Jwiyé

Tousa Jézi té ka di, tousa i té ka fè, kou mirak-ya parèkzanp, té ka montré parfètman kouman so Papa ka réfléchi é kisa i ka rousanti (Jean 14:9). Kisa nou ka anprann grasa mirak i fè ? Prémyèrman, Jézi ké so Papa kontan nou bokou. Lò i té asou latè-a, Jézi montré kouman i té kontan moun-yan. I sèrvi pouvwar i té gen pou fè mirak pou soulajé yé soufrans. Roun jou, dé avèg sipliyé l’ pou i idé yé (Mat. 20:30-34). Si to ka byen gadé, vèrsé-a ka di ki « so tchò fè l’ mal » anvan i di ki i géri yé. An grèk, vèrb-a yé ka sèrvi pou di « so tchò fè l’ mal », a roun vèrb ki lé di ki roun moun ka santi roun konpasyon ki fò toubonnman annan tout so andidan. Si Jézi bay sa-ya ki té fen manjé é i géri roun mouché ki té gen lalèp, a paské i té gen konpasyon ké lanmou pou moun-yan (Mat. 15:32 ; Marc 1:41). Donk nou pouvé sir ki Jéova, Bondjé-a ki ka montré roun « konpasyon ki plen ké tandrès », ké so Pitit kontan nou bokou. É sa ka fè yé lapenn lò yé ka wè nou soufri (Luc 1:78 ; 1 Pierre 5:7). Yé présé soulajé nou di tout problèm ki ka fè nou soufri ! w23.04 3 § 4-5.

Annou fè tousa nou pouvé pou nou pa li é pou nou pa kouté mové lidé ki ka kouri toupatou annan monn Satan-an. Annou li ké étidyé Labib pou nou plen nou lèspri ké bon bagaj. Épi annou alé annan réinyon-yan é annou préché ; sa ké idé nou osi protéjé nou lèspri. Si nou ka fè sa, Jéova ka promèt nou ki nou pa ké tanté plis ki sa nou pouvé sipòrté (1 Cor. 10:12, 13). Pou nou rété fidèl douvan Jéova pannan sa dèrnyé jou-ya ki rèd, nou tout bézwen priyè plis ki sa nou gen labitid priyè. Jéova lé to ‘di li tousa to gen ofon to tchò’ (Ps. 62:8). Louwé li é di li mèrsi pou tousa i ka fè. Doumandé li bay to kouraj pou to préché. Sipliyé l’ idé to lò to ka jwenn problèm é pou to tchenbé douvan tantasyon-yan. Pa lésé anyen ni pyès moun anpéché to priyè l’ souvan. w23.05 7 § 17-18.

Poukisa nou ka alé annan réinyon-yan ? Pou koumansé, a pou louwé Jéova (Ps. 26:12 ; 111:1). Nou ka alé annan réinyon-yan osi pou ankourajé nou konpanyen annan sa lépòk-a ki rèd (1 Thess. 5:11). É lò nou ka réponn, sa ka pèrmèt nou fè sa dé bagaj-ya. Mé lò a pou bay roun répons, pitèt sa rèd pou nou : nou pè lò nou savé ki nou divèt palé douvan tout asanblé-a, ouben nou lé réponn mé yé pa ka bay nou réponn souvan kou nou té ké lé. Kisa nou pouvé fè si nou gen sa problèm-yan ? Apot Pòl di ki yé té divèt ‘ankourajé yé konpanyen’. Nou ké pi alèz pou nou lévé nou lanmen si nou ka konprann ki nou pouvé ankourajé ròt-ya ké roun répons tou senp ki ka montré nou lafwa. É lò yé pa ka entérojé nou souvan, nou pouvé kontan pou ròt-ya paské yé pouvé réponn (1 Pierre 3:8). w23.04 20 § 1-3.

Lalwa fin soti : Jwif-ya ki ka rété Babilòn dipi apéprè 70 lannen lib aprézan é yé pouvé routounen annan yé koté, Israyèl ! (Esd. 1:2-4). A grasa Jéova rounso sa lalwa-a soti. Babilonyen-yan pa té gen labitid libéré yé prizonyé (Is. 14:4, 17). Mé Babilòn tonbé é nouvo chèf-a pèrmèt Jwif-ya pati. Tout Jwif-ya, é èspésyalman chèf fanmi-ya, gen roun désizyon pou yé pran : swa yé ka lésé Babilòn swa yé ka rété la. Mé a roun désizyon ki rèd pou pran. I gen bokou ki ja granmoun é yé pa pouvé fè sa vwayaj-a ki byen long. Anplis di sa, près yé tout fèt Babilòn é yé pa janmen rété rounòt koté ; pou yé, Israyèl sa péyi yé gangan. Épi pou fini, i té divèt gen sa ki divini rich a Babilòn é pitèt yé té ka ézité lésé yé kaz, koté yé té alèz, ké yé travay pou alé rété annan roun koté yé pa té konnèt. w23.05 14 § 1-2.

