Tiurai

I roto i te au mea ta Iesu i tuatua e i rave, kapiti mai tana au semeio, kua akaari apa kore aia i te manako e te ngakau o tona Metua. (Ioa. 14:9) Eaa te apiianga mei ta Iesu au semeio? Akaperepere tikai a Iesu e tona Metua ia tatou. Iaia i te enua nei, kua akaari e kua akaperepere tikai a Iesu i te tangata na roto i tona mana semeio i te akamaru i to ratou mamae. I tetai atianga, kua kapiki maata te nga tangata matapo kiaia no te tauturu. (Mata. 20:​30-34) Kua “aroa aturā” a Iesu ia raua e kua akaora atura i te nga tangata. I konei, te tuatua Ereni tei uriia e “aroa aturā” te aiteanga e ngakau aroa oonu no roto roa. Kua riro te reira akairo o te aroa, ei akakeu tikai ia Iesu kia angai i te aronga matepongi e kia akaora i te tangata repera. (Mata. 15:32; Mare. 1:41) Papu ia tatou e kua akaperepere tikai a Iehova, te Atua “ngakau aroa,” e tana Tamaiti ia tatou e te tangi maira i to tatou mamae. (Luka 1:78; 1 Pete. 5:7) Kua inangaro raua i te takore i te au manamanata o te au tangata! w23.04 3 ¶4-5

Auraka e tatau e e akarongo ki te au manako tarevake tei matauia i teianei ao i roto i ta Satani akatereanga. Ka akamanako tatou i te au manako meitaki na te tatau anga e te apii anga i te Pipiria. Na te aere anga ki te au uipaanga e te tutu aere ka paruru te reira i to tatou manako. E kua taputou mai a Iehova e kare rava aia e vaoo ia tatou kia timata kinoia. (1 Kori. 10:​12, 13) Ka anoanoia tatou tataki tai kia pure kia vai tiratiratu kia Iehova i teia au rā openga e te ngatā. Ka inangaro a Iehova kia ‘riringi i to tatou ngakau ki mua iaia’ na roto i te pure. (Sala. 62:8) E akapaapaa ia Iehova ma te akameitaki iaia no te au mea tana i rave. E pati tauturu kiaia kia rauka te ngakau toa no te tutu aere. E pati akatenga no te tauturu kia akakoromaki i te au manamanata e te patoi i tetai ua atu timata anga. Auraka e tuku i tetai apinga me kore tangata kia tāpū i taau pure putuputu kia Iehova. w23.05 7 ¶17-18

Eaa tatou i aere ei ki te uipaanga? Kia akapaapaa ia Iehova. (Sala. 26:12; 111:1) Aere katoa tatou ki te uipaanga no te akapumaana i tetai e tetai i te au tuatau taitaia tikai. (1 Tesa. 5:11) Me tāki i to tatou rima kia paupau, te akatupu nei tatou i teia nga akakoroanga. Me paupau ra, penei ka ngatā ia tatou te reira. Ka taitaia tatou i te paupau, me kore te inangaro tikai ra tatou i te pau inara kare tatou e iki putuputuia ana. Eaa ta tatou ka rave me tupu teia? Akakite maira a Paulo e kia akamou tatou i te manako kia “akamaroiroi.” Me kite mai tatou e ka akamaroiroiia tetai i roto i te uipaanga e toou irinakianga, ka inangaro ua tatou i te paupau. Me kare tatou e iki putuputuia ana, ka mataora ua tatou e kua rauka i tetai pae i roto i te putuputuanga i te paupau.—1 Pete. 3:8. w23.04 20 ¶1-3

Kua tukunaia mai tetai akakite anga! Ko te ngati Iuda tei riro mai ei au tuikaa i Babulonia no tetai 70 mataiti, ka oki ratou ki to ratou enua, ki Iseraela. (Ezera 1:​2-4) Kua rauka ia Iehova i te akatupu i teia. No te mea kare a Babulonia e tuku ana i tona au tuikaa kia aere ua. (Isa. 14:​4, 17) Inara kua uritumuia a Babulonia, e kua akakite te tutara ou ki te ngati Iuda e ka akaruke ratou. Te au pu ngutuare ngati Iuda e ikianga ta ratou ka rave: me ka akaruke me ka noo ua ki Babulonia. Penei kare taua ikianga i te mea māmā ua. Penei kua ruaine tetai papaki no te aere anga. E te maataanga o te ngati Iuda kua anauia ki Babulonia. Kua manako ratou e enua a Iseraela no to ratou ui tupuna. Kua puapingaia tetai au ngati Iuda i Babulonia, e e ngatā ia ratou i te akaruke i to ratou kainga e te pitiniti i te oki atu ki te enua kare ratou i mātau. w23.05 14 ¶1-2

