని విశ్వసనీయ ప్రేమ చూపించిన దేవా,+ అష్షూరు రాజుల+ కాలం నుండి ఈ రోజు వరకు మా మీదికి, మా రాజుల మీదికి, మా అధిపతుల మీదికి, మా యాజకుల+ మీదికి, మా ప్రవక్తల+ మీదికి, మా పూర్వీకుల మీదికి, నీ ప్రజలందరి మీదికి వచ్చిన కష్టాలన్నిటినీ మర్చిపోకు. 33 ఇవన్నీ మా మీదికి వచ్చినా సరే నువ్వు మాత్రం నీతిమంతుడివే; ఎందుకంటే నువ్వు నమ్మకంగా ప్రవర్తించావు, మేమే చెడ్డగా ప్రవర్తించాం.+ 34 మా రాజులు, అధిపతులు, యాజకులు, పూర్వీకులు నీ ధర్మశాస్త్రాన్ని పాటించలేదు; నీ ఆజ్ఞల్ని గానీ, నువ్వు హెచ్చరించడానికి ఇచ్చిన జ్ఞాపికల్ని* గానీ వాళ్లు పట్టించుకోలేదు. 35 వాళ్లు తమ రాజ్యంలో ఉండి, నువ్వు వాళ్లకు దయచేసిన విస్తారమైన మంచితనాన్ని ఆనందిస్తూ, నువ్వు వాళ్లకు ఇచ్చిన విశాలమైన, సారవంతమైన* దేశంలో నివసించినప్పుడు కూడా వాళ్లు నిన్ను సేవించలేదు,+ తమ చెడు ప్రవర్తన నుండి పక్కకు మళ్లలేదు. 36 అందుకే ఇప్పుడు మేము దాసులుగా ఉన్నాం;+ ఆ దేశ ఫలాల్ని, దాని మంచి పదార్థాల్ని తినమని నువ్వు మా పూర్వీకులకు ఇచ్చిన దేశంలో మేము దాసులుగా ఉన్నాం. 37 మా పాపాల వల్ల, ఈ దేశంలోని విస్తారమైన పంట నువ్వు మా మీద ఉంచిన రాజులకే వెళ్తోంది.+ వాళ్లు మా మీద, మా పశువుల మీద ఇష్టమొచ్చినట్టు ఏలుతున్నారు. మేము పెద్ద కష్టంలో ఉన్నాం.

38 “అందుకే దీనంతటినీ దృష్టిలో పెట్టుకొని, మేము రాతపూర్వకంగా ఒక స్థిరమైన ఒప్పందం చేస్తున్నాం;+ మా అధిపతులు, లేవీయులు, యాజకులు దానిమీద ముద్ర వేసి ధృవీకరించారు.”+