Paròl Bondjé-a ka ankourajé nou kontinyé gen andirans, konpasyon ké lanmou. Nou ka li annan Luc 21:19 : « Paské zòt ka kontinyé tchenbé, zòt ké sové zòt lavi. » Men sa Colossiens 3:12 ka ankourajé nou fè : « Abiyé ké konpasyon-an. » É 1 Thessaloniciens 4:9, 10 ka di : « Bondjé li menm ka anprann zòt kontan zòt konpanyen […]. Mé nou frè-ya, nou ka ankourajé zòt fè sa ankò plis. » Yé té ékri sa paròl-ya pou disip-ya ki té ja ka montré ki yé té gen andirans, konpasyon ké lanmou. Mé, yé té divèt kontinyé anprann kouman yé té pouvé montré sa kalité-ya. A sa nou divèt fè nou menm osi. Pou idé to fè sa, gadé kouman prémyé krétyen-yan montré sa kalité-ya. Konsa to ké wè kouman to pouvé imité yé. Sa ké pèrmèt to paré pou gran tribilasyon-an. Lò gran tribilasyon-an ké koumansé, to ké ja savé sa pou to fè pou to rivé tchenbé é to ké byen désidé kontinyé tchenbé. w23.07 3 § 4, 8.

Ki nou ka fè parti di krétyen wen-yan, ki nou annan « ròt brébi-ya », nou divèt rété asou « Chimen ki sen-an » (Jean 10:16). A sèlman si nou ka rété asou sa chimen-an ki nou ké jwenn bénédiksyon paradi èspirityèl-a ka mennen jòdla ké bénédiksyon Rwayonm-an ké mennen titalò. Dipi 1919, roun patché wonm, fanm ké timoun lésé Gran Babilòn-an, sa lé di tout fo rélijyon-yan, é yé koumansé maché asou sa larout senbolik-a. Jéova fè sa ki té fo pou tiré tousa ki té ké pouvé anpéché Jwif-ya ki té ké soti Babilòn maché asou larout yé té ké pran-an (Is. 57:14). É pou « Chimen ki sen-an » jòdla ? Anvan 1919, pannan plizyèr syèk, Jéova itilizé moun ki té gen lakrent pou li pou yé nétwayé chimen sa-ya ki té ké soti di Gran Babilòn-an té ké pran (gadé Isaïe 40:3). A kousidiré sa mouché-ya té préparé larout-a. Yé té oblijé fè sa travay-a, konsa, pita, moun ki sensèr té ké pouvé lésé Gran Babilòn-an épi antré annan paradi èspirityèl-a koté Bondjé té ké roumété vré ladorasyon-an. w23.05 15-16 § 8-9.

Jéova lé nou adoré l’ ké lajwa é ké tout nou tchò (2 Cor. 9:7). Donk ès nou divèt fòrsé nou kò fè sa nou prévwè lò nou pa djè anvi fè l’ ? Gadé sa apot Pòl di : « Mo ka bay mo kò kou é mo ka ralé l’ kou roun èsklav » (1 Cor. 9:25-27). Menm lò i pa té anvi fè sa Jéova té ka doumandé li fè, Pòl té ka fòrsé so kò fè l’. Ès Jéova té kontan sa Pòl té ka fè pou li ? Asiré pa pitèt. I rékonpansé tout éfòr i fè (2 Tim. 4:7, 8). Menm fason-an, Jéova kontan lò i ka wè nou ka fè éfòr pou nou rivé fè sa nou prévwè menm lò nou pa cho pou fè l’. Sa ka fè l’ plézi paské i savé ki nou ka fè l’ pas nou kontan li. Pitèt nou pa kontan sa nou ka fè, mé nou kontan li. Menm fason i béni éfòr Pòl fè, i ké béni éfòr nou ké fè osi (Ps. 126:5). É lò nou ké wè ki Jéova ka béni nou, sa ké pouvé bay nou anvi aji. w23.05 29 § 9-10.

Apot Pòl ka di ki sa-ya ki ké mouri pannan jou Jéova-a, yé kou moun ki ka dronmi. Poukisa i ka di sa ? Paské kou yé pa savé sa ki ka pasé é yé pa ka wè ki tan-an ka pasé, yé pa ka wè ki bagaj enpòrtan ka fèt annan monn-an, é yé pa ka réyaji. Jòdla, a kousidiré près tout moun ka dronmi (Rom. 11:8). Yé pa ka krè prèv-ya ki ka montré ki nou ka viv dèrnyé jou-ya é ki gran tribilasyon-an pròch (2 Pierre 3:3, 4). Mé pi sa ka alé, pi nou ka byen wè ki sa enpòrtan pou nou swiv konsèy Pòl ki ka di nou pa dronmi (1 Thess. 5:6). Donk, nou divèt rété kalm épi pa paniké. Poukisa ? Pou nou pa mélé ni annan lapolitik ni annan problèm sa monn-an. Pi jou Jéova-a ké proché, pi yé ké mété présyon anlè nou pou nou pran parti annan sa bagaj-ya. Mé a pa pou nou kasé nou tèt pou savé kouman nou ké réyaji. Lèspri sen ké idé nou rété kalm épi rété fò, é i ké idé nou pran bon désizyon (Luc 12:11, 12). w23.06 10 § 6-7.