Te akamaroiroi maira te Tuatua a te Atua kia maroiroi ua atu tatou i te akakoromaki, te tangi aroa, e te aroa. Karanga a Luka 21:19 e: “E ora ra kotou kia mou tamou marie.” Akakite a Kolosa 3:12 e: “E tenana, ka akangakau aroa ua.” Karanga a 1 Tesalonia 4:​9, 10 e: “Kua apiiia kotou uaorai e te Atua i te aroa ia kotou uaorai. . . . Te ako atu nei ra matou kia kotou, e te au taeake, kia maata ua atu rai.” Kua akakiteia teia au irava ki te au pipi tei akakoromaki, tangi aroa, e te aroa. Inara, kua anoanoia ratou kia akatupu i teia au tu. Kia pera rai tatou. Ei tauturu ia koe, ka akamanako e akapeea te au Kerititiano mua te akaari anga i teia au tu. E oti e akara akapeea koe me aru i te au pipi e kia vai teateamamao no te mate maata. Me tupu te mate maata, ka kite i reira koe akapeea me akakoromaki ua atu. w23.07 3 ¶4, 8

Me no te aronga akatainuia me no te “mamoe ke atu” tatou, ka noo tamou tatou ki runga i “te Arataa Tapu” te ka arataki ia tatou na roto i te parataito pae vaerua ki te au akameitakianga o te Patireia no te tuatau ki mua. (Ioa. 10:16) Mei te 1919 T.N., e mirioni ua atu tane, vaine, e te tamariki tei akaruke ia Babulonia Maata, te au akonoanga pikikaa o teianei ao, e kua aere na runga i taua mataara. Ko te au ngati Iuda tei akaruke ia Babulonia, kua akaatea a Iehova i te au mea te ka arairai i to ratou arataa. (Isa. 57:14) Akapeea ra “te Arataa Tapu” o teia tuatau? E anere tuma mataiti e tae ua atu ki te 1919, kua tuku a Iehova i te au tangata mataku Atua kia tauturu i te tangata kia akaatea mai mei ia Babulonia Maata. (Akaaite ia Isaia 40:3.) Kua rave ratou i te angaanga teateamamao—te angaanga mataara pae vaerua—kia rauka i te aronga ngakau tika i te akaruke ia Babulonia Maata e kia tomo ki roto i te parataito pae vaerua, te ngai kua akaokiia mai te akamorianga mou a Iehova. w23.05 15-16 ¶8-9

Inangaro a Iehova kia akamori tatou iaia ma te mataora e te puareinga ua. (2 Kori. 9:7) Ka tauta ainei tatou te itae i te akakoroanga pae vaerua noatu kare tatou e inangaro ana i te rave i te reira? Akamanako ana i te akaraanga o te apotetoro ko Paulo. Karanga aia: “Te moto nei ra au i taku kopapa kia vi: ko te riro ua aea oki au.” (1 Kori. 9:​25-27) Kua akakeu pakari a Paulo iaia uaorai kia rave i te mea tika noatu kare aia i inangaro ana. Kua āriki ainei a Iehova i ta Paulo angaanga? Ae! E kua tutaki a Iehova i tana tautaanga. (2 Timo. 4:​7, 8) Mataora katoa a Iehova te kite ia tatou e itae ra i to tatou akakoroanga noatu kare tatou i akakeuia. Mataora aia no te mea kua kite aia e noatu kare tatou e inangaro roa ana i te rave i taua angaanga, te rave ra tatou no te akaperepere iaia. Kua akameitaki a Iehova ia Paulo, ka akameitaki rai Aia ia tatou. (Sala. 126:5) Me kite tatou i ta Iehova akameitakianga, penei ka akakeu katoaia tatou. w23.05 29 ¶9-10

Kua akaaite a Paulo i te aronga kare e ora i to Iehova rā ki te aronga kua varea e te moe. Kare ratou e kite ana i te ora e aere ua ra. E kare ratou e kite i te au tupuanga puapinga e kia ariu atu ki te reira. E maata te tangata i teia tuatau kua varea e te moe i te pae vaerua. (Roma 11:8) Kare ratou e kite ana e te noo nei tatou i “te au rā openga” e te aere maira te mate maata. (2 Pete. 3:​3, 4) Inara, kua kite tatou e te rapurapu nei teia rā e kia vai ara ua tatou. (1 Tesa. 5:6) No reira e noo maru e kia papu tatou. Eaa ra? Kia kore tatou e o ki roto i te au manamanata o te tangata e te poritiki. Ka maroia tatou kia iki i tetai tua me vaitata mai to Iehova rā. Noatu ra, kare tatou e taitaia akapeea tatou me ariu atu. Ka tauturu to te Atua vaerua ia tatou kia noo maru ma te manako papu kia rauka te au ikianga pakari.—Luka 12:​11, 12. w23.06 10 ¶6-7

