July

Muzintu nzyaakali kwaambuula anzyaakali kuchita Jesu kuswaanizya azigambyo nzyaakachita zyakali kutondeezya mbayeeya ambalimvwa Wisi. (Joh. 14:9) Tuyiiyaanzi kuzwa kuzigambyo zyakali kuchitwa aaJesu? Jesu aWisi batuyanda loko. Chiindi naakali aanyika, Jesu wakatondeezya luyando kwiinda mukuchita zigambyo zyakali kumaninsya mapenzi aabantu. Aali chimwi chiindi, boofu babili bakoompolola kabayanda kugwasigwa. (Mt. 20:​30-34) Jesu ‘wakabeetelela’ mpawo wakabaponia. Bbala lyachiGrikki lyakasandululwa kuti ‘wakabeetelela’ lilakonzya kwaamba kufweluka mwida. Kufweluka mwida ooku kutondeezya kuti Jesu wakali aandaba abantu akuti wakali kubayanda. Alubo nkuko kwakapa kuti asanine bantu biingi akuponia bantu bakali kuchiswa chipele (Mt. 15:32; Mk. 1:41) Eezi zitupa choonzyo chakuti Jehova, Leza ‘siluzyalo’ aMwanaakwe batuyanda loko. Alubo zilabachisa chiindi nibatubona katuli kuswaana mapenzi. (Lk. 1:78; 1 Pet. 5:7) Bali aachiyandisyo chakugwisya mapenzi aalikutukataazya. w23.04 3 ¶4-5

Tweelede kubweza ntaamu kuti tutantamuke masena aapa kuti tube aamizeezo iitali kabotu azintu zibi zichitwa aabantu bachita zibi. Tweelede kusanina mizeezo yesu azintu zilikabotu kwiinda mukubala Bbayibbili. Kunjila miswaangano akutola lubazu mukukambawuka kutugwasya kuti tukkale katuli aamizeezo iisalala. Alubo Jehova utusyomezya kuti takatulekeli pe kuti tusunkwe zyiinda manguzu eesu. (1 Kor. 10:​12, 13) Toonse tweelede kukkala katukombela kuti tukkale katusyomeka kuli Jehova muchiindi eechino chikataazya chakumamanino. Jehova uyanda kuti ‘tumwaambile zyoonse zili mumyoyo’ yesu. (Int. 62:8) Lumbayizya Jehova alubo umulumbe akaambo kazintu nzyakuchitila. Mukumbile kuti akugwasye kuti ube aachibindi mumulimu wakukambawuka. Mukombelezye kuti akugwasye kuti ulisimye chiindi nwaaswaana aapenzi alubo uzunde chiindi nwaaswaanana aalimwi sunko. Utazumizyi chimwi chintu naakuti muntu kuti akukachizye kuti ukombe kuli Jehova. w23.05 7 ¶17-18

Nkamboonzi nitunjila miswaangano yambungano? Kaambo kakusaanguna nkakuti tuyanda kutembawula Jehova. (Int. 26:12; 111:1) Alubo tunjila miswaangano kuchitila kuti tusungwaazyanie muziindi eezino ziyumu. (1 Tes. 5:11) Chiindi nitutambika kuti tusandule, ngatuli kutondeezya kuti tuyanda kutembawula Jehova akusungwaazyania. Pesi chiindi nitusandula, kuli zintu zikonzya kuchitika. Tulakonzya kuyoowa kusandula naakuti tulakonzya kuba aachiyandisyo chakusandula kwaziindi zyiingi pesi katutali kwaambwa pe kuti tusandule. Niinzi zikonzya kutugwasya muzyiimo eezi? Mwaapostoli Pawulu wakaamba kuti makanze eesu ngakuti “tusungwaazyanie.” Kuti twabona kuti bamwi balasungwaazigwa ansandulo zyesu zifwiifwi, tulaba aachiyandisyo chakusandula kwaziindi zyiingi. Pesi kuti teetwaambwa kuti tusandule nikuba kuti twatambika kwaziindi zyiingi, tulakonzya kubotelwa kuti bamwi ngabajana myeenya yakuti basandule.—1 Pet. 3:8. w23.04 20 ¶1-3

Mwaami wakaambilizya kuti maJuda bakali mubuzike kuBbabbiloni kwaminyaka iisika ku70 bakali baangunuka kuti babweede kulimbabo ku-Israyeli. (Ezr. 1:​2-4) Jehova nguwe wakapa kuti zichitike eezi. Nkaambo Bbabbiloni izibikene aakutaangununa bazike bayo. (Is. 14:​4, 17) Pesi Bbabbiloni yakali yanyonyoonwa alubo mweendelezi mupya wakabuzya maJuda kuti babweede kulimbabo. MaJuda boonse, ikapati mitwe yampuli bakeelede kusala kuzwa naakuti bakkale muBbabbiloni. Teekwakali kuuba pe kusala zyakuchita aachiindi eechi. Kuchembaala kwakakachizya maJuda biingi kuti basale kubweeda kulimbabo. Akaambo kakuti maJuda biingi bakali bazyalilwa muBbabbiloni akuti nguumuunzi ngubakazi kupela, bamwi bakali kulibuzya kuti Israyeli ninyika yamasyaanyinakulu. Kulakonzeka kuti bamwi maJuda bakali banota muBbabbiloni, nkinkaako amwi kwakali kubayumina kuti basiye myuunzi yabo naakuti mabbizinesi aabo kuti balongele kunyika njibakatazi pe. w23.05 14 ¶1-2