Lò to ka tandé « Sanson », kimoun to ka wè ? Pitèt to ka wè roun mouché Labib ka palé, ki té fò toubonnman. É to gen rézon. Sanson, a té roun moun ki té gen bokou fòrs. Mé ès to savé ki i soufri bokou paské i pran roun mové désizyon ? Magré sa, Jéova rété asou bon bagaj i fè. É i fè moun marké sa annan Labib pou sa idé nou. Jéova sèrvi Sanson pou fè roun patché bèl bagaj pou so pèp Israyèl. É plizyèr syèk apré Sanson mouri, i fè apot Pòl marké non so sèrvitèr annan lis non wonm ké fanm ki montré ki yé té gen roun bèl lafwa (Héb. 11:32-34). Èkzanp Sanson pouvé idé nou bokou, paské i fè Jéova konfyans menm lò sitiasyon-an té rèd. Sa i viv pouvé ankourajé nou é pouvé idé nou. w23.09 2 § 1-2.

Nou pouvé gen plis andirans si nou ka priyè Jéova souvan épi ké tout nou tchò pou di li sa ki ka fè nou enkyèt (1 Thess. 5:17). Pitèt to pa gen pyès éprèv atchèlman, mé ès to ka chaché dirèksyon Jéova-a chak fwa to faché ouben chak fwa to pa savé sa pou to fè ? Si dipi jòdla to souvan ka doumandé Jéova idé to annan to lavi touléjou, to pa ké ézité fè l’ lò to ké jwenn pi gro problèm, é to ké sir ki i ké savé èkzaktéman kitan é kouman i divèt fè roun bagaj pou to (Ps. 27:1, 3). Si dipi aprézan nou ka tchenbé rèd lò nou gen problèm, sa ké pi fasil pou nou tchenbé pannan gran tribilasyon-an (Rom. 5:3). Poukisa nou ka di sa ? Roun patché frè ké sò wè ki chak fwa yé rivé tchenbé annan roun éprèv, sa idé yé tchenbé annan éprèv-a ki vin dèyè. Yé tchenbé grasa Jéova é sa pèrmèt yé vin plis sir ki Jéova té lé idé yé. É kou yé lafwa té vin pi fò, sa pèrmèt yé tchenbé annan éprèv-a ki vin dèyè (Jacq. 1:2-4). w23.07 3 § 7-8.

Paské Jéova gen imilité ké konpasyon, i rézonab. Parèkzanp, lò i té pou détrwi moun méchan ki té ka rété Sodòm, i aji ké bokou imilité. I voyé zanj pou di Lòt, roun moun ki té jis, chapé annan montangn-an. Mé Lòt té pè alé laba. Alòr i sipliyé Jéova pèrmèt li ké so fanmi alé Zoar pito. Zoar, a té roun ti vil Bondjé té divèt détrwi. Jéova té pouvé ensisté pou Lòt fè èkzaktéman sa i té di li fè. Mé i asèpté kouté li, menmsi sa té lé di ki i pa té ké détrwi Zoar (Gen. 19:18-22). Plizyèr syèk apré sa, i montré so konpasyon pou moun ki té ka rété Niniv. I voyé profèt Jonas pou di yé ki, paské yé té méchan, i té ké détrwi ni yé ni yé vil. Mé kou Ninivit-ya répanti, Jéova pran pityé pou yé é i pa krazé yé vil (Jon. 3:1, 10 ; 4:10, 11). w23.07 21 § 5.

Kisa istwè Joas ka anprann nou ? Joas té ka sanblé roun pyébwa so rasin pa k’alé fon é ki bézwen roun zété pou rété dibout. Lò « zété-a », sa lé di Joad, mouri épi apòstazi-a rivé kousidiré a té van-an ki té ka souflé, Joas pa tchenbé. Sa ka montré nou ki lakrent nou gen pou Bondjé pa divèt dépann sèlman di nou frè ké sò ki ka idé nou, kou moun annan nou fanmi parèkzanp. Pou nou fè nou lanmityé ké Jéova rété fò, nou divèt étidyé, pran tan réfléchi asou sa nou ka li é priyè souvan pou nou fè nou lanmou pou Jéova vin pi fò é pou nou ankò plis pè fè li lapenn (Jér. 17:7, 8 ; Col. 2:6, 7). Jéova pa ka doumandé nou bokou bagaj. Ecclésiaste 12:13 ka di sa i ka doumandé so sèrvitèr : « A pou to gen lakrent pou vré Bondjé-a é a pou to obéyi so koumannman, paské a sa tout moun divèt fè. » Si nou gen lakrent pou Bondjé, nou ké pouvé tchenbé rèd lò éprèv-ya ké vini. É anyen, anyen pa ké fè nou pédi nou lanmityé ké Jéova ! w23.06 18-19 § 17-19.