Eaa taau ka manako me rongo koe i te ingoa o Samasona? Penei e tumutoa. Ae. Inara kua iki a Samasona i te ikianga tei akatupu i te kino. Noatu ra, kua akamanako a Iehova i to Samasona tu tiratiratu, e kua tata i te reira i roto i tana Pipiria. Kua taangaanga a Iehova ia Samasona kia tauturu i Tona iti tangata ia Iseraela. E anere ua atu mataiti i te mate anga a Samasona, kua akakeu a Iehova ia Paulo kia tata i to Samasona ingoa e koia tetai tangata akarongo. (Ebe. 11:​32-34) Riro to Samasona akaraanga ei akamaroiroi ia tatou. Kua irinaki aia kia Iehova, noatu te au turanga ngatā. Ka akamanako tatou i te au akamaroiroi anga e te au apiianga tau mei tona akaraanga. w23.09 2 ¶1-2

Ka akamatutu tatou i to tatou tu akakoromaki na te akakite anga i to tatou manamanata kia Iehova na roto i te pure. (1 Tesa. 5:17) Penei kare koe e akakoromaki ra i tetai manamanata i teia taime. Noatu ra, te kimi ra ainei koe i ta Iehova arataki anga, me riri koe, me manako tau kore, e me manamanataia? Me pati tauturu putuputu koe i teianei ki te Atua no toou au manamanata i te au ra, kare koe e tapupu me tupu ake te au manamanata maata. Kua papu ia koe e kua kite te Atua aea e akapeea aia me tauturu ia koe. (Sala. 27:​1, 3) Ka rauka ia tatou te akakoromaki i te mate maata e aere maira me akakoromaki tatou i te au manamanata i teianei. (Roma 5:3) Eaa ra? E maata te au taeake tei akakoromaki i tetai timata anga o te akarongo kua rauka ia ratou te akakoromaki i te ka aru mai. Kua akamatutu te tu akakoromaki ia ratou, matutu atura to ratou akarongo e kua papa ua a Iehova i te tauturu ia ratou. E kua tauturu te akarongo ia ratou kia akakoromaki i tetai akaou manamanata.—Iako. 1:​2-4. w23.07 3 ¶7-8

No to Iehova tu akaaka e te tangi aroa i akakeu iaia kia akaari mai i te manako maru. Ei akaraanga, kua akaari mai a Iehova i tona tu akaaka i mua ake ka takore ei aia i te au tangata kino o Sodoma. Na roto i tana au angera, kua akaue a Iehova i te tangata tuatua tika ko Lota kia oro ki te maunga. Mataku a Lota i te oro ki reira. No reira kua pati aia e kia akatikaia aia e tona ngutuare kia oro atu ki Zoara, e oire meangiti ua te ka takoreia. Tano tikai ka maro atu a Iehova kia aru a Lota i tana i akaue atu. Inara, kua ariki aia i ta Lota patianga, e kare i takore atu ia Zoara. (Gene. 19:​18-22) Anere mataiti i muri mai, kua akaari a Iehova i te tangi aroa ki te iti tangata Nineve. Kua tono atu aia i te peroveta ia Iona kia akakite ki te au tangata kino o Nineve e ka takoreia ratou e to ratou oire. Inara te tataraara anga te au tangata o Nineve, kua tangi tikai a Iehova ia ratou e kua akaora atu i taua oire.—Iona 3:​1, 10; 4:​10, 11. w23.07 21 ¶5

Eaa ta tatou ka apii mai mei te akaraanga o Ioasa? Kua aite aia mei tetai tumu rakau ma te au aka paruparu e kua anoanoia tetai rakau toko. Te takake anga atu te rakau toko—ko Iehoiada—e kua pupui mai te matangi o te akarongo pikikaa, kua inga a Ioasa ki raro. Te akatutu ririnui maira teia e kare to tatou mataku i te Atua e irinaki ua ki runga i te au taeake Kerititiano memeitaki, pera te kopu tangata. Kia vai tiratiratu ma te maroiroi, ka akamatutu tatou i te akono i te Atua anake ma te mataku na roto i te apii, te akamanako oonu, e te pure putuputu. (Iere. 17:​7, 8; Kolo. 2:​6, 7) Kare a Iehova e pati mārō mai ana ia tatou. Kua akakiteia tana e umuumu maira ia Koheleta 12:​13, te karanga ra: “Ko te Atua te mataku atu, e akono oki i tana au akauenga: ko ta te tangata katoa ïa e pini ua ake.” Me mataku tatou i te Atua, ka rauka ia tatou te akakoromaki i te au timata anga a te tuatau ki mua e kia tu ngaueue kore. Kare e apinga e takino i to tatou pirianga oa kia Iehova. w23.06 19 ¶17-19