Jwi lyaLeza litusungwaazya kuti tulisimye, tube aaluzyalo aluyando. Lugwalo lwa Lukka 21:19 lwaamba kuti: “Kwiinda mukulisimya kwanu, muzoofutula buumi bwanu.” Lugwalo lwa Bakkolose 3:12 lwaamba kuti: “Amulizwaatike luzyalo.” Alubo 1 Batesalonikka 4:​9, 10 yaamba kuti: “Muyiisigwa aaLeza kuti muyandane . . . Pesi bakombima, tumusungwaazya kuti mwiinkilile kunembo kuchita oobo munzila iizwide.” Magwalo woonse aaya akalembelwa basikwiiya bakali kulisimya kale, bakali aaluzyalo aluyando. Nikuba oobo, bakeelede kwiinkilila kunembo kwiiya atala abuntu oobu. Andiswe tweelede kubutondeezya buntu oobu. Kuti uukonzye kubutondeezya, langa-langa maKkristu bakusaanguna mbubakatondeezya buntu oobu bumwi abumwi. Mpawo uyoobona mbukonzya kutobelezya chikozyano chabasikwiiya aabo akutondeezya kuti ulilibambilide kuti mapenzi mapati asika. Chiindi mapenzi mapati naazoosaanguna, unoozizi zintu nzukonzya kuchita kuti ulisimye alubo uyookanza kuti ukkale kulisimya. w23.07 3 ¶4, 8

Nikuba kuti tuli maKkristu aananikidwe naakuti tuli ‘bazimwi mbelele’ tweelede kweendela ‘Munzila ya Busalali’ nkaambo nzila eeyi itugwasya kuti tukkale katukomba Jehova akuti tuzoojane zilongezyo zizooyetwa aaBwaami bwaLeza. (Joh. 10:16) Kuzwa mu1919, mamiliyoni aabantu baswaanizya baalumi, banakazi abana bakazwa muBbabbiloni Mupati, mbunga yabukombi bwakubeja boonse alubo bakasaanguna kweendela mumugwagwa ooyu wakukozyanisya. Jehova wakagwisya zintu zyoonse zyakali mumugwagwa wakukozyanisya zyakali kukonzya kuba zilebyo kuma-Israyeli. (Is. 57:14) Ani mazubaano kuli zyakachitwa na ‘Munzila ya Busalali’? Kwaminyaka myiingi musule aamunyaka wa1919, Jehova wakabelesya bamwi baalumi bakali kumuyoowa kuti bagwasye bantu kuti kubawubile kuzwa muBbabbiloni Mupati. (Kozyanisya a-Isaya 40:3.) Bakachita zintu zyiingi loko kuti basalazye nzila eeyi yakukozyanisya kuchitila kuti bali aamyoyo iibombede bazwe muBbabbiloni Mupati akuti banjile muparadayizi yamubukombi, chaamba bukombi bwaJehova busalala bwakabusilizigwa. w23.05 15-16 ¶8-9

Jehova uyanda kuti tumubelekele katubotelwa alubo katuliyandila. (2 Kor. 9:7) Zilachita na kuti tubelekele kuzuzikizya chimwi chipeekezyo chamubukombi chiindi nitutakwe chiyandisyo pe? Atubone chikozyano chamwaapostoli Pawulu. Wakaamba kuti: “Ndilawuwuma mubili wangu akuupa kuti ube muzike.” (1 Kor. 9:​25-27, makani aamunsi.) Nikuba kuti chimwi chiindi Pawulu wakali kulimvwa katayandi kuchita zintu zilikabotu pesi wakali kulyaangila biya kuti achite zintu zilikabotu. Jehova wakabotelwa na azintu nzyaakali kuchita Pawulu? Iiyi. Jehova wakamulongezya akaambo kakubeleka changuzu nkwaakali kuchita. (2 Tim. 4:​7, 8) Munzila iikozyenie, Jehova ulabotelwa natubona katubelekela kuzuzikizya chipeekezyo nikuba katutakwe chiyandisyo chakuchita oobo. Chipa kuti Jehova abotelwe nchakuti ngatwachita chintu eecho akaambo kakuti tulamuyanda. Mbukunga Jehova wakamulongezya Pawulu, andiswe ulatulongezya akaambo kakubeleka changuzu. (Int. 126:5) Kubona Jehova mbatugwasya kupa kuti tusaangune kuba aachiyandisyo. w23.05 29 ¶9-10

Mwaapostoli Pawulu wakakozyanisya aabo batazoonyonyoonwe mubuzuba bwaJehova abantu balikoona. Tabazizi pe zintu zilikuchitika munyika akuti chiindi chilikuchijaana. Nkinkaako, tabakonzyi pe kubweza ntaamu akaambo kakuti tabazizi pe zintu ziyandikana zilikuchitika. Bantu biingi mazubaano balikoona mubukombi. (Rom. 11:8) Tabasyomi pe kuti tulikupona kumazuba aakumamanino akuti mapenzi mapati abaafwiifwi. (2 Pet. 3:​3, 4) Pesi majwi ngaakalemba mwaapostoli Pawulu aali atala akukkala katulangide twaabona kaayandikana loko buzuba-abuzuba. (1 Tes. 5:6) Nkamboonzi nitweelede kukkala katubeteme? Kutugwasya kuti tutaliswaanizyi pe muzintu zyapolitikisi azimwi zintu zisumpulwa aabantu munyika. Bakombi baJehova banoosungilizigwa kuti batole lubazu muzintu eezi chiindi buzuba bwaJehova nibunooya buswena aafwiifwi, pesi tatweelede kukataazikana loko kuti tunoozichita biyeni. Muuya uusalala ulatugwasya kuti tukkale katubeteme, katuyeeya kabotu akuti tusale munzila ilikabotu.—Lk. 12:​11, 12. w23.06 10 ¶6-7