Révélation 21:5 ka koumansé konsa : « Sa-la ki asiz asou tronn-an di ». Sa paròl-ya èspésyal paské yé ka montré ki a Jéova li menm ki ké palé, é annan liv Révélation-an, a sèlman trwa fwa Jéova ka fè sa. Donk, a pa roun zanj ki pwisan, ni Jézi ki résisité ki ka fè nou sir ki sa promès-a ké fèt, a Jéova li menm ki ka fè l’ ! Sa ka montré nou ki nou pouvé vréman krè sa i ka di apré. Poukisa ? Paské Jéova « pa pouvé manti » (Tite 1:2). Donk, sa ki marké annan Révélation 21:5, 6 ké fèt, asiré pa pitèt. Gadé mo-a : « Gadé ! ». An grèk, sa mo-a ka parèt souvan annan liv Révélation-an. Mé kisa yé ka di apré ? Bondjé ka di : « Mo ka fè tout bagaj vin nòv. » Isi-a, Jéova ka palé di chanjman ki pou fèt pita, mé i tèlman sir ki sa promès-ya ké fèt ki i ka palé kousidiré yé té ja fèt (Is. 46:10). w23.11 3-4 § 7-8.

Apot Pyèr té divèt briga ké so défo. Annou pran déztrwa èkzanp. Lò Jézi èspliké ki i té ké soufri é ki i té ké mouri, kou profési-ya annan Labib té ka di, i rouprann li (Marc 8:31-33). Plizyèr fwa, li ké ròt apot-ya briga pou savé kimoun ki té pi gran (Marc 9:33, 34). Lannwit anvan Jézi mouri, i pa réfléchi, i koupé zorè roun mouché (Jean 18:10). Épi sa menm lannwit-a, i pran pè : trwa fwa, i di ki i pa té konnèt so zanmi, Jézi (Marc 14:66-72). Atò, i mété pléré atè. Mé Jézi pa anbandonnen so apot ki té dékourajé. Lò i résisité, i bay li posibilité montré l’ i té kontan l’ toujou. I doumandé li pran swen di so brébi ké imilité (Jean 21:15-17). Ès Pyèr asèpté sa travay-a ? Wi ! I té Jérizalèm jou Lapannkot é i té annan prémyé moun-yan Bondjé wen ké lèspri sen. w23.09 22 § 6-7.

Men sa apot Pyèr ékri pou ansyen-yan di so lépòk : « Pran swen di troupo Bondjé » (1 Pierre 5:1-4). Zòt ki ansyen, nou savé ki zòt kontan zòt frè ké sò-ya é ki zòt lé pran swen di yé. Mé détan, zòt pouvé gen lenprésyon ki zòt gen tròp bagaj pou fè ouben ki zòt tro las pou fè sa. Kisa zòt pouvé fè ? Di Jéova sa zòt gen asou zòt tchò. Pyèr di : « Si roun moun ka sèrvi, a pou i konté asou fòrs Bondjé ka bay » (1 Pierre 4:11). Détan zòt frè ké sò-ya ka jwenn problèm ki ké disparèt annan monn nouvo-a rounso. Mé sonjé ki « bèrjé-a ki chèf », Jézi, pouvé idé yé pi byen pasé pyès moun. I pouvé fè l’ dipi jòdla é i ké fè l’ annan monn nouvo-a osi. Sa Jéova ka doumandé zòt fè, a kontan zòt frè ké sò-ya, pran swen di yé é « divini dé èkzanp pou troupo-a ». w23.09 29-30 § 13-14.

Annou panga fason moun-yan ka réfléchi. Si nou ka réfléchi kou moun-yan ka réfléchi jòdla, nou ka riské bliyé Jéova ké so prensip (1 Cor. 3:19). « Sajès sa monn-an » souvan ka ankourajé moun-yan dézobéyi Bondjé. Annan 1^é syèk-a, sa-ya ki té ka rété Pèrgam ké Tiyatir té ka adoré zidòl é yé té ka mennen roun vyé lavi ; é roun ran krétyen koumansé fè kou yé. Donk, Jézi roupran sa asanblé-ya annan sa dé vil-ya paské yé té ka asèpté imoralité sèksyèl-a (Rév. 2:14, 20). Jòdla osi, moun-yan ka éséyé fè nou asèpté vyé lidé. Nou zanmi ouben nou fanmi ké pitèt éséyé fè nou krè ki nou tro rèd é ki nou divèt dézobéyi lalwa Jéova. Parèkzanp, pitèt yé ké di nou ki nou pouvé fè sa nou lé, sa pa ka fè anyen, é ki prensip-ya ki annan Labib, a bagaj tan-lontan. Détan, pitèt nou pouvé pansé ki sa Jéova ka di nou fè pa asé klè é pitèt menm nou pouvé anvi alé « pi lwen ki sa ki marké » (1 Cor. 4:6). w23.07 16 § 10-11.