Akamata te taputou a te Atua na te karanga anga: “Kua tuatua maira tei noo ki runga i te terono ra.” (Apo. 21:5a) E au tuatua puapinga teia no te mea i roto i te puka o Apokalupo, e toru atianga i tuatua ai a Iehova na roto i te orama. Kare e na tetai angera ririnui me kore na Iesu tei akatuia mai, i oronga mai i teia akapapuanga, mari ra na Iehova! Akakite mai teia i te tika o te au tuatua tei aru mai. Eaa ra? No te mea no ko mai ïa ia Iehova “tei kore e tika kia pikikaa.” (Tito 1:2) Te akapapu maira teia e e mea mou tikai te au tuatua ta tatou ka tatau ia Apokalupo 21:​5, 6. Akamanako ana i te tuatua, “I na.” E taangaanga putuputuia ana te tuatua Ereni “i na” i roto i te puka o Apokalupo. Eaa tei aru mai? Akakite te Atua: “Te akariro nei au i te au mea ravarai ei mea ou.” Te tuatua nei a Iehova no runga i te ka tupu a te tuatau ki mua, inara e mea papu tikai teia taputou e mei te mea e te tuatua nei aia kua tupu takere te reira.—Isa. 46:10. w23.11 3-4 ¶7-8

Kua tupu te tu paruparu ki te apotetoro ko Petero. Akamanako ana i teia akaraanga. I te akamārama anga a Iesu e ka mamae aia e ka mate i te akatupu anga i te au totou Pipiria, kua ako atu a Petero iaia. (Mare. 8:​31-33) Ma te putuputu, kua tauetono a Petero e te au apotetoro i tei maata atu ia ratou. (Mare. 9:​33, 34) I te po i mua ake i to Iesu matenga, kua tipu a Petero i te taringa o tetai tavini. (Ioa. 18:10) I te reira po, kua mataku a Petero e e toru taime kua pikikaa aia i te kite anga i tona oa ko Iesu. (Mare. 14:​66-72) Kua aue maata atura a Petero. Kare a Iesu i akaruke ana i tana apotetoro taitaia. I te akatuakaouia anga a Iesu, kua rauka ia Petero te atianga kia aroa pu ua ia Iesu. Kua pati a Iesu ia Petero kia tiaki i tana mamoe ma te akaaka. (Ioa. 21:​15-17) Kua ariu ua a Petero. Tei Ierusalema aia i te rā Penetekote ma te aronga mua tei akatainuia e te vaerua tapu. w23.09 22 ¶6-7

“Ka angai i te anana a te Atua,” i akamaroiroi ei te apotetoro ko Petero i te aronga pakari. (1 Pete. 5:​1-4) Me e tangata pakari koe, kite matou e te akaperepere ra koe i toou au taeake e te au tuaine e te akono ua ia ratou. I tetai taime ka manako koe e maata roa taau angaanga e kua roiroi koe. Eaa taau ka rave? E akakite i toou manako kia Iehova. Tata a Petero: “Kia tuatua tetai tangata ra, kia tau ïa i te tuatua a te Atua.” (1 Pete. 4:11) Te tupu ra te manamanata ki toou au taeake e te au tuaine kare e rauka i te akatikatikaia i teia akatereanga. E akamaara ka rauka ua i “te tiaki maata,” ko Iesu Karaiti te tauturu ia ratou. I teianei e i te ao ou. Te pati maira te Atua i te aronga pakari kia akaperepere i to ratou au taeake, kia akono ia ratou e kia riro ei ‘akaraanga ki te mamoe.’ w23.09 29-30 ¶13-14