Uyeeyaanzi kuti wamvwa zina lyakuti Samisoni? Kweelede kuti uyeeya atala amwaalumi wakali aamanguzu miingi. Kuti kakuli boobo, wayasa nondo muliso. Pesi Samisoni wakasala munzila iitali kabotu. Eezi zyakapa kuti aswaane mapenzi. Nikuba oobo, Jehova wakalangisisya kusyomeka kwaSamisoni alubo wakapa kuti lwaano lwaSamisoni lulembwe muBbayibbili kuchitila kuti tugwasigwe. Jehova wakabelesya Samisoni kuti achite zintu zigambya kuti agwasye ma-Israyeli. Nikwakayinda minyaka myiingi Samisoni kali wafwa, Jehova wakazulwida mwaapostoli Pawulu kuti abikkilizye Samisoni chiindi naakali kulemba milongo yabantu bakali aalusyomo lusimide. (Heb. 11:​32-34) Chikozyano chaSamisoni chilatusungwaazya. Wakasyoma Jehova nikuba naakali muziindi ziyumu. Tulakonzya kusungwaazigwa aachikozyano chakwe azyiiyo nzitujana. w23.09 2 ¶1-2

Chimwi chikonzya kutugwasya kuti tulisimye nkukomba kuli Jehova katulikumubuzya atala azintu zyoonse zilikutukataazya. (1 Tes. 5:17) Lino kulakonzeka kuti tukwe penzi pati pe likukataazya. Kuti kakuli oobo, nga wayanduula kuzulwidwa aaJehova na chiindi nukataazikene? Kuti wakkala kukumbila Leza kuti akugwasye kumapenzi nguswaana buzuba abuzuba lino, tukaleki pe kuyanduula lugwasyo chiindi nwaazooswaana penzi pati muchiindi chilikunembo. Uyooba aachoonzyo chakuti Jehova ulichizi chiindi ambayookugwasya nwaakuswaana mapenzi mapati. (Int. 27:​1, 3) Tulakonzya kuzoolisimya kumapenzi mapati ngituyooswaana kuti katukonzya kulisimya lino. (Rom. 5:3) Nkamboonzi nitukonzya kwaamba oobo? Bakombima biingi bakabona kuti kulisimya kumapenzi ngibaswaana lino kubagwasya kuti bazoolisimye kuchiindi chili kunembo chiyumu. Chiindi nibabona Jehova mbalikubagwasya kuti balisimye lino, nga baba aachoonzyo chakuti ulayanda kubagwasya. Akaambo kakuti balamusyoma Jehova, balakonzya kuzoolisimya kumapenzi aali kunembo.—Jak. 1:​2-4. w23.07 3 ¶7-8

Jehova ulalibombya alubo ulaaluzyalo, eezi zitondeezya kuti ulamvwisisisya. Muchikozyano, Jehova wakatondeezya kuti ulalibombya chiindi naakali kuyanda kunyonyoona bantu bakuSodoma. Kabelesya ngilozi, Jehova wakabuzya Loti kuti achijile kundawu yakali aazilundu. Loti wakali kuyoowa kwiinka kundawu eeyo. Nkinkaako, wakakumbila kuti we ampuli yakwe bachijile kuZowari. Zowari wakali muunzi muniini wakali kuyanda kunyonyoonwaamwi aSodoma. Jehova wakali kukonzya kubuzya Loti kuti nzindaamba tandichinchi pe, chita nzindakubuzya. Pesi teembakachita pe, wakazumizya Loti kuti achijile kuZowari alubo muunzi ooyo teewakazoonyonyoonwa pe. (Mtl. 19:​18-22) Mukuya kwachiindi, Jehova wakatondeezya kuti wakabafwida luzyalo bantu bakuNinivi. Wakatuma mupolofita Jona kuti aambilizye kuti bantu babi bamumuunzi ooyu bakali kuzoonyonyoonwa chakufwambaana akuti muunzi ooyu wakali kuzoonyonyoonwa. Pesi bantu bakuNinivi nibakasanduka, Jehova wakabafwida luzyalo alubo muunzi ooyo teewakazoonyonyoonwa pe.—Jon. 3:​1, 10; 4:​10, 11. w23.07 21 ¶5

