ກໍລະກົດ
ວັນອັງຄານທີ 1 ກໍລະກົດ
ພະເຢຊູເດີນທາງໄປທຸກບ່ອນເພື່ອເຮັດສິ່ງດີໆແລະປົວຄົນ.—ກຈກ. 10:38
ທຸກຢ່າງທີ່ພະເຢຊູເວົ້າແລະເຮັດເຊິ່ງລວມເຖິງການອັດສະຈັນເຮັດໃຫ້ເຫັນວ່າພະເຢໂຫວາຄິດແລະຮູ້ສຶກແນວໃດ. (ຢຮ. 14:9) ເຮົາຮຽນຫຍັງຈາກການອັດສະຈັນຂອງພະເຢຊູ? ພະເຢຊູກັບພະເຢໂຫວາພໍ່ຂອງເພິ່ນຮັກເຮົາຫຼາຍ. ຕອນທີ່ພະເຢຊູຢູ່ໃນໂລກ ເພິ່ນສະແດງໃຫ້ເຫັນວ່າເພິ່ນຮັກຜູ້ຄົນຫຼາຍໂດຍເຮັດການອັດສະຈັນເພື່ອຊ່ວຍຄົນທີ່ມີຄວາມທຸກ. ມີເທື່ອໜຶ່ງ ມີຜູ້ຊາຍຕາບອດສອງຄົນມາຂໍໃຫ້ພະເຢຊູຊ່ວຍ. (ມທ. 20:30-34) ຄຳພີໄບເບິນບອກວ່າ ພະເຢຊູ “ຮູ້ສຶກອີ່ຕົນ.” ເພິ່ນກໍເລີຍປົວເຂົາເຈົ້າໃຫ້ເຊົາ. ຄຳກຣີກທີ່ແປວ່າ “ຮູ້ສຶກອີ່ຕົນ” ໃນຂໍ້ນີ້ສະແດງເຖິງຄວາມຮູ້ສຶກທີ່ເຫັນອົກເຫັນໃຈ ເຊິ່ງເປັນຄວາມຮູ້ສຶກທີ່ມາຈາກສ່ວນເລິກໆທີ່ຢູ່ພາຍໃນ. ຄວາມຮູ້ສຶກດຽວກັນນີ້ແຫຼະທີ່ເຮັດໃຫ້ພະເຢຊູລ້ຽງອາຫານຄົນທີ່ຫິວແລະປົວຜູ້ຊາຍຄົນໜຶ່ງທີ່ເປັນຂີ້ທູດ ເຊິ່ງສະແດງວ່າເພິ່ນຮັກເຂົາເຈົ້າຫຼາຍ. (ມທ. 15:32; ມຣກ. 1:41) ເລື່ອງນີ້ເຮັດໃຫ້ເຮົາຮູ້ວ່າພະເຢໂຫວາພະເຈົ້າທີ່ “ອີ່ດູສົງສານ” ແລະພະເຢຊູຮັກເຮົາຫຼາຍແທ້ໆແລະຮູ້ສຶກເຈັບປວດທຸກເທື່ອເມື່ອເຫັນເຮົາເຈິຄວາມທຸກລຳບາກ. (ລກ. 1:78; 1ປຕ. 5:7) ພວກເພິ່ນທັງສອງຕ້ອງຢາກກຳຈັດຄວາມທຸກໃຫ້ໝົດໄປຈາກໂລກນີ້ແທ້ໆ! ຫ23.04 ໜ້າ 3 ຂໍ້ 4-5
ວັນພຸດທີ 2 ກໍລະກົດ
ພວກເຈົ້າຜູ້ທີ່ຮັກພະເຢໂຫວາເອີ້ຍ ຂໍໃຫ້ຊັງສິ່ງຊົ່ວ. ເພິ່ນປົກປ້ອງຊີວິດຂອງຄົນທີ່ສັດຊື່ຕໍ່ເພິ່ນ. ເພິ່ນຊ່ວຍເຂົາເຈົ້າໃຫ້ລອດຈາກອຳນາດຂອງຄົນຊົ່ວ.—ພສ. 97:10
ເຮົາຕ້ອງພະຍາຍາມບໍ່ອ່ານແລະບໍ່ຟັງຄວາມຄິດທີ່ບໍ່ດີເຖິງວ່າຈະເປັນເລື່ອງທີ່ຫຼາຍຄົນກຳລັງສົນໃຈ. ນອກຈາກນັ້ນ ໃຫ້ເຮົາພະຍາຍາມເອົາສິ່ງດີໆໃສ່ໄວ້ໃນຄວາມຄິດຂອງເຮົາ ໂດຍອ່ານແລະສຶກສາຄຳພີໄບເບິນ ໄປປະຊຸມ ແລະໄປປະກາດເປັນປະຈຳ. ຖ້າເຮົາເຮັດແບບນີ້ ພະເຢໂຫວາສັນຍາວ່າເພິ່ນຈະບໍ່ຍອມປ່ອຍໃຫ້ເຮົາຖືກລໍ້ໃຈຈົນທົນບໍ່ໄດ້. (1ກຣ. 10:12, 13) ເຮົາທຸກຄົນຕ້ອງອະທິດຖານໃຫ້ຫຼາຍຂຶ້ນເພື່ອຈະສັດຊື່ຕໍ່ພະເຢໂຫວາໃນສະໄໝສຸດທ້າຍທີ່ຍາກລຳບາກແບບນີ້. ພະເຢໂຫວາຢາກໃຫ້ເຮົາລະບາຍຄວາມຮູ້ສຶກກັບເພິ່ນໂດຍການອະທິດຖານ. (ພສ. 62:8) ໃຫ້ສັນລະເສີນພະເຢໂຫວາແລະຂອບໃຈເພິ່ນສຳລັບທຸກສິ່ງທີ່ເພິ່ນເຮັດເພື່ອເຈົ້າ. ອະທິດຖານຂໍເພິ່ນຊ່ວຍເຈົ້າໃຫ້ມີຄວາມກ້າຫານໃນວຽກປະກາດ ໃຫ້ຮັບມືກັບບັນຫາ ແລະເອົາຊະນະການລໍ້ໃຈທີ່ເຈົ້າກຳລັງເຈິຢູ່. ຢ່າໃຫ້ໃຜຫຼືສິ່ງໃດມາຂັດຂວາງເຈົ້າບໍ່ໃຫ້ອະທິດຖານເປັນປະຈຳ. ຫ23.05 ໜ້າ 7 ຂໍ້ 17-18
ວັນພະຫັດທີ 3 ກໍລະກົດ
ໃຫ້ພວກເຮົາສົນໃຈກັນ . . . ໃຫ້ກຳລັງໃຈກັນ.—ຮຣ. 10:24, 25
ເປັນຫຍັງເຮົາຈຶ່ງເຂົ້າຮ່ວມການປະຊຸມປະຈຳປະຊາຄົມ? ເຫດຜົນທີ່ສຳຄັນຢ່າງໜຶ່ງກໍຄືເພື່ອສັນລະເສີນພະເຢໂຫວາ. (ພສ. 26:12; 111:1) ນອກຈາກນັ້ນ ການເຂົ້າຮ່ວມການປະຊຸມປະຈຳປະຊາຄົມຈະເຮັດໃຫ້ເຮົາມີໂອກາດໃຫ້ກຳລັງໃຈກັນໃນສະໄໝທີ່ຍາກລຳບາກແບບນີ້. (1ທຊ. 5:11) ເມື່ອເຮົາອອກຄວາມຄິດເຫັນ ມັນກໍແຮ່ງຈະເຮັດໃຫ້ເຮົາມີໂອກາດໄດ້ສັນລະເສີນພະເຢໂຫວາແລະເຮັດໃຫ້ຄົນອື່ນໄດ້ກຳລັງໃຈ. ແຕ່ບາງເທື່ອກໍບໍ່ງ່າຍຍ້ອນເຮົາອາດບໍ່ກ້າອອກຄວາມຄິດເຫັນ ຫຼືເມື່ອເຮົາຍົກມືພີ່ນ້ອງທີ່ນຳສ່ວນອາດບໍ່ໄດ້ເອີ້ນເຮົາເລື້ອຍໆຕາມທີ່ເຮົາຕ້ອງການ. ອັນໃດຈະຊ່ວຍເຮົາໃຫ້ຮັບມືກັບບັນຫາເຫຼົ່ານີ້? ໂປໂລບອກວ່າ ເຮົາຄວນສົນໃຈທີ່ຈະ “ໃຫ້ກຳລັງໃຈກັນ.” ເມື່ອເຮົາຮູ້ວ່າພີ່ນ້ອງຈະໄດ້ກຳລັງໃຈເຖິງວ່າເຮົາຈະອອກຄວາມຄິດເຫັນແບບງ່າຍໆ ມັນກໍເຮັດໃຫ້ເຮົາກ້າຫຼາຍຂຶ້ນທີ່ຈະອອກຄວາມຄິດເຫັນ. ຖ້າພີ່ນ້ອງທີ່ນຳສ່ວນບໍ່ຄ່ອຍເອີ້ນເຮົາ ເຮົາກໍມີຄວາມສຸກທີ່ຄົນອື່ນສາມາດອອກຄວາມຄິດເຫັນໃນການປະຊຸມ.—1ປຕ. 3:8. ຫ23.04 ໜ້າ 20 ຂໍ້ 1-3
ວັນສຸກທີ 4 ກໍລະກົດ
ໃຫ້ກັບເມືອເມືອງເຢຣູຊາເລັມ . . . ເພື່ອສ້າງວິຫານຂອງພະເຢໂຫວາພະເຈົ້າຂອງອິດສະຣາເອນຄືນໃໝ່.—ອຊຣ. 1:3