Kia matakite tatou auraka kia aru i te au manako tangata. Me aru tatou i te manako o te tangata, penei ka akamata katoa tatou i te kopae ia Iehova e tana au ture. (1 Kori. 3:19) “Te pakari oki o teianei ao” te akakeu maata ra i te anoano o te kopapa. Kua ariki tetai au Kerititiano i Peregamo e Tuatira i te manako tau kore o te au tangata o taua nga oire e kua akamori i te au itoro. Kua tuku atu a Iesu i te akoanga pakari ki te nga putuputuanga te akatika ua ra i te ainga tau kore. (Apo. 2:​14, 20) Teia tuatau, te tupu nei te taomianga kia tatou kia aru i te au manako tarevake. Penei ka maro mai to tatou ngutuare e te au oa ia tatou kia aati i ta Iehova au ture. Ei akaraanga, penei ka karanga mai ratou e kare i te mea kino me aru ua i to tatou anoano e e mea taito te au apiianga a te Pipiria. Tetai au taime, ka manako tatou e kare e taka roa ana ta Iehova au akakiteanga i orongaia mai kia tatou. Penei ka akakeuia tatou “kia rai to [tatou] manako i te tangata nei i tei tataia ra.”—1 Kori. 4:6. w23.07 16 ¶10-11

Kua inangaro a Maria, te metua vaine o Iesu, i te maroiroi kia rave i to Iehova anoano. Kare aia i akaipoipo ake; inara, ka nui aia. Kare ona kite i te utuutu tamariki, inara ka akono aia i te tama te ka riro mai ko te Mesia. E no te mea kare aia i piri ana ki te tane, akapeea a Maria me akamārama i tona turanga kia Iosepha? (Luka 1:​26-33) Akapeea i rauka ai ia Maria te maroiroi? Kua kimi aia i te tauturu a tetai ke. Ei akaraanga, kua pati aia ia Gaberiela kia oronga mai i te au akakiteanga no teia angaanga. (Luka 1:34) Kare i roa i muri mai, kua aere atu aia ki “te pae enua maunga” o Iuda i te atoro i tona kopu tangata ko Elizabeta. Kua akameitaki a Elizabeta ia Maria e kua akauruia e Iehova kia totou no te pepe i roto i te kopu o Maria. (Luka 1:​39-45) Karanga a Maria e “kua akakite [a Iehova] i te marōrō o tona rima.” (Luka 1:​46-51) Na roto ia Gaberiela e Elizabeta, kua akamaroiroi a Iehova ia Maria. w23.10 14-15 ¶10-12

E iti ua te numero o te au pipi a Karaiti tei akatainuia ki te vaerua tapu e e pirianga takake to ratou kia Iehova. Ko ratou te 144,000 te ka tavini ei kau taunga ma Iesu i te rangi. (Apo. 14:1) Te akatutu maira te Ngai Tapu o te tapenakara i to ratou akatainuia anga ki te vaerua ei tamariki na te Atua i te enua nei. (Roma 8:​15-17) Te akatutu maira te Ngai Tapu Roa Atu o te tapenakara i te rangi, te ngai e noo ra a Iehova. “Te paruru” tei akatakake i te Ngai Tapu mei te Ngai Tapu Roa Atu, te akatutu maira i to Iesu kopapa tangata tei arai iaia mei te aere anga ki te rangi ei Taunga Maata no te iero pae vaerua. Na te akaatinga anga i tona kopapa tangata no te tangata ravarai, kua akatuera a Iesu i te mataara no te oraanga i te rangi no te au Kerititiano akatainuia. Ka anoano katoaia ratou kia akakore i to ratou kopapa tangata kia rauka ta ratou tutaki i te rangi.—Ebe. 10:​19, 20; 1 Kori. 15:50. w23.10 28 ¶13

Kua ariu maru ua a Gideona te akaapa anga te au tangata o Epheraima iaia. (Aka. 8:​1-3) Kare aia i pau riri ana kia ratou. Kua akaari aia i te tu akaaka na te akarongo anga i to ratou manamanata, e kua akatikatika maru atu i te reira. No reira ka aru te aronga pakari i to Gideona tu na te akarongo meitaki anga e kia ariu maru ua me akaapaia mai. (Iako. 3:13) No reira ka akatupu ratou i te ʼau i roto i te putuputuanga. Te akapaapaa anga te tangata ia Gideona te autu anga i rungao ia Midiana, kua akamou aia ki runga ia Iehova. (Aka. 8:​22, 23) Akapeea te aronga pakari me aru i to Gideona tu? Na te akapaapaa anga ia Iehova no ta ratou i rave. (1 Kori. 4:​6, 7) Ei akaraanga, me akameitakiia tetai tangata pakari no te tu o tana apiianga, e akapaapaa aia i te tumu o te apiianga, te Tuatua a te Atua, me kore ki te tereni anga na roto mai i ta Iehova akaaerenga. Kia akamanako rai te aronga pakari e me te akapaapaa ra ratou ia ratou uaorai. w23.06 4 ¶7-8