Mari, manman Jézi, té bézwen fòrs. Imajiné sa i dèt rousanti lò zanj Gabriyèl vini di li ki i té ké gen roun rèsponsabilité ki pa té fasil menm ! I pa té maryé ; pourtan i té ké tonbé ansent. I pa té jen fè pyès timoun, épi men yé ka doumandé li lévé timoun-an ki té pou divini Mési-a. É kouman i té ké èspliké so fiyansé, Jozèf, ki i té ansent alòr ki i pa té janmen kouché ké pyès mouché ? (Luc 1:26-33). Kouman Mari trapé fòrs ? I alé doumandé ròt sèrvitèr Jéova idé li. Parèkzanp, i doumandé zanj Gabriyèl plis enfòrmasyon asou sa i té gen pou fè (Luc 1:34). Roun ti moso tan apré, i alé wè Élizabèt, roun moun di so fanmi, jik « pa bò d’ montangn-yan », an Jida. Lò i rivé, Élizabèt louwé li é Bondjé fè li di roun bèl profési asou timoun-an i té ké gen (Luc 1:39-45). Apré sa, Mari di ki Jéova té « sèrvi so bra pou aji ké fòrs » (Luc 1:46-51). Wi, Jéova té sèrvi zanj Gabriyèl ké Élizabèt pou bay li fòrs. w23.10 14-15 § 10-12.

I pa gen bokou disip Kris ki wen ké lèspri sen é ki gen roun rélasyon èspésyal ké Jéova. Yé 144 000 é yé ké prèt annan syèl-a ansanm ké Jézi (Rév. 14:1). Sen-an annan tabèrnak-a ka montré ki Bondjé ka adòpté yé kou so pitit èspirityèl toupannan yé asou latè-a toujou (Rom. 8:15-17). Trè-Sen-an annan tabèrnak-a ka réprézanté syèl-a koté Jéova fika. « Rido-a », ki té ka séparé Sen-an ké Trè-Sen-an, ka réprézanté kò Jézi fèt ké lachè ki té ka anpéché l’, li ki sa Gran Prèt souvéren-an annan tanp èspirityèl-a, alé annan syèl-a. Lò Jézi bay so kò an sakrifis pou moun-yan, i louvri chimen-an pou krétyen wen-yan pouvé viv annan syèl-a. Yé menm osi, yé divèt lésé yé kò fèt ké lachè pou yé rousouvwè yé rékonpans annan syèl-a (Héb. 10:19, 20 ; 1 Cor. 15:50). w23.10 28 § 13.

Jédéyon rété kalm lò Éfrayimit-ya kritiké li (Juges 8:1-3). Lò i réponn yé, i pa palé rèd pou yé. I montré ki i té gen imilité paské i kouté yé, é i palé ké yé jantiman. Sa kalmé yé. Kanta ansyen-yan, si yé ka kritiké yé, yé ké aji ké sajès si yé ka fè kou Jédéyon. Yé ké byen kouté é yé ké réponn ké dousèr (Jacq. 3:13). Konsa, yé ké idé pou lapè rété annan asanblé-a. Lò moun louwé Jédéyon paské i té ganyen asou Madyanit-ya, a Jéova i bay laglwar (Juges 8:22, 23). Kouman frè-ya ki gen rèsponsabilité pouvé imité Jédéyon ? Yé pouvé bay Jéova laglwar pou sa yé ka rivé fè (1 Cor. 4:6, 7). Parèkzanp, si yé ka félisité roun ansyen paské i ka ansényé byen, i pouvé di ki a Paròl Bondjé-a ki ka ansényé nou, ouben i pouvé montré ki a òrganizasyon Jéova-a ki ka fòrmé nou. Ansyen-yan divèt doumandé yé kò souvan si yé ka ansényé roun fason pou bay Jéova lònò, ouben si annan fason yé ka ansényé, yé ka chaché fè moun wè. w23.06 4 § 7-8.