ກະສັດໄດ້ອອກຄຳສັ່ງວ່າຄົນຢິວທີ່ຖືກຈັບມາເປັນຊະເລີຍຢູ່ບາບີໂລນດົນເຖິງ 70 ປີ ສາມາດກັບໄປອິດສະຣາເອນບ້ານເກີດຂອງໂຕເອງໄດ້. (ອຊຣ. 1:2-4) ມີແຕ່ພະເຢໂຫວາເທົ່ານັ້ນທີ່ເຮັດເລື່ອງນີ້ໄດ້. ຍ້ອນປົກກະຕິແລ້ວບາບີໂລນຈະບໍ່ປ່ອຍຊະເລີຍທີ່ຈັບມາໄດ້ໃຫ້ເປັນອິດສະຫຼະ. (ອຊຢ. 14:4, 17) ແຕ່ເມືອງບາບີໂລນໄດ້ຫຼົ້ມສະຫຼາຍ ຜູ້ປົກຄອງຄົນໃໝ່ຈຶ່ງບອກໃຫ້ຄົນຢິວອອກຈາກບາບີໂລນໄດ້. ຄົນຢິວທຸກຄົນໂດຍສະເພາະຫົວໜ້າຄອບຄົວຕ້ອງຕັດສິນໃຈເລື່ອງທີ່ສຳຄັນທີ່ວ່າ ເຂົາເຈົ້າຍັງຈະຢູ່ບາບີໂລນຕໍ່ໄປຫຼືຈະອອກຈາກບ່ອນນັ້ນ. ແຕ່ການຕັດສິນໃຈເລື່ອງນີ້ກໍອາດຈະບໍ່ງ່າຍ. ຄົນຢິວທີ່ອາຍຸຫຼາຍອາດບໍ່ກ້າສ່ຽງທີ່ຈະເດີນທາງໄກແລະຍາກລຳບາກ. ນອກຈາກນັ້ນ ຄົນຢິວສ່ວນຫຼາຍເກີດຢູ່ບາບີໂລນ ຕະຫຼອດຊີວິດຂອງເຂົາເຈົ້າຮູ້ຈັກແຕ່ບາບີໂລນເທົ່ານັ້ນ. ເຂົາເຈົ້າບໍ່ຮູ້ສຶກວ່າອິດສະຣາເອນເປັນຄືບ້ານ ແຕ່ເປັນພຽງບ້ານເກີດຂອງບັນພະບຸລຸດ. ຄົນຢິວບາງຄົນກໍອາດຈະມີຖານະດີຢູ່ບາບີໂລນ ມັນອາດເປັນເລື່ອງຍາກທີ່ເຂົາເຈົ້າຕ້ອງຖິ້ມເຮືອນທີ່ສະດວກສະບາຍຫຼືທຸລະກິດ ແລ້ວໄປເລີ່ມຕົ້ນຊີວິດໃໝ່ໃນປະເທດທີ່ເຂົາເຈົ້າບໍ່ຮູ້ຈັກ. ຫ23.05 ໜ້າ 14 ຂໍ້ 1-2
ວັນເສົາທີ 5 ກໍລະກົດ
ພວກເຈົ້າ . . . ຕ້ອງກຽມພ້ອມ.—ມທ. 24:44
ຄຳພີໄບເບິນບອກເຮົາໃຫ້ພະຍາຍາມມີຄວາມອົດທົນ ຄວາມເຫັນອົກເຫັນໃຈ ແລະຄວາມຮັກຫຼາຍຂຶ້ນເລື້ອຍໆ. ລູກາ 21:19 ບອກວ່າ: “ໃຫ້ອົດທົນຈົນເຖິງທີ່ສຸດ ແລ້ວພວກເຈົ້າຈະໄດ້ຊີວິດ.” ໂກໂລຊາຍ 3:12 ບອກວ່າ: “ໃຫ້ປູກຝັງຄວາມເຫັນອົກເຫັນໃຈ” ແລະ 1 ເທຊະໂລນິກ 4:9, 10 ບອກວ່າ: “ພະເຈົ້າສອນພວກເຈົ້າໃຫ້ຮັກກັນຢູ່ແລ້ວ. . . . ພີ່ນ້ອງເອີຍ ພວກເຮົາຂໍສະໜັບສະໜູນພວກເຈົ້າໃຫ້ເຮັດແບບນັ້ນຫຼາຍຂຶ້ນເລື້ອຍໆ.” ຂໍ້ພະຄຳພີເຫຼົ່ານີ້ຂຽນເຖິງພວກລູກສິດທີ່ມີຄວາມອົດທົນ ຄວາມເຫັນອົກເຫັນໃຈ ແລະມີຄວາມຮັກຢູ່ແລ້ວ ແຕ່ເຂົາເຈົ້າກໍຍັງຕ້ອງພະຍາຍາມສະແດງຄຸນລັກສະນະເຫຼົ່ານີ້ໃຫ້ຫຼາຍຂຶ້ນເລື້ອຍໆ. ເຮົາເອງກໍຕ້ອງເຮັດແບບນັ້ນຄືກັນ. ໃຫ້ເຈົ້າເບິ່ງວ່າຄລິດສະຕຽນໃນສະຕະວັດທຳອິດສະແດງຄຸນລັກສະນະເຫຼົ່ານີ້ແນວໃດ ແລະເຈົ້າຈະຮຽນແບບເຂົາເຈົ້າໄດ້ແນວໃດ. ການເຮັດແບບນີ້ຈະຊ່ວຍເຈົ້າໃຫ້ກຽມພ້ອມສຳລັບຄວາມທຸກລຳບາກຄັ້ງໃຫຍ່. ຈາກນັ້ນ ເມື່ອຄວາມທຸກລຳບາກຄັ້ງໃຫຍ່ເລີ່ມຕົ້ນ ເຈົ້າກໍຈະຮູ້ວ່າຈະອົດທົນແນວໃດແລະຕັ້ງໃຈທີ່ຈະອົດທົນຕໍ່ໆໄປ. ຫ23.07 ໜ້າ 3 ຂໍ້ 4, 8
ວັນອາທິດທີ 6 ກໍລະກົດ
ຢູ່ແຜ່ນດິນນັ້ນຈະມີທາງຫຼັກເສັ້ນໜຶ່ງ . . . ຖືກເອີ້ນວ່າທາງບໍລິສຸດ.—ອຊຢ. 35:8
ບໍ່ວ່າເຮົາຈະເປັນຜູ້ຖືກເຈີມຫຼືເປັນ “ແກະອື່ນ” ເຮົາກໍຕ້ອງຍ່າງຢູ່ “ທາງບໍລິສຸດ” ສະເໝີ ຍ້ອນມັນຈະຊ່ວຍເຮົາໃຫ້ນະມັດສະການພະເຢໂຫວາຕໍ່ໆໄປທັງໃນຕອນນີ້ແລະໃນອະນາຄົດເຊິ່ງເປັນຕອນທີ່ການປົກຄອງຂອງພະເຈົ້າຈະເຮັດໃຫ້ໂລກນີ້ມີສິ່ງທີ່ດີ. (ຢຮ. 10:16) ຕັ້ງແຕ່ປີ 1919 ທັງຜູ້ຊາຍຜູ້ຍິງແລະເດັກນ້ອຍຫຼາຍລ້ານຄົນໄດ້ອອກຈາກບາບີໂລນໃຫຍ່ເຊິ່ງກໍຄືສາສະໜາປອມ ແລະເຂົາເຈົ້າເລີ່ມໃຊ້ຊີວິດຕາມທາງທີ່ບໍລິສຸດນີ້. ພະເຢໂຫວາເອົາສິ່ງທີ່ເປັນອຸປະສັກຂອງຄົນຢິວອອກເພື່ອຜູ້ທີ່ຢູ່ບາບີໂລນຈະກັບໄປອິດສະຣາເອນໄດ້. (ອຊຢ. 57:14) ພະເຢໂຫວາຈະເຮັດແບບນັ້ນຄືກັນບໍກັບ “ທາງບໍລິສຸດ” ໃນທຸກມື້ນີ້? ຫຼາຍຮ້ອຍປີກ່ອນປີ 1919 ພະເຢໂຫວາໃຊ້ຫຼາຍຄົນທີ່ຢ້ານຢຳເພິ່ນໃຫ້ເອົາສິ່ງທີ່ເປັນອຸປະສັກອອກໄປເພື່ອຈະຊ່ວຍຄົນໃຫ້ອອກຈາກບາບີໂລນໃຫຍ່. (ສົມທຽບກັບເອຊາຢາ 40:3) ເຂົາເຈົ້າເຮັດແບບນັ້ນເພື່ອກຽມທາງທີ່ຊ່ວຍຄົນທີ່ມີຫົວໃຈທີ່ດີໃຫ້ສາມາດອອກຈາກບາບີໂລນໃຫຍ່ແລະມານະມັດສະການພະເຢໂຫວາຢ່າງຖືກຕ້ອງ. ຫ23.05 ໜ້າ 16 ຂໍ້ 8-9
ວັນຈັນທີ 7 ກໍລະກົດ
ໃຫ້ຮັບໃຊ້ພະເຢໂຫວາຢ່າງມີຄວາມສຸກ. ໃຫ້ມາຢູ່ຕໍ່ໜ້າເພິ່ນແລະໂຫ່ຮ້ອງດີໃຈ.—ພສ. 100:2