Me kare i pauia mai ta tatou i pure ana, e ui tatou kia tatou uaorai, ‘Kua tano ainei taku e pure ra?’ I te maataanga o te taime, ka manako tatou e kua kite tatou i te meitaki no tatou. Inara kare tatou e puapingaia mei te reira. Me pure tatou no tetai manamanata, penei e ravenga meitaki atu tetai i ta tatou i pure. Penei kare ta tatou pure i tau ki to Iehova anoano. (1 Ioa. 5:14) Akamanako ana i te akaraanga o te nga metua tei pati kia Iehova kia noo ta raua tamaiti i roto i te tuatua mou. Akara anga, e patianga meitaki te reira. Inara, kare a Iehova e māro ia tatou kia tavini iaia. Inangaro aia ia tatou e ta tatou tamariki kia iki i te akamori iaia. (Deu. 10:​12, 13; 30:​19, 20) No reira ka anoanoia te nga metua kia pati ia Iehova kia tauturu ia raua kia itae i te ngakau o ta raua tamaiti e te akakeu iaia kia akaperepere ia Iehova e kia riro ei oa Nona.—Mase. 22:6; Ephe. 6:4. w23.11 21 ¶5; 23 ¶12

Eaa i riro ei te akapumaana anga ei akairo no te aroa? Karanga tetai tataanga Pipiria e ko te tuatua “akapumaana” ta Paulo i taiku, te aiteanga “ko te tu anga i te pae i tetai tangata kia akamaroiroi iaia me rokoia aia e te timataanga.” No reira, me akapumaanaia tetai ka tauturu tatou i te taeake taitaia kia tu e kia aere ua atu na runga i te mataara ki te ora. I te au taime ravarai me akamaroiroi tatou i tetai taeake e tetai tuaine, te akaperepere ra tatou ia ratou. (2 Kori. 7:​6, 7, 13) E pirianga vaitata to te aroa e te akapumaana. I teea tu? Ka akakeuia te tangata aroa kia akapumaana e kia tauturu i tetai. Te mea mua, ka tangi aroa tatou e oti ka akapumaana iaia. Akaari maira a Paulo i to Iehova aroa na te akapumaana anga i te tangata. Akakite mai aia e ko Iehova “te Metua o to tatou Atu ra o Iesu Mesia, te tumu o te aroa, e ko te Atua nona anake te pumaana.”—2 Kori. 1:3. w23.11 9-10 ¶8-10

Ka rokoia ta Iesu au pipi katoatoa e te tumatetenga. Akamanako ana i te akaraanga o te apotetoro ko Paulo. Karanga aia ki te au taeake i Tesalonia: “Ia matou oki i noo ia kotou na, kua akakite atea ua matou ia kotou, e e rokoia matou e te tumatetenga.” (1 Tesa. 3:4) E kua tata aia ki to Korinetia: “Kare oki matou i inangaro, e te au taeake, e kia kore kotou e kite i to matou mate . . . E kare rava matou i manako e e ora.” (2 Kori. 1:8; 11:​23-27) Ka tupu rai te tumatetenga ki te au Kerititiano i teia tuatau. (2 Timo. 3:12) Ia koe e aru ra ia Iesu, ka akakino mai te au oa me kore te kopu tangata ia koe. Kua rokoia ainei koe e te manamanata i te ngai angaanga no toou tu tika? (Ebe. 13:18) Kua patoiia ainei koe e te kavamani no taau angaanga tutu aere? Noatu eaa te tumatetenga taau i na roto ana, karanga a Paulo kia rekareka tatou. w23.12 10-11 ¶9-10

Kua akakoromaki a Iakoba i te au manamanata tukeke. E rua tamaroa a Iakoba, ko Simeona e Levi, kua apai mai i te kino ki te kopu tangata e ki to Iehova ingoa. E tetai katoa, kua mate te vaine akaperepere a Iakoba, ko Rahela, iaia e anau ra i te rua o ta raua tamaiti. No te pakari o te onge, kua neke atu a Iakoba ki te enua o Aiphiti i tona ruaine anga. (Gene. 35:​16-19; 37:28; 45:​9-11, 28) Noatu teia au tupuanga, kua irinaki ua rai a Iakoba kia Iehova e Tana au taputou katoa. Aru mai, kua akaari a Iehova kia Iakoba Tona marekaanga. Ei akaraanga, kua akameitaki ua a Iehova ia Iakoba i te pae kopapa. E kua mataora a Iakoba ia Iehova i te kite akaou anga aia ia Iosepha—tana i manako ana e kua mate! Kua akariro to Iakoba pirianga oa kia Iehova kia akakoromaki aia i tona au manamanata tukeke. (Gene. 30:43; 32:​9, 10; 46:​28-30) Me piri vaitata tatou kia Iehova, ka autu tatou i te au manamanata. w23.04 15 ¶6-7