Twiiyaanzi kuzwa kuli Jehoyashi? Jehoyashi wakali mbuli musamu ulaamiyanda iitanikide pe uujekedwe aachisamu. Chiindi Jehoyada ooyo wakamujekede naakafwa, Jehoyashi wakasaanguna kuswiilila makani aabasiluleyo, eezi zyakapa kuti ataswiilili Jehova. Chikozyano eechi chitondeezya kuti tatweelede kuyoowa Leza akaambo kakuti tulikukkopa zichitwa aabakombima abamumpuli. Kuti tukkale katusimide mubukombi, tweelede kutondeezya kuti tulamuyanda Jehova akumulemeka kwiinda mukukkala katubala Bbayibbili, kuyanduulisisya, kuyeeyesesya akukomba. (Jer. 17:​7, 8; Kol. 2:​6, 7) Jehova tatubuzyi kuti tuchite zintu nzitutakonzyi pe. Nzyayanda kuti tuchite zifwiinsidwe muli Mukambausi 12:​13, yaamba kuti: “Koyoowa Leza mwini-mwini akutobela milawo yakwe, nkaambo ooyu ngomukuli woonse ngwapedwe muntu.” Kuti twayoowa Leza, tuyookkala katusyomeka chiindi nituyooswaana masunko muchiindi chilikunembo. Taakwe chintu chikonzya kumaninsya bweenzuma mbutulaabo aJehova. w23.06 19 ¶17-19

Vesi 5 isaanguna aamajwi aakuti: “Ooyo wakakkede aachuuno chabwaami wakati.” (Chi. 21:5a) Majwi aaya ajanika kwaziindi zitatu mubbuku lyaChiyubunuzyo chiindi Jehova naakali kwaambuula muzilengaano. Alubo majwi aaya taakambuulwa aangilozi pe naakuti Jesu, pesi akaambuulwa aaJehova lwakwe. Eezi zipa kuti tusyome kuti majwi aatobela ngaakaamba ngachoonzyo. Nkamboonzi nikuli oobo? Nkaambo Jehova ‘tabeji.’ (Tit. 1:2) Kaambo aaka kapa kuti tusyome kuti majwi aajanika muli Chiyubunuzyo 21:​5, 6 azoozuzikizigwa. Atulange-lange bbala lyakuti: “Bona!” Bbala lyachiGrikki lyakasandululwa kuti “bona!,” libelesedwe kwaziindi zyiingi mubbuku lyaChiyubunuzyo. Ngaali makani aatobela ngaakaamba Leza? Wakati: “Ndilikupa kuti zintu zyoonse zibe zipya.” Jehova uyoopa kuti zintu zikachinche kunembo nkaambo wakaamba mbuli kuti zintu eezi zilikuchitika kale.—Is. 46:10. w23.11 3-4 ¶7-8

Nikuba kuti Petro kuli zintu nzyaakabona anzyaakamvwa, pesi kwakachili zimwi zintu zyakali kumuleya. Atubone zimwi zikozyano ziche biyo. Jesu naakapandulula mbaakali kuyoopenzegwa akujayigwa kuchitila kuti azuzikizye bupolofita bwamuBbabbiyili, Petro wakabuzya Jesu kuti tazyeelede kumuchitikila pe eezi. (Mk. 8:​31-33) Kwaziindi zyiingi, Petro abamwi baapostoli bakali kukazyania atala akuti ngwani mupati aakati kabo. (Mk. 9:​33, 34) Mubusiku bwamamanino Jesu katanafwa, Petro wakakwapula kutwi kwawumwi mwaalumi. (Joh. 18:10) Mubusiku mbuboobo, Petro wakayoowa mpawo wakakaka Jesu kwaziindi zitatu kaamba kuti taakali mweenzinyina pe. (Mk. 14:​66-72) Eezi zyakapa kuti Petro alile loko. Jesu taakamusowa pe mwaapostoli Petro naakamanide manguzu. Naakabusigwa Jesu, wakapa Petro mulimu kuchitila kuti abone kuti wakachili kumuyanda. Jesu wakapa Petro mulimu wakuti ayembele mbelele zyakwe. (Joh. 21:​15-17) Petro wakawuzumina mulimu ooyo. Mubuzuba bwaPentekkoste, Petro wakaliwo kuJerusalema alubo wakali aakati kabantu bakasaanguna kunanikwa aamuuya uusalala. w23.09 22 ¶6-7

Mwaapostoli Petro wakasungwaazya baalunyina kuti: “Amweembele butanga bwaLeza. (1 Pet. 5:​1-4) Kuti kuli mwaalu, tulizi kuti ulabayanda bakwesu abachizi akuti ulayanda kubagwasya muzintu zyabukombi. Chimwi chiindi, ulakonzya kujatikana naakuti kukatala zyakuti ulakonzya kukachilwa kuchita mulimu ooyu. Niinzi nzukonzya kuchita? Buzya Jehova mbulimvwa. Petro wakalemba kuti: “Kuti umwi muntu wabeleka, achite oobo mbuli kuti ubelesya manguzu aazwa kuli Leza.” (1 Pet. 4:11) Kulakonzeka kuti bakwesu abachizi balikuswaana mapenzi aatakonzyi pe kumana munyika eeyi. Pesi utalubi kuti “mweembeli mupati,” Jesu Kkristu ulakonzya kubagwasya kwiinda nzukonzya kuchita. Jesu ulakonzya kuzichita eezi lino amunyika mpya. Leza uyanda kuti baalu bayande bakombinyina, babeembele akuti babe “zikozyano kubutanga” kupela. w23.09 29-30 ¶13-14