ພະເຢໂຫວາຕ້ອງການໃຫ້ເຮົາຮັບໃຊ້ເພິ່ນຢ່າງມີຄວາມສຸກແລະດ້ວຍຄວາມເຕັມໃຈ. (2ກຣ. 9:7) ແຕ່ຖ້າເຮົາບໍ່ຢາກເຮັດຕາມເປົ້າໝາຍດ້ານຄວາມເຊື່ອເດ ເຮົາຍັງຕ້ອງພະຍາຍາມຢູ່ບໍ? ຂໍໃຫ້ຄິດເຖິງອັກຄະສາວົກໂປໂລ. ລາວບອກວ່າ: “ຂ້ອຍທຸບຕີຮ່າງກາຍຢ່າງໜັກຈົນຄວບຄຸມໄດ້ຄືກັບຄວບຄຸມທາດ.” (1ກຣ. 9:25-27) ເຫັນໄດ້ວ່າໂປໂລບັງຄັບໂຕເອງໃຫ້ເຮັດສິ່ງທີ່ຖືກຕ້ອງເຖິງວ່າບາງຄັ້ງລາວອາດຮູ້ສຶກບໍ່ຢາກເຮັດ. ພະເຢໂຫວາດີໃຈກັບສິ່ງທີ່ໂປໂລເຮັດເພື່ອເພິ່ນບໍ? ແນ່ນອນວ່າພະເຢໂຫວາດີໃຈ ແລະເພິ່ນໄດ້ໃຫ້ລາງວັນລາວທີ່ພະຍາຍາມເຮັດແບບນັ້ນ. (2ຕມ. 4:7, 8) ຄ້າຍຄືກັນ ພະເຢໂຫວາຈະດີໃຈຖ້າເຮົາພະຍາຍາມເຮັດຕາມເປົ້າໝາຍເຖິງວ່າເຮົາຮູ້ສຶກວ່າບໍ່ຢາກເຮັດ. ເພິ່ນດີໃຈຍ້ອນຮູ້ວ່າເຖິງວ່າເຮົາບໍ່ໄດ້ມັກທີ່ຈະເຮັດແບບນັ້ນແຕ່ເຮົາກໍເຮັດເພາະເຮົາຮັກເພິ່ນ. ພະເຢໂຫວາຈະອວຍພອນເຮົາຄືກັບທີ່ອວຍພອນໂປໂລ. (ພສ. 126:5) ເມື່ອເຮົາໄດ້ຮັບການອວຍພອນຈາກພະເຢໂຫວາ ເຮົາກໍມີແຮງກະຕຸ້ນຫຼາຍຂຶ້ນທີ່ຢາກຈະເຮັດ. ຫ23.05 ໜ້າ 29 ຂໍ້ 9-10
ວັນອັງຄານທີ 8 ກໍລະກົດ
ວັນຂອງພະເຢໂຫວາ [ກຳລັງ] ຈະມາ.—1ທຊ. 5:2
ໂປໂລສົມທຽບຄົນທີ່ຈະບໍ່ລອດໃນວັນຂອງພະເຢໂຫວາເປັນຄືກັບຄົນທີ່ນອນຫຼັບ. ຄົນທີ່ນອນຫຼັບບໍ່ຮູ້ວ່າມີຫຍັງເກີດຂຶ້ນຢູ່ອ້ອມໂຕລາວແລະບໍ່ຮູ້ວ່າເວລາຜ່ານໄປດົນສ່ຳໃດແລ້ວ. ລາວກໍເລີຍບໍ່ຮູ້ວ່າມີສິ່ງສຳຄັນຫຍັງແດ່ເກີດຂຶ້ນແລະລາວບໍ່ໄດ້ລົງມືເຮັດຫຍັງເລີຍ. ຄົນສ່ວນຫຼາຍໃນທຸກມື້ນີ້ກໍເປັນຄືກັບຄົນທີ່ນອນຫຼັບ. (ຣມ. 11:8) ເຂົາເຈົ້າບໍ່ເຊື່ອວ່າເຫດການຕ່າງໆທີ່ເກີດຂຶ້ນໃນໂລກເປັນຫຼັກຖານວ່າເຮົາຢູ່ໃນ “ສະໄໝສຸດທ້າຍ” ແລະຄວາມທຸກລຳບາກຄັ້ງໃຫຍ່ກຳລັງໃກ້ເຂົ້າມາ. (2ປຕ. 3:3, 4) ບໍ່ວ່າຄົນອື່ນຈະເປັນແນວໃດ ເຮົາຮູ້ວ່າແຮ່ງເວລາຜ່ານໄປໃນແຕ່ລະມື້ ກໍແຮ່ງເປັນເລື່ອງສຳຄັນທີ່ເຮົາຈະຕ້ອງຕື່ນໂຕ. (1ທຊ. 5:6) ດັ່ງນັ້ນ ເຮົາຕ້ອງມີໃຈສະຫງົບແລະໜັກແໜ້ນໝັ້ນຄົງ. ຍ້ອນຫຍັງ? ເພື່ອເຮົາຈະບໍ່ໄປຫຍຸ້ງກ່ຽວກັບເລື່ອງການເມືອງແລະບັນຫາໃນສັງຄົມ. ແຮ່ງວັນຂອງພະເຢໂຫວາໃກ້ເຂົ້າມາ ເຮົາກໍແຮ່ງຖືກກົດດັນໃຫ້ເລືອກຝ່າຍໃດຝ່າຍໜຶ່ງໃນເລື່ອງເຫຼົ່ານີ້ຫຼາຍຂຶ້ນ. ແຕ່ເຮົາບໍ່ຄວນກັງວົນວ່າເຮົາຈະເຮັດແນວໃດ ເພາະພະລັງບໍລິສຸດຂອງພະເຈົ້າຈະຊ່ວຍເຮົາໃຫ້ມີໃຈທີ່ສະຫງົບ ໜັກແໜ້ນໝັ້ນຄົງ ແລະຕັດສິນໃຈຢ່າງສະຫຼາດ.—ລກ. 12:11, 12. ຫ23.06 ໜ້າ 10 ຂໍ້ 6-7
ວັນພຸດທີ 9 ກໍລະກົດ
ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ ຂໍພະອົງຈື່ລູກ. ພະເຈົ້າເອີ້ຍ ຂໍໃຫ້ລູກມີເຫື່ອມີແຮງ.—ຜຕສ. 16:28
ເມື່ອໄດ້ຍິນຊື່ແຊມຊັນ ເຈົ້າຄິດເຖິງຫຍັງ? ເຈົ້າອາດຄິດເຖິງຄວາມແຂງແຮງຂອງລາວ. ແຕ່ແຊມຊັນກໍເຄີຍຕັດສິນໃຈຜິດພາດ ເຊິ່ງເຮັດໃຫ້ລາວເຈິກັບຄວາມເຈັບປວດຫຼາຍຢ່າງ. ເຖິງຈະເປັນແບບນັ້ນ ພະເຢໂຫວາກໍເລືອກທີ່ຈະເບິ່ງຄວາມສັດຊື່ຂອງລາວແລະສິ່ງທີ່ລາວເຮັດເພື່ອຮັບໃຊ້ເພິ່ນ. ດັ່ງນັ້ນ ເພິ່ນຈຶ່ງໃຫ້ຂຽນເລື່ອງຂອງລາວໄວ້ໃນຄຳພີໄບເບິນເພື່ອເປັນປະໂຫຍດສຳລັບເຮົາ. ພະເຢໂຫວາໃຊ້ແຊມຊັນໃຫ້ເຮັດສິ່ງທີ່ໜ້າງຶດງໍ້ຫຼາຍຢ່າງເພື່ອຊ່ວຍພວກອິດສະຣາເອນປະຊາຊົນຂອງເພິ່ນ. ຫຼັງຈາກທີ່ລາວຕາຍໄປຫຼາຍຮ້ອຍປີແລ້ວ ພະເຢໂຫວາກໍດົນໃຈໃຫ້ອັກຄະສາວົກໂປໂລຂຽນຊື່ຂອງລາວໄວ້ໃນລາຍຊື່ຄົນທີ່ເປັນຕົວຢ່າງທີ່ດີໃນເລື່ອງຄວາມເຊື່ອ. (ຮຣ. 11:32-34) ຕົວຢ່າງຂອງລາວຍັງໃຫ້ກຳລັງໃຈເຮົານຳ. ລາວເພິ່ງພະເຢໂຫວາແມ່ນແຕ່ຕອນທີ່ລຳບາກ. ເຮົາໄດ້ບົດຮຽນຈາກແຊມຊັນ ແລະຕົວຢ່າງຂອງລາວໃຫ້ກຳລັງໃຈເຮົາ. ຫ23.09 ໜ້າ 2 ຂໍ້ 1-2
ວັນພະຫັດທີ 10 ກໍລະກົດ
ອ້ອນວອນຂໍໃຫ້ [ພະເຈົ້າ] ຊີ້ນຳ.—ຟລປ. 4:6
ເຮົາຈະຝຶກໂຕເອງໃຫ້ມີຄວາມອົດທົນຫຼາຍຂຶ້ນໄດ້ໂດຍອະທິດຖານບອກພະເຢໂຫວາວ່າເຮົາກັງວົນເລື່ອງຫຍັງ. (1ທຊ. 5:17) ບາງເທື່ອເຈົ້າອາດຍັງບໍ່ທັນເຈິບັນຫາໜັກໃນຕອນນີ້. ເຖິງຈະເປັນແບບນັ້ນ ເຈົ້າກໍຂໍຄວາມຊ່ວຍເຫຼືອຈາກພະເຢໂຫວາໄດ້ເມື່ອເຈົ້າຮູ້ສຶກສັບສົນ ບໍ່ສະບາຍໃຈ ແລະບໍ່ຮູ້ວ່າຈະເຮັດແນວໃດ. ຖ້າເຈົ້າພະຍາຍາມຂໍຄວາມຊ່ວຍເຫຼືອຈາກພະເຢໂຫວາທຸກເທື່ອຕັ້ງແຕ່ຕອນນີ້ແມ່ນແຕ່ຕອນທີ່ເຈິບັນຫາເລັກໆນ້ອຍໆໃນແຕ່ລະມື້ ເມື່ອຮອດຕອນທີ່ເຈົ້າເຈິບັນຫາທີ່ໜັກກວ່າໃນອະນາຄົດ ເຈົ້າກໍຈະບໍ່ລັງເລທີ່ຈະຂໍຄວາມຊ່ວຍເຫຼືອຈາກພະເຢໂຫວາແລະໝັ້ນໃຈວ່າເພິ່ນຮູ້ວ່າຈະຊ່ວຍເຈົ້າຕອນໃດແລະຊ່ວຍແນວໃດ. (ພສ. 