E imene a Salamo 23 tei akakite mai i to Iehova aroa e te takinga meitaki. Kua akamārama te tata o teia salamo ko Davida i tona pirianga vaitata ki tona Tiaki ko Iehova. Kua aratakiia a Davida e Iehova, e kua irinaki papu aia Iaia. Kua kite a Davida e ka vai ua rai to Iehova aroa nona. Eaa aia i papu ei? Kua kite meitaki a Davida i ta Iehova akono anga iaia. Kua mataora katoa a Davida i to Iehova pirianga oa. Kua papu iaia e noatu eaa te ka tupu kiaia a te tuatau ki mua, ka akono ua rai a Iehova i tona au anoano. No to Davida irinaki ki to Iehova aroa nona, kua tauturu te reira iaia kia kore e taitaia e kia mataora ua.—Sala. 16:11. w24.01 29 ¶12-13

Mei te Tamaki II o te Ao, kua kite te iti tangata o Iehova i te ’au e kua rave ua ratou i te angaanga tutu aere. Tei tupu mai, kua totoa te angaanga e kua āriki te tangata i te tuatua mou. I teia tuatau, te akara nei rai te au taeake o te Pupu Akaaere kia Iesu no te aratakianga. Ka oronga ratou i te au aratakianga no ko mai ia Iehova. Na roto i te au akaaere kotinga e te aronga pakari ka orongaia te arataki anga ki te au putuputuanga. Te mou nei a Iesu i te aronga pakari akatainuia i roto i tona “rima katau.” (Apo. 2:1) E tika ka tarevake te aronga pakari no te mea e aronga apa ua ratou. Kua tupu teia kia Mose e Iosua e pera katoa ki te au apotetoro. (Nume. 20:12; Iosu. 9:​14, 15; Roma 3:23) Noatu ra, te arataki ra a Iesu i te tavini akono meitaki e te aronga pakari, e ka rave ua atu aia i te reira. E tumu meitaki ta tatou kia irinaki i tana aratakianga na roto i te au taeake tana i iki. w24.02 23-24 ¶13-14

I teia rā, ka akamareka tatou ia Iehova na te tuatua anga no runga iaia ma te maanaana, takinga meitaki e te aroa. Me tutu aere tatou, ka akamanako tatou i te akakoroanga, koia oki kia tauturu i te tangata kia akavaitata kia Iehova, e kia kite iaia ei Metua akaperepere no ratou. (Iako. 4:8) Ka mareka tatou i te akaari mei roto i te Pipiria i to Iehova tu aroa, tuatua tau, pakari, mana e tetai atu au tu manea. Ka akapaapaa e ka akamareka katoa tatou ia Iehova na te aru anga i tona tu. Me rave tatou i te reira, ka tuke tatou mei teia ao kino. Ka kite mai te tangata e ka manako eaa ra te tumu. (Mata. 5:​14-16) Ia tatou e piri ra kia ratou i te au rā, penei ka rauka ia tatou i te akamārama i te tumu. Tei tupu, ka akavaitata mai te aronga ngakau tae ki to tatou Atua. Me akapaapaa tatou ia Iehova na roto i teia au mataara, ka rekareka aia.—1 Timo. 2:​3, 4. w24.02 10 ¶7

Kia riro mai ei Kerititiano tukatau, ka anoanoia te au tu kite karape. Ka tauturu tera ia koe kia akono i te au apainga i roto i te putuputuanga, te kimi i te ngai angaanga ei akono ia koe e toou ngutuare, e te akatupu i te pirianga meitaki ki tetai ke. Ei akaraanga, apii i te tatau e te tata meitaki. Karanga te Pipiria e ka mataora te tangata tei akapou i tona taime i te au rā no te tatau e te akamanako i te Tuatua a te Atua. (Sala. 1:​1-3) Me tatau koe i te Pipiria i te au rā, ka kite koe i to Iehova manako, ka tauturu te reira ia koe kia akamanako meitaki e kia taangaanga i te au irava. (Mase. 1:​3, 4) Ka akara te au taeake e te au tuaine ki te au tane tukatau no te aratakianga e te apiianga a te Pipiria. Me kite koe i te tatau e te tata meitaki, ka rauka ia koe i te akapapa i te au akoanga e te au pauanga te ka akamaroiroi i te au taeake. Ka rauka katoa ia koe te tata i te au manako puapinga te ka tauturu ia koe kia akamatutu i toou akarongo e kia akamaroiroi i toou au taeake. w23.12 26-27 ¶9-11