Tweelede kutantamuka kutobelezya maboneno abantu. Kuti twabona zintu mbuli mbubazibona bantu batakombi, tulakonzya kusiya Jehova akutatobelezya milawu yakwe. (1 Kor. 3:19) “Busongo bwanyika eeyi” bupa kuti bantu bataswiilili Leza. Bamwi maKkristu bakuPegamu abakuTiyatira bakali basaanguna kutobelezya zintu zyakali kuchitwa aabantu bakali kuchita bwaamu alubo bakali kukomba zibumbwa. Jesu wakabapa lulayo bamumbungano eezi akaambo kakuti bakali basaanguna kuchita bwaamu. (Chi. 2:​14, 20) Mazubaano, bantu mbituponaabo balakonzya kupa kuti tusaangune kuba aamizeezo iitali kabotu. Bamumpuli abamwi balakonzya kupa kuti tuleke kuswiilila milawu yaJehova. Muchikozyano, balakonzya kwaamba kuti kulijata teenkani mpati pe akuti malayilile aali muBbayibbili aali atala akulijata taachibeleki pe. Chimwi chiindi tulakonzya kubonaanga malayilile ngatupa Jehova taamvwisisiki pe. Alubo tulakonzya kusunkwa kuti ‘tuyindilizye aazintu zilembedwe.’—1 Kor. 4:6. w23.07 16 ¶10-11

Mariya, banyina aaJesu wakali kuyandikana manguzu. Mariya taakakwetwe pe, pesi wakali kuzooba aada. Taakwe naakali aaluzibo pe atala akukomezya bana, pesi aachiindi eechi wakali kuzookomezya mwana mulombe wakali kuzooba Mesiya. Mbukunga Mariya taakwe muntu ngwakawonanaawe kuti abe aada, wakali kuzoozipandulula biyeni zyoonse eezi kumuntu wakali kuyanda kumukwata, Josefa? (Lk. 1:​26-33) Mariya wakaajana kuli manguzu? Wakayanduula lugwasyo kuzwa kuli bamwi. Muchikozyano, wakakumbila Gabbriyeli kuti amupe makani miingi aali atala amulimu ngwaakapegwa. (Lk. 1:34) Kakutanayinda chiindi, Mariya wakayinka “kunyika yazilundu, mumuunzi waJuda” kuti akaswaye bbululu wakwe Elizabbeti. Elizabbeti wakalumbayizya Mariya alubo wakazulwidwa aaJehova kwaamba bupolofita busungwaazya bwakali atala amwana wakachili mwida lyaMariya. (Lk. 1:​39-45.) Mariya wakaamba kuti Jehova “wachita milimu yanguzu akuboko kwakwe.” (Lk. 1:​46-51) Jehova wakasimya Mariya kabelesya Gabbriyeli aElizabbeti. w23.10 14-15 ¶10-12

Basikwiiya baKkristu bache biyo mbabo bakananikwa aamuuya uusalala alubo bali aabweenzinyina buyandikana loko aJehova. MaKkristu aaba bananikidwe babeleka kabali bapayizi kujulu kabalaamwi aJesu. (Chi. 14:1) Ndawu Iisalala yiiminina bana baLeza bamuuya nikuba kuti bachili aanyika. (Rom. 8:​15-17) Ndawu Iisalalisya yiiminina julu, ooko Jehova nkwakkala. ‘Kketeni’ lyakali kwaanzaanisya Ndawu Iisalala aNdawu Iisalalisya lyiiminina mubili waJesu wanyama, wakali kumukachizya kuti ayinke kujulu kali Mupayizi Mupati mutempele lyakumuuya. Kwiinda mukupa mubili wakwe kuti ube chipayizyo chakunununa bantu, Jesu wakajula nzila yakuti maKkristu boonse bananikidwe bakonzye kwiinka kujulu. MaKkristu aaba ambabo beelede kusiya mibili yanyama kuchitila kuti bazookonzye kwiinka kujulu.—Heb. 10:​19, 20; 1 Kor. 15:50. w23.10 28 ¶13

Gidiyoni wakabasandula munzila iilikabotu bamusyobo wa-Efrayimu nibakamunyemya. (Bab. 8:​1-3) Taakwe naakabasandula kanyemede pe. Wakatondeezya kuti ulalibombya kwiinda mukuswiilila bbazu lyabo. Alubo nzila njaakabasandulaayo yakapa kuti babatame. Baalu bali aabusongo balakonzya kutobelezya chikozyano chaGidiyoni kwiinda mukuswiilila akubasandula kabotu aabo babanyemya. (Jak. 3:13) Kuti bachita oobo, bapa kuti mumbungano kube luumuno. Chiindi Gidiyoni naakazunda maMidiyani wakapa kuti Jehova alumbayizigwe. (Bab. 8:​22, 23) Kujana baalu bachitobelezya biyeni chikozyano chaGidiyoni? Beelede kupa kuti Jehova alumbayizigwe kuzintu nzibazwidilila kuchita. (1 Kor. 4:​6, 7) Muchikozyano, kuti mwaalu walumbayizigwa anzila njayiisyaayo, ulakonzya kwaamba kuti nzyaalikuyiisya zizwa muJwi lyaLeza naakuti Jehova ulatuyiisya kabelesya mbunga yakwe. Baalu beelede kulilanga-langa kuti babone kuti nzila njibayiisyaayo njakulisumpula na naakuti ipa kuti Jehova atembawulwe. w23.06 4 ¶7-8