27:1, 3) ຖ້າເຮົາອົດທົນກັບຄວາມຍາກລຳບາກທີ່ເຈິໃນຕອນນີ້ໄດ້ ເຮົາກໍຈະອົດທົນໄດ້ຕອນທີ່ເຈິກັບຄວາມທຸກລຳບາກຄັ້ງໃຫຍ່ໃນອະນາຄົດ. (ຣມ. 5:3) ເປັນຫຍັງເຮົາຈຶ່ງເວົ້າແບບນັ້ນ? ພີ່ນ້ອງຫຼາຍຄົນຮູ້ສຶກວ່າທຸກເທື່ອທີ່ເຂົາເຈົ້າອົດທົນກັບບັນຫາໄດ້ ມັນຈະຊ່ວຍເຂົາເຈົ້າໃຫ້ອົດທົນໄດ້ອີກເມື່ອເຈິບັນຫາໃນເທື່ອຕໍ່ໄປ. ເມື່ອເຂົາເຈົ້າອົດທົນກັບບັນຫາໄດ້ຍ້ອນພະເຢໂຫວາຊ່ວຍ ເຂົາເຈົ້າກໍແຮ່ງເຊື່ອວ່າຖ້າເຂົາເຈົ້າເຈິບັນຫາອີກ ພະເຢໂຫວາຈະຊ່ວຍເຂົາເຈົ້າແນ່ນອນ. ແລ້ວຄວາມເຊື່ອແບບນີ້ກໍຈະຊ່ວຍເຂົາເຈົ້າໃຫ້ອົດທົນກັບຄວາມຍາກລຳບາກທີ່ຈະເຈິໃນອະນາຄົດໄດ້.—ຢກບ. 1:2-4. ຫ23.07 ໜ້າ 3 ຂໍ້ 7-8
ວັນສຸກທີ 11 ກໍລະກົດ
ເຮົາຈະໃຫ້ຕາມທີ່ເຈົ້າຂໍ.—ປຖກ. 19:21
ຄວາມຖ່ອມແລະຄວາມເຫັນອົກເຫັນໃຈຂອງພະເຢໂຫວາກະຕຸ້ນເພິ່ນໃຫ້ມີເຫດຜົນ. ຕົວຢ່າງເຊັ່ນ: ເຮົາເຫັນວ່າພະເຢໂຫວາຖ່ອມໃຈແທ້ໆຕອນທີ່ເພິ່ນກຳລັງຈະທຳລາຍເມືອງໂຊໂດມ. ພະເຢໂຫວາໃຊ້ທູດສະຫວັນໄປບອກໂລດໃຫ້ໜີໄປເຂດພູເຂົາ. ແຕ່ໂລດຢ້ານຫຼາຍ ລາວເລີຍຂໍພະເຢໂຫວາວ່າລາວກັບຄອບຄົວຈະໄປເມືອງໂຊອາເຊິ່ງເປັນເມືອງນ້ອຍໆ. ແຕ່ແທ້ໆແລ້ວເມືອງນັ້ນພະເຢໂຫວາກໍຕັ້ງໃຈຈະທຳລາຍຄືກັນ. ທີ່ຈິງ ພະເຢໂຫວາຈະສັ່ງໂລດໃຫ້ເຮັດຕາມຄຳສັ່ງກໍໄດ້ ແຕ່ເພິ່ນກໍຍອມເຮັດຕາມທີ່ໂລດຂໍ ເຊິ່ງໝາຍຄວາມວ່າເພິ່ນຈະບໍ່ໄດ້ທຳລາຍເມືອງໂຊອາຕາມທີ່ຕັ້ງໃຈໄວ້. (ປຖກ. 19:18-22) ຫຼາຍຮ້ອຍປີຕໍ່ມາ ພະເຢໂຫວາກໍສະແດງຄວາມເຫັນອົກເຫັນໃຈຕໍ່ຄົນໃນເມືອງນີເນເວ. ເພິ່ນສົ່ງຜູ້ພະຍາກອນໂຢນາໃຫ້ໄປປະກາດວ່າເພິ່ນຈະທຳລາຍເມືອງນີ້. ແຕ່ເມື່ອຄົນໃນເມືອງນີເນເວກັບໃຈ ພະເຢໂຫວາກໍເຫັນອົກເຫັນໃຈແລະອີ່ຕົນເຂົາເຈົ້າ ເພິ່ນກໍເລີຍບໍ່ທຳລາຍເມືອງນີ້ຄືກັບທີ່ຕັ້ງໃຈໄວ້ໃນຕອນທຳອິດ.—ຢນ. 3:1, 10; 4:10, 11. ຫ23.07 ໜ້າ 21 ຂໍ້ 5
ວັນເສົາທີ 12 ກໍລະກົດ
ເຂົາເຈົ້າຂ້າເຢໂຮອາດ . . . ແລະຝັງລາວ . . . ແຕ່ບໍ່ແມ່ນໃນບ່ອນຝັງສົບຂອງພວກກະສັດ.—2ຂຄ. 24:25
ເຮົາໄດ້ບົດຮຽນຫຍັງຈາກເລື່ອງຂອງເຢໂຮອາດ? ເຢໂຮອາດເປັນຄືກັບຕົ້ນໄມ້ທີ່ບໍ່ໄດ້ຢັ່ງຮາກລົງເລິກເຊິ່ງຕ້ອງເພິ່ງໄມ້ຄ້ຳ. ເມື່ອບໍ່ມີໄມ້ຄ້ຳເຊິ່ງກໍຄືເຢໂຮຢາດາແລະເມື່ອມີຄົນທີ່ນະມັດສະການພະເຈົ້າປອມມາຊັກຈູງ ເຢໂຮອາດກໍຖິ້ມພະເຢໂຫວາ. ຄືກັບຕົ້ນໄມ້ທີ່ບໍ່ໄດ້ຢັ່ງຮາກລົງເລິກແລະບໍ່ມີໄມ້ຄ້ຳ ເມື່ອລົມພັດມັນກໍລົ້ມລົງ. ຕົວຢ່າງປຽບທຽບນີ້ເຮັດໃຫ້ເຫັນວ່າ ເຮົາບໍ່ຄວນຢ້ານຢຳພະເຢໂຫວາຍ້ອນຢາກເຮັດຕາມຄອບຄົວຫຼືຄົນອື່ນໃນປະຊາຄົມ. ເພື່ອເຮົາຈະສະໜິດກັບພະເຢໂຫວາສະເໝີ ເຮົາຕ້ອງຮັກແລະຢ້ານຢຳເພິ່ນດ້ວຍໂຕເອງແລະຕ້ອງເຮັດແບບນັ້ນຫຼາຍຂຶ້ນເລື້ອຍໆໂດຍສຶກສາຄົ້ນຄວ້າຄຳພີໄບເບິນ ຄິດຕຶກຕອງ ແລະອະທິດຖານເປັນປະຈຳ. (ຢຣມ. 17:7, 8; ກລຊ. 2:6, 7) ພະເຢໂຫວາບໍ່ໄດ້ຮຽກຮ້ອງຈາກເຮົາຫຼາຍເກີນໄປ. ສິ່ງທີ່ເພິ່ນຢາກໄດ້ຈາກເຮົາບອກໄວ້ໃນປັນຍາຈານ 12:13 ທີ່ວ່າ: “ໃຫ້ຢ້ານຢຳພະເຈົ້າທ່ຽງແທ້ແລະເຮັດຕາມຄຳສັ່ງຂອງພະອົງ ເພາະນີ້ເປັນໜ້າທີ່ທັງໝົດຂອງມະນຸດ.” ຖ້າເຮົາຢ້ານຢຳພະເຢໂຫວາ ບໍ່ວ່າເຮົາຈະເຈິບັນຫາຫຍັງໃນອະນາຄົດ ເຮົາກໍຍັງຈະສັດຊື່ແລະພັກດີຕໍ່ເພິ່ນ. ບໍ່ມີຫຍັງຈະທຳລາຍສາຍສຳພັນທີ່ເຮົາມີກັບພະເຢໂຫວາໄດ້. ຫ23.06 ໜ້າ 19 ຂໍ້ 17-19
ວັນອາທິດທີ 13 ກໍລະກົດ
ເຮົາກຳລັງສ້າງທຸກສິ່ງຂຶ້ນໃໝ່.—ພນມ. 21:5
ໃນພະນິມິດ 21:5 ເລີ່ມຕົ້ນວ່າ: “ພະອົງຜູ້ນັ່ງເທິງບັນລັງນັ້ນເວົ້າວ່າ.” ຄຳເວົ້ານີ້ພິເສດຫຼາຍຍ້ອນໃນປຶ້ມພະນິມິດມີແຕ່ 3 ເທື່ອເທົ່ານັ້ນທີ່ພະເຢໂຫວາເປັນຜູ້ເວົ້າເອງ. ຄຳເວົ້ານີ້ບໍ່ແມ່ນທູດສະຫວັນແລະບໍ່ແມ່ນພະເຢຊູເປັນຜູ້ເວົ້າ ແຕ່ພະເຢໂຫວາເປັນຜູ້ເວົ້າເອງ! ຄຳເວົ້ານີ້ເຮັດໃຫ້ເຮົາເຊື່ອໄດ້ແທ້ໆໃນສິ່ງທີ່ເພິ່ນເວົ້າຕໍ່ຈາກນັ້ນ. ເປັນຫຍັງຈຶ່ງເປັນແນວນັ້ນ? ຍ້ອນພະເຢໂຫວາ “ເວົ້າຕົວະບໍ່ໄດ້.” (ຕຕ. 1:2) ດັ່ງນັ້ນ ສິ່ງທີ່ເຮົາອ່ານໃນພະນິມິດ 21:5, 6 ຈຶ່ງເຊື່ອໄດ້ແທ້ໆ. ພະເຢໂຫວາເວົ້າວ່າ: “ເຮົາກຳລັງສ້າງທຸກສິ່ງຂຶ້ນໃໝ່.” ພະເຢໂຫວາກຳລັງເວົ້າເຖິງສິ່ງທີ່ຈະເກີດຂຶ້ນໃນອະນາຄົດ. ແຕ່ຍ້ອນເພິ່ນໝັ້ນໃຈແທ້ໆວ່າຄຳສັນຍາຂອງເພິ່ນຈະເກີດຂຶ້ນແທ້ ເພິ່ນຈຶ່ງເວົ້າຄືກັບວ່າມັນກຳລັງເກີດຂຶ້ນແລ້ວ.—ອຊຢ. 46:10. ຫ23.11 ໜ້າ 3-4 ຂໍ້ 7-8