Me mataku koe, e akamanako ana i ta Iehova ka rave a te tuatau ki mua me takoreia a Satani. I te mataiti 2014, kua akatutu mai te porokaramu o te uruoaanga tapere akapeea tetai metua tane te uriurianga ki tona pamiri akapeea te irava ia 2 Timoteo 3:​1-5 me tauiia ki te turanga meitaki i roto i te Parataito. Karanga aia: “I roto i te ao ou ka tupu te mataora. Ka riro te tangata ei akaperepere i tetai ke, ei anoano i te au mea pae vaerua, ei tau, ei akaaka, ei akapaapaa i te Atua, ei akarongo ki te metua, ei mareka ua, ei tiratiratu, ei akaperepere i te ngutuare tangata, ei akono i te koreromotu, ei akapaapaa i te aronga memeitaki, te akono meitaki, te maru, ei anoano i te meitaki, ei irinakiia, ei kauraro marie, ei akaaka, ei akono i te Atua kare i te au mea navenave e ei aroa i te Atua; e ariu koe ki taua aronga ra.” E uriuri ana ainei koe ki toou pamiri me kore te au taeake mei teaa rai te tu o te oraanga i te ao ou? w24.01 6 ¶13-14

E mea pumaana i te kite e te mareka ra a Iehova i tona iti tangata! Karanga te Pipiria e: “Te tau [me kore te mareka] rā Iehova i tona tangata.” (Sala. 149:4) Inara i tetai taime ka manako ekoko tetai pae e ka ui, ‘Kua mareka ainei a Iehova iaku?’ Kua na roto ana tetai aronga akamori ia Iehova i te tuatau Pipiria i teia turanga taitaia. (1 Samu. 1:​6-10; Iobu 29:​2, 4; Sala. 51:11) Te akaari maira te Pipiria e ka rauka i te aronga apa ua i te akamareka ia Iehova. Akapeea? Kia akatupu tatou i te akarongo ki roto ia Iesu Mesia e kia papetito. (Ioa. 3:16) Ka akaari tatou ki te katoatoa e kua tataraara e kua taputou tatou ki te Atua kia rave i tona anoano. (Anga. 2:38; 3:19) Ka mareka a Iehova ia tatou me rave tatou i te au takainga kia riro mai ei oa piri vaitata nona. Me tauta tatou i te akono ua rai i ta tatou tia akatapuanga, ka mareka a Iehova ia tatou e ka riro tatou ei oa nona.—Sala. 25:14. w24.03 26 ¶1-2

Ka aru tatou i te akaraanga o te nga pipi na te tutu aere ua atu anga noatu me akaue mai te kavamani kia akamutu. Ka papu katoa ia tatou e ka tauturu a Iehova i ta tatou tutu aere. No reira e pure no te tu ngakau toa e te pakari. Pati tauturu kia Iehova kia akakoromaki i te manamanata. E manganui ia tatou e akakoromaki nei i te au manamanata i te pae kopapa e te manako ngakau, kua takake te akaperepere, tupu te ngutuare ngatā, tupu te takinokino, e te vai atura. E kua riro te au maki kino e te au tamaki ei akangatā atu i te reira. E riringi i toou ngakau kia Iehova. E akakite i toou turanga kiaia mei tetai oa piri mou. Kia pumaana ‘e na Iehova e tauturu ia koe.’ (Sala. 37:​3, 5) Na te aruaru anga i te pure ka rauka ia tatou te ‘akakoromaki i te manamanata.’ (Roma 12:12) Kua kite a Iehova i ta tona aronga akamori e akakoromaki ra—“ka akarongo mai aia i ta ratou kapiki.”—Sala. 145:​18, 19. w23.05 5-6 ¶12-15

Me rave tatou i te au ikianga, ka anoanoia tatou kia kite “i to te Atu ra anoano” e oti akono i te reira. (Ephe. 5:17) Me mārama tatou i te au kaveinga Pipiria tei tau ki to tatou turanga, te kimi ra tatou i to Iehova manako no runga i te reira. Me taangaanga tatou i tana kaveinga, ka meitaki atu ta tatou ikianga. Ka inangaro te “vaerua kino ra,” ko Satani ia tatou kia akapou i te tuatau no te au mea o teianei ao e kare e tuatau no Iehova. (1 Ioa. 5:19) Penei ka māmā ua i tetai Kerititiano kia inangaro maata i te moni, te aere ki te apii teitei e kia angaanga pakari e kare e tuatau no te tavini ia Iehova. Me tupu te reira, te akaari maira aia e kua aru aia i te aerenga manako o teianei ao. E tika, kare teia i te mea kino inara, auraka te reira kia riro e ko te mea mua i to tatou oraanga. w24.03 24 ¶16-17