Si Jéova pa ka bay nou sa nou doumandé l’, a pou nou doumandé nou kò : « Ès a pou sa bagaj-a mo divèt priyè ? » Souvan, nou ka pansé ki nou savé sa ki miyò pou nou. Mé, pitèt sa nou ka doumandé, a pa sa ki pi bon pou nou. Anplis di sa, kimoun ka di i pa gen roun pi bon solisyon pasé sa-la nou ka di annan nou lapriyè. É pitèt roun ran bagaj nou ka doumandé Jéova pa k’alé ké so volonté (1 Jean 5:14). Parèkzanp, imajiné roun papa ké roun manman ka doumandé Jéova fè yé timoun rété annan lavérité-a. Yé té ké di a roun bon bagaj pou yé doumandé. Mé, Jéova pa ka fòrsé pyès moun fè so volonté. I lé nou chak, donk nou timoun osi, chwazi adoré l’ (Deut. 10:12, 13 ; 30:19, 20). Donk, paran-yan pouvé doumandé Jéova pito idé yé touché tchò yé timoun pou i vin kontan li épi divini so zanmi (Prov. 22:6 ; Éph. 6:4). w23.11 21 § 5 ; 23 § 12.

Poukisa sa enpòrtan pou nou montré nou lanmou konsa ? Dapré roun liv, lò Pòl ka di « konsolé », sa lé di « rété òbò roun moun pou ankourajé l’ lò i annan roun éprèv ki rèd ». Donk, lò nou ka konsolé roun frè ouben roun sò ki annan roun éprèv, nou ka idé l’ pou i lévé épi pou i kontinyé maché asou chimen lavi pou tout-tan. É chak fwa nou ka konsolé nou frè ouben nou sò, nou ka montré li ki nou kontan l’ (2 Cor. 7:6, 7, 13). Pou nou rivé konsolé roun moun, a pou nou gen konpasyon pou sa moun-an. Roun moun ki gen konpasyon anvi konsolé ròt-ya épi soulajé yé paské yé ka soufri. Donk, gen konpasyon pou roun moun, épi konsolé roun moun, a dé bagaj ki ka maché ansanm. Pòl èspliké ki kou Jéova gen konpasyon pou moun-yan, sa ka fè li konsolé yé. I ka di ki i sa « Papa ki gen bokou mizérikòrd ké Bondjé tout konsolasyon-an » (2 Cor. 1:3). w23.11 9-10 § 8-10.

Tout disip Kris divèt savé ki yé pouvé jwenn éprèv. Sonjé sa ki rivé Pòl. I di krétyen-yan ki té Tésalonik : « Lò nou té koté zòt, nou té ka avèrti zòt ki nou té ké gen éprèv, é a sa ki fèt » (1 Thess. 3:4). É pou Korentyen-yan, i di : « Nou frè-ya, nou lé zòt savé ki plizyèr éprèv tonbé anlè nou [...] Nou té jis pè mouri » (2 Cor. 1:8 ; 11:23-27). Jòdla osi, krétyen-yan divèt savé ki yé pouvé jwenn éprèv (2 Tim. 3:12). Kou to ka mété to lafwa annan Jézi é to divini so disip, pitèt to zanmi ké to fanmi ké malmennen to. Ès to trapé problèm annan to travay paské to té lé rété onèt ? (Héb. 13:18). Ouben, ès gouvèrnman koté to ka rété-a éséyé baré to chimen paské to té ka palé di èspwar to gen-an ké ròt moun ? Pòl èspliké ki kèlkéswa éprèv nou ka jwenn, nou tchò divèt kontan. w23.12 10-11 § 9-10.

Jakòb sipòrté roun patché sitiasyon ki té difisil. Siméyon ké Lévi sali non yé fanmi ké non Jéova. Rachèl, madanm Jakòb, sa-la i té kontan tèlman mouri lò i akouché yé dézyèm pitit. É akoz di roun lafamin ki té rèd, Jakòb té blijé alé rété an Éjip, alòr ki i té déja byen vyé (Gen. 35:16-19 ; 37:28 ; 45:9-11, 28). Magré tout malò ki rivé Jakòb, i pa janmen pédi so lafwa, ni annan Jéova, ni annan promès i té fè. Jéova li menm byen montré li ki i té kontan li. Parèkzanp, i bay li roun patché bagaj. Réfléchi asou sa : Jakòb té divèt gen bokou rékonésans pou Jéova lò i rouwè Jozèf so pitit, alòr ki i té krè i té mouri dipi lontan ! Kou so lanmityé ké so Bondjé té fò, sa idé l’ tchenbé annan tout éprèv i jwenn (Gen. 30:43 ; 32:9, 10 ; 46:28-30). Si nou lanmityé ké Jéova fò, nou menm osi nou ké pouvé sipòrté nenpòrt ki problèm ki pouvé tonbé anlè nou. w23.04 15 § 6-7.

Psaume 23-a, a roun chanté koté David ka di ki i sir ki Jéova kontan li é ki i ké toujou pran swen di li. I ka palé di bagaj èspésyal i gen ant li ké so Bèrjé, Jéova. David té ka lésé Jéova gidé l’, sa té ka pèrmèt li santi so kò an sékirité, i té ka konté asou li konplètman. É i té savé ki Jéova té ké montré li so lanmou touléjou pannan tout so lavi. Poukisa i té sir di sa ? David té ka santi ki i pa té ka manké li anyen paské Jéova té toujou bay li sa i té bézwen. I té savé osi ki so Bondjé té sa so zanmi, é ki i té ka fè l’ plézi. A pou sa i té sir ki kèlkéswa sa ki té ké rivé l’ dimen, Jéova té ké kontinyé bay li tousa i té bézwen. I té sir ki Jéova té kontan l’ bokou, é sa lidé-a té pi fò pasé pyès bagaj ki té pouvé fè li enkyèt. É a sa ki fè l’ kontan toubonnman (Ps. 16:11). w24.01 29 § 12-13.