ວັນຈັນທີ 14 ກໍລະກົດ
ລາວກໍອອກໄປທາງນອກແລະຮ້ອງໄຫ້ດ້ວຍຄວາມເຈັບປວດໃຈຫຼາຍ.—ມທ. 26:75
ເປໂຕຕ້ອງຕໍ່ສູ້ກັບຈຸດອ່ອນຂອງໂຕເອງ. ໃຫ້ເຮົາເບິ່ງບາງຕົວຢ່າງນຳກັນ. ຕອນທີ່ພະເຢຊູເວົ້າວ່າເພິ່ນຈະຕ້ອງທົນທຸກທໍລະມານແລະຕາຍເພື່ອໃຫ້ຄຳພະຍາກອນໃນຄຳພີໄບເບິນເກີດຂຶ້ນແທ້ ເປໂຕກໍເວົ້າວ່າພະເຢຊູຈະບໍ່ເຈິເລື່ອງແບບນັ້ນດອກ. (ມຣກ. 8:31-33) ມີຫຼາຍເທື່ອທີ່ເປໂຕກັບພວກອັກຄະສາວົກຖຽງກັນວ່າໃຜຊິເປັນໃຫຍ່ທີ່ສຸດໃນພວກເຂົາເຈົ້າ. (ມຣກ. 9:33, 34) ໃນຄືນສຸດທ້າຍກ່ອນທີ່ພະເຢຊູຈະຕາຍ ເປໂຕໄດ້ຕັດຫູຜູ້ຊາຍຄົນໜຶ່ງດ້ວຍຄວາມໃຈຮ້ອນ. (ຢຮ. 18:10) ໃນຄືນດຽວກັນນັ້ນ ຍ້ອນຄວາມຢ້ານເປໂຕໄດ້ປະຕິເສດຮອດ 3 ເທື່ອວ່າບໍ່ຮູ້ຈັກພະເຢຊູທີ່ເປັນໝູ່ຂອງລາວ. (ມຣກ. 14:66-72) ການເຮັດແບບນັ້ນເຮັດໃຫ້ເປໂຕຮ້ອງໄຫ້ດ້ວຍຄວາມເຈັບປວດໃຈຫຼາຍ. ພະເຢຊູບໍ່ໄດ້ປະຖິ້ມອັກຄະສາວົກຂອງເພິ່ນຜູ້ນີ້ທີ່ທໍ້ໃຈຫຼາຍ. ຫຼັງຈາກພະເຢຊູຟື້ນຄືນມາຈາກຕາຍ ເພິ່ນໄດ້ໃຫ້ໂອກາດເປໂຕຢືນຢັນເຖິງຄວາມຮັກທີ່ລາວມີຕໍ່ເພິ່ນ. ພະເຢຊູຊວນລາວໃຫ້ມາເປັນຜູ້ເບິ່ງແຍງຝູງແກະຂອງເພິ່ນ. (ຢຮ. 21:15-17) ເປໂຕກໍພ້ອມທີ່ຈະເຮັດຕາມທີ່ພະເຢຊູບອກ. ລາວຢູ່ເມືອງເຢຣູຊາເລັມໃນວັນເພັນເຕກອດແລະຢູ່ໃນກຸ່ມທຳອິດທີ່ຖືກເລືອກໂດຍພະລັງບໍລິສຸດ. ຫ23.09 ໜ້າ 22 ຂໍ້ 6-7
ວັນອັງຄານທີ 15 ກໍລະກົດ
ໃຫ້ເຈົ້າເບິ່ງແຍງແກະໂຕນ້ອຍໆຂອງຂ້ອຍ.—ຢຮ. 21:16
ເປໂຕບອກຜູ້ດູແລ “ໃຫ້ເອົາໃຈໃສ່ຝູງແກະຂອງພະເຈົ້າ.” (1ປຕ. 5:1-4) ຖ້າເຈົ້າເປັນຜູ້ດູແລ ເຮົາຮູ້ວ່າເຈົ້າຮັກພີ່ນ້ອງແລະຢາກຊ່ວຍເຂົາເຈົ້າ. ແຕ່ບາງເທື່ອເຈົ້າອາດຮູ້ສຶກວ່າມີວຽກຫຼາຍໂພດຫຼືຮູ້ສຶກເມື່ອຍໂພດຈົນບໍ່ສາມາດເຮັດວຽກມອບໝາຍນີ້ໄດ້. ຖ້າເປັນແບບນັ້ນ ເຈົ້າຈະເຮັດແນວໃດ? ໃຫ້ບອກພະເຢໂຫວາວ່າເຈົ້າເປັນຫ່ວງແລະຢາກຊ່ວຍພີ່ນ້ອງຫຼາຍແທ້ໆ. ເປໂຕຂຽນວ່າ: “ຖ້າຜູ້ໃດຮັບໃຊ້ກໍໃຫ້ລາວຮັບໃຊ້ໂດຍເພິ່ງກຳລັງທີ່ມາຈາກພະເຈົ້າ.” (1ປຕ. 4:11) ພີ່ນ້ອງອາດຈະກຳລັງເຈິກັບບັນຫາທີ່ບໍ່ສາມາດແກ້ໄຂໄດ້ໃນຕອນນີ້. ແຕ່ຂໍໃຫ້ຈື່ໄວ້ວ່າພະເຢຊູຄລິດ “ຜູ້ລ້ຽງແກະຄົນສຳຄັນ” ສາມາດຊ່ວຍພີ່ນ້ອງໄດ້ຫຼາຍກວ່າເຈົ້າທັງໃນຕອນນີ້ແລະໃນໂລກໃໝ່. ສິ່ງທີ່ພະເຢໂຫວາຢາກໃຫ້ຜູ້ດູແລເຮັດແມ່ນໃຫ້ຮັກແລະເອົາໃຈໃສ່ພີ່ນ້ອງ ແລະ “ເປັນຕົວຢ່າງໃຫ້ຝູງແກະ.” ຫ23.09 ໜ້າ 30 ຂໍ້ 13-14
ວັນພຸດທີ 16 ກໍລະກົດ
ພະເຢໂຫວາຮູ້ວ່າຄວາມຄິດຂອງຄົນສະຫຼາດບໍ່ມີປະໂຫຍດ.—1ກຣ. 3:20
ເຮົາຕ້ອງຫຼີກລ່ຽງການຄິດຫາເຫດຜົນແບບຄົນໃນໂລກ. “ຄວາມສະຫຼາດຂອງໂລກນີ້” ມັກເຮັດໃຫ້ຄົນເຮົາບໍ່ເຊື່ອຟັງພະເຈົ້າ. (1ກຣ. 3:19) ຖ້າເຮົາຄິດແບບຄົນທົ່ວໄປໃນໂລກ ເຮົາກໍອາດເລີ່ມບໍ່ສົນໃຈພະເຢໂຫວາແລະກົດໝາຍຂອງເພິ່ນ. ຄົນໃນເມືອງເປຄາໂມແລະເມືອງທົວຕີຣາຖືວ່າການເຮັດຜິດສິນລະທຳທາງເພດແລະການນະມັດສະການຮູບບູຊາເປັນເລື່ອງທຳມະດາ ແລະຄລິດສະຕຽນບາງຄົນໃນເມືອງນັ້ນກໍໄດ້ຮັບອິດທິພົນຈາກເຂົາເຈົ້າ. ພະເຢຊູຈຶ່ງເຕືອນສອງປະຊາຄົມນັ້ນແຮງໆຍ້ອນເຂົາເຈົ້າຍອມໃຫ້ມີການເຮັດຜິດສິນລະທຳທາງເພດ. (ພນມ. 2:14, 20) ໃນທຸກມື້ນີ້ ເຮົາກໍເຈິການກົດດັນໃຫ້ຍອມຮັບຄວາມຄິດແບບຜິດໆຂອງຄົນທົ່ວໄປໃນໂລກ. ຄົນໃນຄອບຄົວ ຍາດພີ່ນ້ອງ ແລະໝູ່ອາດຈະເວົ້າໂນ້ມນ້າວເພື່ອໃຫ້ເຮົາຮູ້ສຶກວ່າຄວາມເຊື່ອຂອງເຮົາເຂັ້ມງວດໂພດ ແລະເຮົາບໍ່ຕ້ອງເຮັດຕາມກົດໝາຍຂອງພະເຈົ້າກໍໄດ້ ເຊັ່ນ ເຂົາເຈົ້າອາດເວົ້າວ່າບໍ່ຕ້ອງເຮັດຕາມຫຼັກສິນລະທຳໃນຄຳພີໄບເບິນດອກ ມັນຫຼ້າສະໄໝແລ້ວ. ບາງເທື່ອອາດເປັນໄປໄດ້ທີ່ເຮົາຈະຮູ້ສຶກວ່າຄຳແນະນຳຂອງພະເຢໂຫວາບໍ່ຈະແຈ້ງປານໃດ ເຊິ່ງອາດເຮັດໃຫ້ເຮົາຢາກເຮັດ “ກາຍຂອບເຂດທີ່ຂຽນໄວ້.”—1ກຣ. 4:6. ຫ23.07 ໜ້າ 16 ຂໍ້ 10-11
ວັນພະຫັດທີ 17 ກໍລະກົດ