Kuti zintu nzitwakombela teetwazijana, tulakonzya kulibuzya kuti, ‘Ndili kukombela zintu zili nzizyo na?’ Chiindi chiingi, nga tubonaanga tulizizi zintu nzituyanda, pesi zintu eezyo zilakonzya kutugwasya kwachiindi chifwiifwi biyo. Kuti katuli kukombela limwi penzi, penzi lyesu lilakonzya kubambululwa munzila iisiyene anjitunga twakombela katubonaanga njiyo iilikabotu. Alubo zimwi zintu nzitukombela nga tazyeendelani pe akuyanda kwaJehova. (1 Joh. 5:14) Muchikozyano, tulakonzya kuyeeya atala achikozyano chabazyali bakali bakombela kuti mwanaabo akkale kali mukasimpe. Kubonekaanga nzibakakumbila zilikabotu. Pesi Jehova tatusungilizyi pe kuti tumukombe. Uyanda kuti toonse kuswaanizya abana besu tulisalile biya kuti tumukombe. (Dt. 10:​12, 13; 30:​19, 20) Nzibakonzya kuchita bazyali aaba, nkukumbila Jehova kuti abagwasye kuti bayiisye mwanaabo munzila yakuti ayande Jehova akuti abe mweenzinyina.—Tus. 22:6; Ef. 6:4. w23.11 21 ¶5; 23 ¶12

Nkamboonzi kuumbulizya bamwi niili nzila iiyandikana yakubatondeezya luyando? Kweendelana aalimwi bbuku lipandulula Bbayibbili, bbala ndyaakabelesya Pawulu lyakuti “kuumbulizyania” lyaamba “kwiimikila aamuntu ooyo kulikumusungwaazya chiindi nali muchiimo chiyumu.” Kuti twamuumbulizya mukombima uuli muchiimo chiyumu, ngatulikumugwasya kuti alisimye akuti ayinkilile kunembo kweenda munzila iitola kubuumi. Chiindi choonse nitugwasya mukwesu naakuti muchizi, nga tuli kumutondeezya luyando lwabuzyalwama. (2 Kor. 7:​6, 7, 13) Kweetelela bamwi akubawumbulizya kuli mpukunjililana. Kunjililana biyeni? Lweetelelo lupa kuti tuumbulizye bamwi akuti tubagwasye chiindi nibali mumapenzi. Nkinkaako, tusaanguna aakubeetelela mpawo twazoobawumbulizya. Pawulu wakaamba kuti lweetelelo lupa kuti Jehova atuumbulizye. Wakaamba kuti Jehova “[nguTaata] silweetelelo lupati, Leza siluumbulizyo loonse.”—2 Kor. 1:3 w23.11 9-10 ¶8-10

Batobeli baKkristu boonse balangilila kuswaanana aamapenzi. Yeeya atala achikozyano chaPawulu. Wakalembela maKkristu bakuTesalonikka kuti: “Nitwakachili aandinywe, twakali kukkala katumubuzya kuti tuzooswaana mapenzi, alubo mbuli mbumuzi, eezi nzizyo zyachitika.” (1 Tes. 3:4) Alubo wakalembela maKkristu bakuKkorinte kuti: “Bakombima, tuyanda kuti muzibe mapenzi ngitwakaswaana . . . Teetwakachili aachoonzyo chakuti nga tulapona.”(2 Kor. 1:8; 11:​23-27) MaKkristu ambabo mazubaano balangilila kuswaana mapenzi aasiyene-siyene. (2 Tim. 3:12) Nusaanguna kusyoma muli Jesu akumutobela babbululu bako abeenzinyokwe amwi bakuchitila lunya. Kusyomeka muzintu zyoonse nwaakali kumulimu kwakapa kuti uswaane mapenzi na? (Heb. 13:18) Kuli nwaakakazigwa aamfulumende na akaambo kakuti wakakambawukila bamwi atala abulangilizi mbulaabo? Kazitakwe ndaba amapenzi ngitukonzya kuswaana, Pawulu wakaamba kuti tweelede kubotelwa. w23.12 10-11 ¶9-10

Jakkobo wakaswaanaamwi mapenzi. Bana bakwe babili, Simeyoni aLevi bakapa kuti mpuli yabo itabi aabulemu alubo bakapa kuti zina lyaJehova lisampawulwe. Jakkobo wakazoofwidwa aamwanakazi ngwaakali kuyandisya loko, Rakkele, chiindi naakali kutumbuka mwana wachibili. Alubo nzala mpati yakaba munyika yakapa kuti Jakkobo alongele kunyika ya-Ijipiti kali wachembaala. (Matl. 35:​16-19; 37:28; 45:​9-11, 28) Jakkobo taakaleka pe kusyoma Jehova azisyomezyo zyakwe nikuba kuti wakaswaana mapenzi aasiyene-siyene. Jehova wakatondeezya kuti wakali kumuyanda Jakkobo. Muchikozyano, Jehova wakamulongezya kwiinda mukumupa lubono lwiingi. Alubo kweelede Jakkobo wakamulumba loko Jehova chiindi naakaswaanana aamwanaakwe Josefa ngwaakali kuyeeyela kuti wakafwa chiindi. Kuba aabweenzinyina busimide aJehova nkuko kwakamugwasya kuti alisimye mumapenzi. (Matl. 30:43; 32:​9, 10; 46:​28-30) Andiswe kuti twaba aabweenzuma busimide aJehova, tulalisimya kuti twaswaana mapenzi ngitutalangilili pe. w23.04 15 ¶6-7