Dipi Dézyèm Lagèr mondyal-a, pèp Bondjé-a lib pou préché. Annan plizyèr péyi, roun patché moun anprann konnèt Jéova, é so sèrvitèr-ya ka préché asou tout latè-a. Jòdla osi, frè-ya ki annan Kolèj santral-a lé Jézi gidé yé. Yé lé ki sa yé ka di frè ké sò-ya fè, a sa Jéova ké Jézi ka pansé osi. Épi yé ka sèrvi rèsponsab sirkonskripsyon-yan ké ansyen-yan pou dirijé asanblé-ya. Frè-ya ki wen é ki ansyen, ké tout ròt ansyen-yan annan asanblé-ya osi, yé annan « lanmen drèt » Kris (Rév. 2:1). A vré, kou ansyen-yan pa parfè, détan yé ka tronpé yé kò. Moyiz ké Joziyé épi apot-ya osi tronpé yé kò détan (Nomb. 20:12 ; Jos. 9:14, 15 ; Rom. 3:23). Mé Kris ka byen gidé èsklav fidèl ké avizé-a ké ansyen-yan lèspri sen-an mété, é i ké kontinyé fè l’. Donk, nou pouvé fè frè-ya ki ka dirijé travay prédikasyon-an konfyans pas a yé Jéova ka sèrvi pou dirijé nou. w24.02 23-24 § 13-14.

Jòdla, nou pouvé fè Jéova plézi lò nou ka palé di li roun fason ki ka montré ki nou gen rékonésans é ki nou kontan l’ bokou. Lò nou ka préché, annou pa bliyé ki sa nou lé, a fè moun-yan vini òbò Jéova, idé yé rousanti sa nou menm nou ka rousanti pou nou Papa ki annan syèl-a (Jacq. 4:8). A pa ti kontan nou kontan ansényé moun-yan sa Labib ka di asou Jéova, parèkzanp asou so lanmou, so jistis, so sajès, so pwisans ké ròt bèl kalité i gen. Anplis di sa, nou ka louwé Jéova é nou ka fè l’ plézi lò nou ka fè tousa nou pouvé pou nou imité l’. Annan sa monn-an ki mové, moun-yan ka wè kouman nou ka fè é sa ka fè roun ran annan yé doumandé yé kò poukisa nou diféran (Mat. 5:14-16). Lò nou ka kontré ké sa moun-yan, nou gen lokazyon èspliké yé poukisa nou konsa. Sa-ya ki sensèr anvi vini òbò Jéova. Lò nou ka louwé nou Bondjé konsa, sa ka fè so tchò kontan bokou (1 Tim. 2:3, 4). w24.02 10 § 7.

Roun frè ki djòk ka idé annan asanblé-a, i ka fè éfòr pou i rété byen ké ròt-ya, i ka travay pou i gen sa i bézwen pou viv é pou bay so fanmi sa i bézwen osi. Donk, a pou i konnèt fè sèrten bagaj ki itil. Parèkzanp, anprann byen li ké ékri. Pou nou tchò kontan é pou nou rivé annan nou lavi, a pou nou pran tan li Labib épi réfléchi asou l’ chak jou (Ps. 1:1-3). Si to ka li Labib touléjou, to ké konprann fason Jéova ka pansé pi byen é sa ké idé to apliké tout konsèy i ka bay nou annan to lavi (Prov. 1:3, 4). Sa enpòrtan paské to frè ké sò-ya bézwen frè ki pouvé ansényé yé épi bay yé konsèy ki ka vini di Labib. Si to ka li byen, sa ké pèrmèt to vin vayan annan zafè fè diskour ké bay répons. Ni diskour to ké fè, ni répons to ké bay ké idé ròt-ya, é sa ké fè yé lafwa vin pi fò. A pou to éséyé vin pi vayan annan zafè ékri osi. Konsa, to ké pouvé marké déztrwa bagaj ki ké idé to fè to lafwa vin pi fò é sa to ké marké ké pitèt idé ròt-ya osi. w23.12 26-27 § 9-11.