ໝູ່ແທ້ສະແດງຄວາມຮັກສະເໝີ ແລະເປັນຄືກັບອ້າຍນ້ອງທີ່ເກີດມາເພື່ອຊ່ວຍກັນໃນຍາມທີ່ຍາກລຳບາກ.—ສພສ. 17:17
ມາຣີແມ່ຂອງພະເຢຊູຕ້ອງໄດ້ຮັບຄວາມຊ່ວຍເຫຼືອເພື່ອຈະເຂັ້ມແຂງ. ລອງຄິດເບິ່ງວ່າມາຣີຊິອຸກໃຈຫຼາຍສ່ຳໃດຕອນທີ່ທູດສະຫວັນຄັບຣີເອນມາບອກວ່າລາວຈະຖືພາ ທັງໆທີ່ລາວຍັງບໍ່ໄດ້ແຕ່ງດອງ. ລາວບໍ່ເຄີຍມີລູກ ແຕ່ຕ້ອງລ້ຽງເດັກນ້ອຍຜູ້ໜຶ່ງທີ່ຈະກາຍເປັນເມຊີອາໃນອະນາຄົດ. ລາວຍັງບໍ່ເຄີຍມີເພດສຳພັນຈັກເທື່ອ ແຕ່ລາວຕ້ອງບອກໂຢເຊັບຄູ່ໝັ້ນຂອງລາວວ່າລາວຈະຖືພາ. ເລື່ອງທັງໝົດນີ້ຄືຊິຍາກຫຼາຍສຳລັບມາຣີ. (ລກ. 1:26-33) ສິ່ງໃດຊ່ວຍມາຣີໃຫ້ເຂັ້ມແຂງ? ມາຣີຂໍຄວາມຊ່ວຍເຫຼືອຈາກຄົນອື່ນ. ມາຣີຂໍໃຫ້ທູດສະຫວັນຄັບຣີເອນບອກລະອຽດຕື່ມກ່ຽວກັບວຽກມອບໝາຍນີ້. (ລກ. 1:34) ຫຼັງຈາກນັ້ນ ມາຣີກໍເດີນທາງໄປ “ເຂດພູເຂົາ” ເຊິ່ງຢູ່ໃນເຂດແດນຂອງຕະກູນຢູດາເພື່ອໄປຫາເອລີຊາເບັດພີ່ນ້ອງຂອງລາວ. ເອລີຊາເບັດເຮັດໃຫ້ມາຣີໄດ້ກຳລັງໃຈຫຼາຍ. ເອລີຊາເບັດຊົມເຊີຍມາຣີ ແລະພະເຢໂຫວາດົນໃຈເອລີຊາເບັດໃຫ້ເວົ້າເຖິງຄຳພະຍາກອນກ່ຽວກັບລູກຊາຍຂອງມາຣີທີ່ຍັງບໍ່ທັນເກີດ. (ລກ. 1:39-45) ມາຣີເວົ້າວ່າ ພະເຢໂຫວາ “ໃຊ້ລິດເດດເຮັດສິ່ງທີ່ຍິ່ງໃຫຍ່.” (ລກ. 1:46-51) ເຫັນໄດ້ແຈ້ງວ່າພະເຢໂຫວາໃຊ້ທູດສະຫວັນຄັບຣີເອນກັບເອລີຊາເບັດເພື່ອຊ່ວຍມາຣີໃຫ້ເຂັ້ມແຂງ. ຫ23.10 ໜ້າ 14-15 ຂໍ້ 10-12
ວັນສຸກທີ 18 ກໍລະກົດ
ເພິ່ນເຮັດໃຫ້ພວກເຮົາເປັນກະສັດແລະເປັນປະໂລຫິດຂອງພະເຈົ້າຜູ້ເປັນພໍ່ຂອງເພິ່ນ.—ພນມ. 1:6
ມີແຕ່ລູກສິດຂອງພະເຢຊູຈຳນວນ 144.000 ຄົນທີ່ຖືກເລືອກດ້ວຍພະລັງບໍລິສຸດແລະມີສາຍສຳພັນທີ່ພິເສດກັບພະເຢໂຫວາຈຶ່ງຈະໄດ້ຮັບໃຊ້ເປັນປະໂລຫິດຮ່ວມກັບພະເຢຊູໃນສະຫວັນ. (ພນມ. 14:1) ຫ້ອງບໍລິສຸດໃນເຕັ້ນສັກສິດເປັນພາບສະແດງເຖິງການທີ່ຜູ້ຖືກເລືອກຖືກຮັບເປັນລູກຂອງພະເຈົ້າຕອນທີ່ເຂົາເຈົ້າຍັງມີຊີວິດຢູ່ໃນໂລກນີ້. (ຣມ. 8:15-17) ຫ້ອງບໍລິສຸດທີ່ສຸດເປັນພາບສະແດງເຖິງສະຫວັນເຊິ່ງເປັນບ່ອນຢູ່ຂອງພະເຢໂຫວາ. “ຜ້າກັ້ງ” ທີ່ຂັ້ນລະຫວ່າງຫ້ອງບໍລິສຸດກັບຫ້ອງບໍລິສຸດທີ່ສຸດເປັນພາບສະແດງເຖິງຮ່າງກາຍຂອງພະເຢຊູທີ່ເປັນມະນຸດ. ຖ້າເພິ່ນຍັງມີຮ່າງກາຍແບບນີ້ຢູ່ ເພິ່ນກໍບໍ່ສາມາດໄປສະຫວັນເພື່ອເຮັດໜ້າທີ່ປະໂລຫິດໃຫຍ່ທີ່ຍິ່ງໃຫຍ່ຢູ່ວິຫານໂດຍໄນໄດ້. ດັ່ງນັ້ນ ເພິ່ນຈຶ່ງຕ້ອງສະລະຮ່າງກາຍຂອງເພິ່ນ. ການເຮັດແບບນີ້ເປີດໂອກາດໃຫ້ທຸກຄົນທີ່ຖືກເລືອກຂຶ້ນໄປສະຫວັນໄດ້. ແຕ່ເຂົາເຈົ້າກໍຕ້ອງສະລະຮ່າງກາຍທີ່ເປັນມະນຸດເພື່ອຈະໄດ້ຮັບລາງວັນໃນສະຫວັນ.—ຮຣ. 10:19, 20; 1ກຣ. 15:50. ຫ23.10 ໜ້າ 28 ຂໍ້ 13
ວັນເສົາທີ 19 ກໍລະກົດ
ຂ້ອຍມີເວລາບໍ່ພໍທີ່ຈະເລົ່າຕໍ່ກ່ຽວກັບກີເດໂອນ.—ຮຣ. 11:32
ຕອນທີ່ຄົນໃນຕະກູນເອຟຣາອິມມາຕໍ່ວ່າກີເດໂອນ ລາວບໍ່ໄດ້ໃຈຮ້າຍ. (ຜຕສ. 8:1-3) ລາວເວົ້າດີໆກັບເຂົາເຈົ້າ. ກີເດໂອນສະແດງຄວາມຖ່ອມໂດຍຕັ້ງໃຈຟັງວ່າເຂົາເຈົ້າໃຈຮ້າຍເລື່ອງຫຍັງ ແລະລາວກໍຮູ້ວິທີເວົ້າທີ່ຈະເຮັດໃຫ້ຄົນໃນຕະກູນເອຟຣາອິມຮູ້ສຶກດີຂຶ້ນ. ຜູ້ດູແລທີ່ສະຫຼາດຈະຮຽນແບບກີເດໂອນໂດຍບໍ່ໃຈຮ້າຍງ່າຍເມື່ອຖືກພີ່ນ້ອງຕຳໜິ ແຕ່ຈະຕັ້ງໃຈຟັງວ່າພີ່ນ້ອງຮູ້ສຶກແນວໃດແລ້ວເຂົາເຈົ້າກໍຈະຕອບພີ່ນ້ອງດີໆ. (ຢກບ. 3:13) ຖ້າຜູ້ດູແລເຮັດແບບນີ້ກໍຈະເຮັດໃຫ້ປະຊາຄົມມີຄວາມສະຫງົບສຸກ. ຕອນທີ່ຄົນອິດສະຣາເອນຍົກຍ້ອງກີເດໂອນທີ່ລາວເອົາຊະນະພວກມີດີອານໄດ້ ລາວບໍ່ຢາກໃຫ້ຄົນຍົກຍ້ອງລາວ ລາວຢາກໃຫ້ພະເຢໂຫວາໄດ້ຮັບການຍົກຍ້ອງ. (ຜຕສ. 8:22, 23) ຜູ້ດູແລຈະຮຽນແບບກີເດໂອນໄດ້ແນວໃດ? ເຂົາເຈົ້າຄວນຍົກຍ້ອງພະເຢໂຫວາເມື່ອເຮັດວຽກມອບໝາຍໄດ້ສຳເລັດ. (1ກຣ. 4:6, 7) ຕົວຢ່າງເຊັ່ນ: ຖ້າມີພີ່ນ້ອງມາຊົມເຊີຍຜູ້ດູແລຄົນໜຶ່ງວ່າລາວສອນໄດ້ດີ ລາວຄວນບອກວ່າເລື່ອງທີ່ລາວສອນກໍມາຈາກຄຳພີໄບເບິນ ຫຼືລາວອາດບອກວ່າອົງການຂອງພະເຢໂຫວາຝຶກເຮົາທຸກຄົນໄດ້ດີຫຼາຍ. ບາງເທື່ອຜູ້ດູແລອາດຕ້ອງຄິດວ່າລາວຢາກໃຫ້ຄົນອື່ນປະທັບໃຈໃນໂຕລາວຫຼືລາວກຳລັງເຮັດໃຫ້ຄົນອື່ນຍົກຍ້ອງພະເຢໂຫວາ. ຫ23.06 ໜ້າ 4 ຂໍ້ 7-8
ວັນອາທິດທີ 20 ກໍລະກົດ