Intembauzyo 23 ndwiimbo lwaDavida ndwaakayimba kali aachoonzyo kuti Jehova ulamuyanda amoyo woonse. Davida wakapandulula mbubwakasimide bweenzinyina mbwaakalaabo aJehova, ooyo ngwaakaamba kuti Mweembezi wakwe. Davida wakalimvwa kakwabililidwe kwiinda mukuzumizya Jehova kuti amuzulwide alubo wakasyoma Jehova chakumaninina. Davida wakalizi kuti Jehova wakali kunoomutondeezya luyando buzuba abuzuba. Niinzi chakapa kuti Davida abe aachoonzyo chakuti Jehova ulamuyanda? Davida wakabona kuti Jehova ulamulangania nkaambo taakwe nchaakali kubula pe. Alubo Davida wakalizi kuti Jehova mweenzinyina akuti ulamuyanda. Eezi nzizyo zyakapa kuti Davida abe aachoonzyo chakuti Jehova wakali kuzooyinkilila kunembo kumupa zintu zyoonse nzyaakali kuyanda nikuba kuti zyiimo kunembo zyazoochincha. Akaambo kakuti Davida wakali kusyoma kuti Jehova ulamuyanda akuti ulamulangania, taakwe naakakataazikana pe, pesi wakali kubotelwa alubo wakali kukkutisikana.—Int. 16:11. w24.01 29 ¶12-13

Kuzwa nikwakachitika Nkondo Yachibili Yanyika Yoonse, bakombi baJehova munyika zyiingi bakaba aaluumuno alwaangunuko lwakukambawuka makani mabotu. Lino makani mabotu alikukambawukwa munyika yoonse. Mazubaano, bamuKabunga Keendelezya balikwiinkilila kunembo kuswiilila malayilile ngibapegwa aaKkristu. Bayanda kuti malayilile ngibapa bakwesu atondeezye kuti azwa kuli Jehova. Alubo ngabapa balangizi bamabazu abaalu malayilile kuti bape basikupupulula mumbungano. BamuKabunga Keendelezya bali “mukuboko [kwaKkristu] kwachilisyo.” (Chi. 2:1.) Bakwesu aaba tabamaninide pe alubo balapambanisya. Aali zimwi ziindi, Mozesi, Joshua abaapostoli bakali kupambanisya. (My. 20:12; Jos. 9:​14, 15; Rom. 3:23) Nikuba oobo, Kkristu ulikwiinkilila kunembo kuzulwida muzike uusyomeka abaalu alubo uyooyinkilila kunembo kuchita oobo. Nkinkaako, tuli aatwaambo tubotu tupa kuti tusyome malayilile ngatupa Kkristu kabelesya aabo balikutuzulwida. w24.02 23-24 ¶13-14

Mazubaano, tulakonzya kubotezya Jehova kwiinda mukwaambuula munzila iitondeezya kuti tulamulumba akuti tulamuyanda. Chiindi nituli mumulimu wakukambawuka, tweelede kuyeeya kuti makanze eesu mapati nga kugwasya bantu kuti baze kuli Jehova akubagwasya kuti bamuyande mbuli mbutumuyanda. (Jak. 4:8) Tulabotelwa chiindi nitutondeezya bantu nzilyaamba Bbayibbili atala aJehova abuntu mbwalaabo mbuli luyando, bululami, busongo, manguzu abumwi buntu bubotu mbwalaabo. Alubo tulamutembawula Jehova akumubotezya kuti tweezya kumutobelezya. Chiindi nituchita zintu eezi, nga twasiyana abantu beendelezegwa aaSaatani. Bamwi bantu balakonzya kubona kuti tulisiyene ambabo alubo ngabayanda kuziba zyiingi. (Mat. 5:​14-16) Chiindi nitwaambuuzyania aabantu buzuba abuzuba, tulakonzya kubapandulwida kuti nkamboonzi nitusiyene ambabo. Eezi nga zyapa kuti bantu bali aachiyandisyo baze kuli Leza wesu. Kuti twatembawula Jehova munzila eezi, nga tulikupa kuti abotelwe.—1 Tim. 2:​3, 4. w24.02 10 ¶7

Kuti ube muKkristu uusimide mubukombi, kulayandikana kuti uchite zintu zikonzya kuzookugwasya mubuumi. Zintu eezi zilakugwasya kuti uzwidilile kuchita milimu yako mumbungano, ujane mulimu ukugwasya kuti ujane zintu zyakuponaazyo abamumpuli yako akuti umvwanane aabamwi. Atubone zintu ziche ziyandikana nzukonzya kuchita. Muchikozyano, yiya kulemba akubala. Bbayibbili lyaamba kuti mwaalumi uubotelwa alubo uuzwidilila ubelesya chiindi chakwe kubala Jwi lyaLeza buzuba abuzuba akuyeeyesesya atala anzyaabala. (Int. 1:​1-3.) Kubala Bbayibbili buzuba abuzuba kumugwasya kuti ayizibe kabotu mizeezo yaJehova, eezi zilakonzya kumugwasya kuti ayeeye kabotu akuti abelesye Magwalo. (Tus. 1:​3, 4) Bakwesu abachizi balangilila kugwasigwa aabakwesu bakonzya kuyiisya akubelesya malayilile aamuBbayibbili. Kuti kukonzya kubala akulemba, nkuuba kuti ulibambile nkani ansandulo ziyiisya alubo zisimya lusyomo. Alubo ulakonzya kuzilembaansi nzuyandisya zikugwasya kuti usimye lusyomo lwako akuti usungwaazye bamwi. w23.12 26-27 ¶9-11