Lò to pè, réfléchi asou sa Jéova ké fè dimen lò Satan pa ké la ankò. Pannan asanblé réjyonal 2014-a, nou wè annan roun démonstrasyon kouman roun papa ki té ka palé di sa nou té ké pouvé li annan 2 Timothée 3:1-5 si sa vèrsé-ya té ka palé di lavi-a annan paradi-a. Men sa nou té ké li : « Annan monn nouvo-a, a pa ti kontan nou ké kontan, paské moun-yan ké gadé pou yé konpanyen, yé ké kontan trézòr èspirityèl-ya, yé pa ké fè gran larjò, yé pa ké krè yé miyò pasé pyès moun, yé ké rèspèkté bagaj ki sakré, yé ké obéyi yé papa ké yé manman, yé pa ké engra, yé ké fidèl, yé ké kontan yé fanmi, yé ké rivé tonbé dakò ké yé konpanyen, yé ké toujou di bon bagaj asou ròt-ya, yé ké kontrolé yé kò, yé ké dous, yé ké kontan sa ki byen, yé ké sa dé moun nou ké pouvé fè konfyans, yé tèt pa ké rèd, yé pa ké gonflé yé lèstomak, yé ké pi kontan Bondjé pasé plézi, yé ké di yé kontan Bondjé é yé ké lé kouté l’. Maché ké sa kalité moun-yan. » Ès sa ka rivé to di palé di kouman lavi-a ké fika annan monn nouvo-a ké to fanmi ouben ké to zanmi ? w24.01 6 § 13-14.

Lò nou ka sonjé ki Jéova kontan tout so sèrvitèr, sa ka rasiré nou ! Labib ka di : « Jéova kontan so pèp » (Ps. 149:4). Mé détan, roun ran tèlman dékourajé ki yé ka doumandé yé kò : « É mo menm, ès Jéova kontan mo ? » Tan-lontan, plizyèr sèrvitèr Jéova ki té fidèl doumandé yé kò menm bagaj-a (1 Sam. 1:6-10 ; Job 29:2, 4 ; Ps. 51:11). Labib ka byen montré ki menmsi nou pa parfè, nou pouvé fè Bondjé plézi. Kisa nou divèt fè ? Nou divèt montré ki nou gen lafwa annan Jézi épi batizé (Jean 3:16). Lò nou ka batizé, nou ka montré tout moun ki nou répanti di nou péché é ki nou promèt Bondjé fè so volonté (Actes 2:38 ; 3:19). Jéova kontan toubonnman lò i ka wè nou fè sa bagaj-ya pou nou divini so zanmi. Tout tan nou ka fè tousa nou pouvé pou nou tchenbé nou promès, i kontan nou é i ka pèrmèt nou sa so zanmi (Ps. 25:14). w24.03 26 § 1-2.

Nou pouvé imité disip-ya annan 1^é syèk-a si nou ka kontinyé préché menm lò gouvèrnman-an koté nou fika ka défann nou fè l’. Nou pouvé sir ki Jéova ké idé nou préché, é a pa pou nou pè doumandé li bay nou kouraj ké sajès épi doumandé li idé nou tchenbé lò nou annan problèm. Roun patché annan nou ka soufri paské nou malad ouben akoz di sa nou ka rousanti annan nou tchò, paské nou pédi roun moun nou kontan, nou gen problèm annan nou fanmi, akoz di pèrsékisyon-an, ouben ròt problèm ankò. É anplis di sa, pandémi ké lagèr ka fè ki sa ankò pi difisil pou sipòrté sa problèm-yan. Kisa to pouvé fè atò ? Louvri to tchò pou Jéova, di li annan ki sitiasyon to fika, kou to té ké fè l’ ké roun zanmi. É to pouvé sir ki Jéova « ké idé to » (Ps. 37:3, 5). Si nou ka kontinyé priyè, sa ké idé nou « tchenbé rèd annan éprèv-ya » (Rom. 12:12). Jéova savé anba ki problèm so sèrvitèr-ya ka pasé ; « i ka tandé lò yé ka doumandé l’ idé yé » (Ps. 145:18, 19). w23.05 5-6 § 12-15.

Lò nou gen roun désizyon enpòrtan pou nou pran, nou divèt « konprann kisa Jéova lé », épi tchenbé kont di sa (Éph. 5:17). Lò nou ka chaché ki prensip annan Labib ka alé ké nou sitiasyon, anfèt sa nou ka chaché, a sa Jéova ka pansé di sa. Apré sa, si nou ka swiv sa prensip-ya, nou ké gen plis chans pran bon désizyon. « Méchan »-an, nou lèlmi Satan, té ké lé nou tèlman okipé ka kouri dèyè bagaj sa monn-an ki nou pa gen tan pou sèrvi Bondjé ankò (1 Jean 5:19). Si i pa panga, roun krétyen pouvé mété soumaké, zafè fè gran lékòl ouben so travay, anvan tousa i pouvé fè pou adoré Jéova. A vré, sa bagaj-ya pa mové, mé a pa sa ki divèt pi enpòrtan pou nou. Si roun krétyen té ka mété sa bagaj-ya an prémyé annan so lavi, sa té ké montré ki i ka lésé fason moun-yan ka réfléchi détenn asou li. w24.03 24 § 16-17.