ຄວາມຄິດຂອງເຮົາບໍ່ຄືກັບຄວາມຄິດຂອງເຈົ້າ.—ອຊຢ. 55:8
ຖ້າເຮົາບໍ່ໄດ້ຮັບຄຳຕອບໃນສິ່ງທີ່ເຮົາອະທິດຖານຂໍ ໃຫ້ເຮົາຖາມໂຕເອງວ່າ: ‘ຂ້ອຍອະທິດຖານຂໍໃນສິ່ງທີ່ຖືກຕ້ອງບໍ?’ ຫຼາຍເທື່ອເຮົາຄິດວ່າເຮົາຮູ້ວ່າສິ່ງໃດດີທີ່ສຸດສຳລັບເຮົາ ແຕ່ສິ່ງທີ່ເຮົາຂໍອາດບໍ່ແມ່ນສິ່ງທີ່ດີທີ່ສຸດສຳລັບເຮົາກໍໄດ້. ຖ້າເຮົາອະທິດຖານກ່ຽວກັບເລື່ອງໃດເລື່ອງໜຶ່ງ ມັນອາດຈະມີວິທີແກ້ໄຂທີ່ດີກວ່າສຳລັບເລື່ອງນັ້ນເມື່ອສົມທຽບກັບວິທີທີ່ເຮົາອະທິດຖານຂໍ. ບາງສິ່ງທີ່ເຮົາອະທິດຖານຂໍອາດບໍ່ສອດຄ່ອງກັບຄວາມຕ້ອງການຂອງພະເຢໂຫວາ. (1ຢຮ. 5:14) ໃຫ້ເຮົາຄິດເຖິງຕົວຢ່າງຂອງພໍ່ແມ່ທີ່ຂໍໃຫ້ພະເຢໂຫວາຊ່ວຍລູກຂອງເຂົາເຈົ້າໃຫ້ຮັບໃຊ້ເພິ່ນຕໍ່ໆໄປ. ເບິ່ງຄືວ່າເປັນຄຳຂໍທີ່ເໝາະສົມ ແຕ່ພະເຢໂຫວາຈະບໍ່ບັງຄັບເຮົາໃຫ້ຮັບໃຊ້ເພິ່ນ. ເພິ່ນຢາກໃຫ້ເຮົາແລະລູກຂອງເຮົາເລືອກຮັບໃຊ້ເພິ່ນເອງ. (ພບຍ. 10:12, 13; 30:19, 20) ພໍ່ແມ່ຄວນຂໍໃຫ້ພະເຢໂຫວາຊ່ວຍເຂົາເຈົ້າໃຫ້ເຂົ້າເຖິງຫົວໃຈຂອງລູກ ເພື່ອລູກຈະຖືກກະຕຸ້ນໃຫ້ຮັກພະເຢໂຫວາແລະເປັນໝູ່ກັບເພິ່ນ.—ສພສ. 22:6; ອຟຊ. 6:4. ຫ23.11 ໜ້າ 21 ຂໍ້ 5; ໜ້າ 23 ຂໍ້ 12
ວັນຈັນທີ 21 ກໍລະກົດ
ໃຫ້ກຳລັງໃຈກັນສະເໝີ.—1ທຊ. 4:18
ເປັນຫຍັງການໃຫ້ກຳລັງໃຈຈຶ່ງເປັນວິທີທີ່ສຳຄັນທີ່ສະແດງວ່າເຮົາຮັກກັນ? ຕາມປຶ້ມອ້າງອີງຫົວໜຶ່ງກ່ຽວກັບຄຳພີໄບເບິນ ຄຳເວົ້າທີ່ໂປໂລໃຊ້ສຳລັບ “ໃຫ້ກຳລັງໃຈ” ໝາຍເຖິງ “ການຢືນຢູ່ທາງຂ້າງຜູ້ໃດຜູ້ໜຶ່ງເພື່ອໃຫ້ກຳລັງໃຈລາວຕອນທີ່ລາວເຈິບັນຫາທີ່ໜັກໆ.” ເມື່ອເຮົາໃຫ້ກຳລັງໃຈພີ່ນ້ອງທີ່ຢູ່ໃນສະພາບແບບນັ້ນ ເຮົາກໍຊ່ວຍລາວໃຫ້ຮັບໃຊ້ພະເຢໂຫວາຢ່າງສັດຊື່ຕໍ່ໆໄປ. ທຸກເທື່ອທີ່ເຮົາໃຫ້ກຳລັງໃຈພີ່ນ້ອງກໍສະແດງໃຫ້ເຫັນວ່າເຮົາຮັກລາວ. (2ກຣ. 7:6, 7, 13) ຄວາມເຫັນອົກເຫັນໃຈແລະການໃຫ້ກຳລັງໃຈກ່ຽວຂ້ອງກັນແນວໃດ? ເມື່ອເຮົາເຫັນອົກເຫັນໃຈຜູ້ໃດຜູ້ໜຶ່ງທີ່ກຳລັງເຈິຄວາມຍາກລຳບາກ ເຮົາຈະໃຫ້ກຳລັງໃຈລາວແລະຈະເຮັດບາງຢ່າງເພື່ອຊ່ວຍລາວ. ດັ່ງນັ້ນ ເມື່ອເຮົາເຫັນອົກເຫັນໃຈຜູ້ໃດຜູ້ໜຶ່ງ ເຮົາກໍຈະໃຫ້ກຳລັງໃຈລາວ. ໂປໂລອະທິບາຍວ່າ ຄວາມເຫັນອົກເຫັນໃຈທີ່ພະເຢໂຫວາມີຕໍ່ຄົນເຮົາກະຕຸ້ນເພິ່ນໃຫ້ຢາກໃຫ້ກຳລັງໃຈເຂົາເຈົ້າ. ໂປໂລເວົ້າວ່າ ພະເຢໂຫວາເປັນ “ພໍ່ທີ່ມີຄວາມເມດຕາກະລຸນາແລະເປັນພະເຈົ້າທີ່ໃຫ້ກຳລັງໃຈໃນທຸກສະຖານະການ.”—2ກຣ. 1:3. ຫ23.11 ໜ້າ 9-10 ຂໍ້ 8-10
ວັນອັງຄານທີ 22 ກໍລະກົດ
ມີຄວາມສຸກໄດ້ເຖິງວ່າຈະເຈິຄວາມທຸກລຳບາກ.—ຣມ. 5:3
ລູກສິດຂອງພະເຢຊູທຸກຄົນຄາດໝາຍໄດ້ເລີຍວ່າຈະຕ້ອງເຈິກັບຄວາມທຸກລຳບາກ ເຊິ່ງໂປໂລກໍເຄີຍເຈິແບບນັ້ນຄືກັນ. ລາວບອກພີ່ນ້ອງທີ່ຢູ່ເມືອງເທຊະໂລນິກວ່າ: “ຕອນທີ່ພວກເຮົາຢູ່ກັບພວກເຈົ້າ ພວກເຮົາເຄີຍບອກໄວ້ວ່າພວກເຮົາຈະຕ້ອງເຈິຄວາມທຸກລຳບາກ ແລ້ວກໍເປັນແນວນັ້ນແທ້ໆ.” (1ທຊ. 3:4) ໂປໂລຍັງຂຽນຫາພີ່ນ້ອງໃນເມືອງໂກຣິນໂທວ່າ: “ພວກເຮົາຢາກໃຫ້ພວກເຈົ້າຮູ້ເລື່ອງຄວາມຍາກລຳບາກທີ່ພວກເຮົາເຈິ . . . ຈົນຄິດວ່າຈະຕາຍແທ້ໆ.” (2ກຣ. 1:8; 11:23-27) ຄລິດສະຕຽນໃນທຸກມື້ນີ້ກໍຄາດໝາຍໄດ້ວ່າຈະຕ້ອງເຈິກັບຄວາມທຸກລຳບາກ. (2ຕມ. 3:12) ເຈົ້າກຳລັງເຈິຄວາມທຸກລຳບາກຍ້ອນເຊື່ອໃນພະເຢຊູແລະເປັນລູກສິດຂອງເພິ່ນບໍ? ໝູ່ຫຼືຍາດຕິພີ່ນ້ອງອາດຕໍ່ຕ້ານເຈົ້າ. ເຈົ້າເຈິບັນຫາຢູ່ບ່ອນເຮັດວຽກຍ້ອນຕັ້ງໃຈທີ່ຈະສັດຊື່ໃນທຸກເລື່ອງບໍ? (ຮຣ. 13:18) ເຈົ້າເຄີຍຖືກຕໍ່ຕ້ານຈາກລັດຖະບານຍ້ອນເຈົ້າບອກຄວາມຫວັງກັບຄົນອື່ນບໍ? ບໍ່ວ່າເຈົ້າຈະເຈິກັບຄວາມທຸກລຳບາກແບບໃດ ໂປໂລບອກວ່າເຮົາຄວນຈະມີຄວາມສຸກ. ຫ23.12 ໜ້າ 10-11 ຂໍ້ 9-10
ວັນພຸດທີ 23 ກໍລະກົດ
ພວກເຈົ້າເຮັດໃຫ້ພໍ່ເຈິບັນຫາໜັກແລ້ວ.—ປຖກ. 34:30