Chiindi nuyoowede, yeeyesesya atala azintu Jehova nzyatazookuchitile kunembo Saatani natazoonyonyoonwe. Pulogilamu yamuswaangano wabbooma yamu2014 yakali achitondeezyo chawumwi mwaalumi wakali kwaambuuzyania aampuli yakwe atala ambulukonzya kulembwa lugwalo lwa 2 Timoti 3:​1-5 kuti kakuli kuti lugwalo oolu lwaambuula atala ambubunoobede buumi muParadayizi. Wakati: “Kuzooba ziindi zibotezya munyika mpya, nkaambo bantu bazooyanda bamwi, bazooyandisya kasimpe, bazi mpubagolela, balibombya, balumbayizya Leza, baswiilila bazyali, balumba, basyomeka, bayandisya mpuli zyabo, bazuminana aabamwi, baambuula zintu zibotu atala abamwi, balinyona, bali aamoyo uubombede, bayanda bubotu, batawuzyi bamwi, bamvwisisisya, balibikka aansi, bayandisya Leza kwiinda zyakulikondelezya, bayanda Leza akumukomba alubo utalitantamuni kubantu bali boobu.” Nga wachijana chiindi na chakwaambuuzyania atala ambubunoobede buumi munyika mpya kuli aabamumpuli yako naakuti abakombinyokwe? w24.01 6 ¶13-14

Zilabotezya kuziba kuti Jehova ulabayanda bakombi bakwe. Bbayibbili lyaamba kuti: “Jehova ulabakkomanina bantu bakwe.” (Int. 149:4) Nikuba oobo, bamwi nga bamana manguzu zyakuti nga balibuzya kuti, ‘Zintu nzindichita zilamubotezya na Jehova?’ Bakombi baJehova bachiindi chimwi chiindi, bakali kulimvwa munzila eeyi ambabo. (1 Sam. 1:​6-10; Job. 29:​2, 4; Int. 51:11) Bbayibbili litondeezya aantanganana kuti bantu batamaninide balakonzya kubotezya Jehova. Biyeni? Beelede kuba aalusyomo muli Jesu Kkristu akubbabbatizigwa. (Joh. 3:16) Kuti twachita oobo, nga tulikutondeezya aantanganana kuti twasanduka kuzibi zyesu akuti twakasyomezya Leza kuti tunoochita kuyanda kwakwe. (Mil. 2:38; 3:19) Jehova ulabotelwa chiindi nitubweza ntaamu eezi kuti tukkale katuli aabweenzuma busimide anguwe. Kuti twayinkilila kunembo katupona kweendelana akulipeda kwesu, Jehova ulabotelwa alubo tulaba beenzinyina.—Int. 25:14. w24.03 26 ¶1-2

Tweelede kutobelezya chikozyano chabasikwiiya kuti balupati-pati bamfulumende batukasya kuti tukambawuke. Tulakonzya kuba aachoonzyo chakuti Jehova ulatugwasya kuti tuzwidilile mumulimu wesu wakukambawuka. Nkinkaako, tulakonzya kukombela kuti tube aachibindi abusongo. Tweelede kukumbila Jehova kuti atugwasye kuti tulisimye kumapenzi. Biingi besu tulikuswaana buyumu-yumu, kufwidwa, kutamvwanana mumpuli, kupenzegwa naakuti amwi mapenzi. Malwazi aali mbuli kkorona ankondo zilikupa kuti zintu zyiindilile kuyuma. Atumubuzye Jehova zyoonse zili aansi aamyoyo yesu. Mubuzye atala achiimo chako kukugama mbuli mbuwayinoobuzya mweenzinyokwe. Weelede kuba aachoonzyo chakuti Jehova “ulakugwasya.” (Int. 37:​3, 5) Kukakatila kukukomba kutugwasya kuti ‘tulisimye mumapenzi.’ (Rom. 12:12) Jehova ulizi kuti bakombi bakwe balikuswaana zyiimo ziyumu, nkinkaako, “ulamvwa nobakwiilila lugwasyo.”—Int. 145:​18, 19. w23.05 5-6 ¶12-15

Kuti kakuli zimwi zintu ziyandikana nzituyanda kusala, tweelede kumvwisisisya kuti “kuyanda kwaJehova niinzi” mpawo tuchite kweendelana ankuko. (Ef. 5:17.) Kuti twayanduula malayilile aamuBbayibbili aayendelana aachiimo chesu, ngatuli kuyanda kuziba kuti Jehova utyeni atala ankani eeyo. Nkinkaako, kuti twabelesya malayilile aakwe, tulasala kabotu. ‘Mubi,’ nkukwaamba sinkondoma Saatani, uyanda kuti tukkale katujisikini akuyanduula zintu zili munyika kuchitila kuti tubule chiindi chakubelekela Leza. (1 Joh. 5:19) MuKkristu ulakonzya kusaanguna kumaninsya chiindi chiingi kayanduula zintu zyakumubili, lwiiyo lwaajulu naakuti mulimu mpawo kabula chiindi chakuti abelekele Jehova. Kuti eezi zyachitika, nyika ngayamucha muKkristu ooyo. Nichoonzyo kuti zintu eezi teezibi pe, pesi tazyeelede kuba mubusena bwakusaanguna pe mubuumi bwesu. w24.03 24 ¶16-17