ຢາໂຄບອົດທົນກັບບັນຫາຫຼາຍຢ່າງ. ລູກຊາຍສອງຄົນຂອງຢາໂຄບຄື: ຊີເມໂອນກັບເລວີເຮັດໃຫ້ຄອບຄົວຂາຍໜ້າແລະເຮັດໃຫ້ພະເຢໂຫວາເສຍຊື່ສຽງ. ບໍ່ພຽງແຕ່ເທົ່ານັ້ນ ຣາເຊັນເມຍທີ່ຢາໂຄບຮັກຫຼາຍກໍຕາຍຕອນທີ່ເກີດລູກຊາຍຄົນທີສອງ. ຊ້ຳບໍ່ໜຳ ຕອນທີ່ເກີດການຂາດແຄນອາຫານຢ່າງໜັກ ຢາໂຄບກໍຕ້ອງຍ້າຍໄປຢູ່ເອຢິບທັງໆທີ່ອາຍຸລາວກໍຫຼາຍແລ້ວ. (ປຖກ. 35:16-19; 37:28; 45:9-11, 28) ເຖິງວ່າຢາໂຄບຈະຕ້ອງເຈິບັນຫາຢູ່ຕະຫຼອດ ແຕ່ລາວກໍເຊື່ອໃນພະເຢໂຫວາແລະຄຳສັນຍາຂອງເພິ່ນ. ພະເຢໂຫວາກໍເຮັດໃຫ້ຢາໂຄບເຫັນວ່າເພິ່ນຮັກລາວສະເໝີ. ຕົວຢ່າງເຊັ່ນ: ພະເຢໂຫວາໄດ້ອວຍພອນຢາໂຄບໃຫ້ຮັ່ງຫຼາຍຂຶ້ນເລື້ອຍໆ. ລອງນຶກພາບເບິ່ງວ່າຢາໂຄບຈະຂອບໃຈພະເຢໂຫວາຫຼາຍຂະໜາດໃດທີ່ລາວມີໂອກາດເຈິກັບໂຢເຊັບລູກຊາຍທີ່ລາວຄິດວ່າຕາຍໄປດົນແລ້ວ. ຍ້ອນຢາໂຄບສະໜິດກັບພະເຢໂຫວາ ລາວຈຶ່ງສາມາດຮັບມືກັບບັນຫາຕ່າງໆທີ່ເຂົ້າມາໃນຊີວິດໄດ້. (ປຖກ. 30:43; 32:9, 10; 46:28-30) ດັ່ງນັ້ນ ຖ້າເຮົາສະໜິດກັບພະເຢໂຫວາສະເໝີ ເຖິງຈະຕ້ອງເຈິກັບບັນຫາໂດຍບໍ່ຄາດຄິດເຮົາກໍຈະຮັບມືໄດ້ແນ່ນອນ. ຫ23.04 ໜ້າ 15 ຂໍ້ 6-7
ວັນພະຫັດທີ 24 ກໍລະກົດ
ພະເຢໂຫວາເບິ່ງແຍງຂ້ອຍຄືກັບຜູ້ລ້ຽງແກະ. ຂ້ອຍຈະບໍ່ຂາດເຂີນຫຍັງ.—ພສ. 23:1
ເພງສັນລະເສີນບົດ 23 ສະແດງເຖິງຄວາມໝັ້ນໃຈ ຄວາມຮັກ ແລະການເບິ່ງແຍງຂອງພະເຢໂຫວາ. ດາວິດເປັນຜູ້ຂຽນເພງສັນລະເສີນບົດນີ້. ລາວເວົ້າວ່າລາວກັບພະເຢໂຫວາທີ່ເປັນຜູ້ລ້ຽງແກະສະໜິດກັນຫຼາຍແທ້ໆ. ດາວິດບອກວ່າລາວຮູ້ສຶກປອດໄພທີ່ພະເຢໂຫວາຊີ້ນຳລາວແລະລາວກໍໄວ້ໃຈພະເຢໂຫວາເຕັມຮ້ອຍ. ດາວິດຮູ້ວ່າພະເຢໂຫວາຈະສະແດງຄວາມຮັກຕໍ່ລາວທຸກມື້ຕະຫຼອດຊີວິດຂອງລາວ. ເປັນຫຍັງດາວິດຈຶ່ງໝັ້ນໃຈແບບນັ້ນ? ດາວິດເຫັນວ່າພະເຢໂຫວາເບິ່ງແຍງລາວໃຫ້ມີສິ່ງຈຳເປັນບໍ່ເຄີຍຂາດ ແລະລາວຍັງຮູ້ວ່າພະເຢໂຫວາເປັນໝູ່ລາວແລະພໍໃຈລາວ. ເລື່ອງນີ້ເຮັດໃຫ້ລາວໝັ້ນໃຈວ່າ ບໍ່ວ່າຈະເກີດຫຍັງຂຶ້ນໃນອະນາຄົດ ພະເຢໂຫວາຈະເບິ່ງແຍງລາວໃຫ້ມີສິ່ງຈຳເປັນສະເໝີ. ຍ້ອນດາວິດໝັ້ນໃຈວ່າພະເຢໂຫວາຮັກແລະຈະເບິ່ງແຍງລາວ ລາວຈຶ່ງດີໃຈ ມີຄວາມສຸກ ແລະບໍ່ກັງວົນຫຍັງ.—ພສ. 16:11. ຫ24.01 ໜ້າ 28-29 ຂໍ້ 12-13
ວັນສຸກທີ 25 ກໍລະກົດ
ຂ້ອຍຈະຢູ່ກັບພວກເຈົ້າສະເໝີຈົນຮອດສະໄໝສຸດທ້າຍຂອງໂລກນີ້.—ມທ. 28:20
ນັບຕັ້ງແຕ່ສົງຄາມໂລກຄັ້ງທີ 2 ເປັນຕົ້ນມາ ປະຊາຊົນຂອງພະເຢໂຫວາໃນຫຼາຍປະເທດມີອິດສະຫຼະໃນການປະກາດຂ່າວດີເຊິ່ງເຮັດໃຫ້ຫຼາຍຄົນໄດ້ຮູ້ຈັກພະເຢໂຫວາ. ຕອນນີ້ວຽກປະກາດກຳລັງຂະຫຍາຍໄປທົ່ວໂລກ. ໃນທຸກມື້ນີ້ ຄະນະກຳມະການປົກຄອງຍັງເຮັດຕາມການຊີ້ນຳຂອງພະເຢຊູສະເໝີ. ເຂົາເຈົ້າຢາກໃຫ້ຄຳແນະນຳພີ່ນ້ອງໃນແບບທີ່ສອດຄ່ອງກັບຄວາມຕ້ອງການຂອງພະເຢໂຫວາແລະພະເຢຊູແທ້ໆ. ເຂົາເຈົ້າໃຫ້ຄຳແນະນຳພີ່ນ້ອງໂດຍຜ່ານທາງຜູ້ເບິ່ງແຍງໝວດແລະຜູ້ເບິ່ງແຍງໃນປະຊາຄົມ. ຄຳພີໄບເບິນບອກວ່າຜູ້ເບິ່ງແຍງທີ່ເປັນຜູ້ຖືກເລືອກແລະຜູ້ເບິ່ງແຍງທັງໝົດໃນປະຊາຄົມຕ່າງໆຢູ່ “ໃນມືເບື້ອງຂວາ” ຂອງພະຄລິດ. (ພນມ. 2:1) ເຖິງຈະເປັນແນວນັ້ນ ຜູ້ເບິ່ງແຍງທຸກຄົນກໍເປັນຄົນບໍ່ສົມບູນແບບ ເຂົາເຈົ້າເຮັດຜິດພາດໄດ້. ແມ່ນແຕ່ໂມເຊ ໂຢຊວຍ ແລະພວກອັກຄະສາວົກກໍເຮັດຜິດພາດເປັນບາງເທື່ອ. (ຈຊບ. 20:12; ຢຊ. 9:14, 15; ຣມ. 3:23) ແຕ່ເຮົາເຫັນແຈ້ງວ່າພະເຢຊູກຳລັງຊີ້ນຳທາດທີ່ສັດຊື່ແລະສຸຂຸມແລະຜູ້ເບິ່ງແຍງທຸກຄົນທີ່ຖືກແຕ່ງຕັ້ງ ແລະເພິ່ນຈະເຮັດແບບນັ້ນຕໍ່ໆໄປ. ດັ່ງນັ້ນ ເຮົາຈຶ່ງໝັ້ນໃຈໃນການຊີ້ນຳຂອງພະເຢຊູທີ່ໃຫ້ຜ່ານທາງພີ່ນ້ອງເຫຼົ່ານີ້ທີ່ຖືກແຕ່ງຕັ້ງ. ຫ24.02 ໜ້າ 23-24 ຂໍ້ 13-14
ວັນເສົາທີ 26 ກໍລະກົດ
ໃຫ້ພວກເຈົ້າຮຽນແບບພະເຈົ້າຄືກັບລູກທີ່ຮັກຂອງເພິ່ນ.—ອຟຊ. 5:1
ໃນທຸກມື້ນີ້ ເຮົາກໍສາມາດເຮັດໃຫ້ພະເຢໂຫວາດີໃຈໄດ້ໂດຍບອກຄົນອື່ນວ່າເຮົາຮູ້ສຶກຂອບໃຈແລະຮັກເພິ່ນຫຼາຍສ່ຳໃດ. ຕອນທີ່ເຮົາປະກາດ ເຮົາຕ້ອງຈື່ໄວ້ສະເໝີວ່າເປົ້າໝາຍຂອງເຮົາແມ່ນເພື່ອຊ່ວຍຄົນໃຫ້ຮູ້ຈັກແລະໃກ້ຊິດພະເຢໂຫວາແລະເບິ່ງເພິ່ນຄືກັບທີ່ເຮົາເບິ່ງ. (ຢກບ. 4:8) ເຮົາຢາກຊ່ວຍຄົນອື່ນໃຫ້ຮູ້ວ່າຄຳພີໄບເບິນເວົ້າເຖິງພະເຢໂຫວາແນວໃດ ແລະຢາກຊ່ວຍເຂົາເຈົ້າໃຫ້ຮູ້ຈັກຄຸນລັກສະນະທີ່ດີຂອງເພິ່ນ ເຊັ່ນ: ຄວາມຮັກ ຄວາມຍຸຕິທຳ ສະຕິປັນຍາ ແລະລິດເດດ ລວມທັງຄຸນລັກສະນະອື່ນໆຂອງເພິ່ນ. ນອກຈາກນັ້ນ ເຮົາສາມາດສັນລະເສີນພະເຢໂຫວາແລະເຮັດໃຫ້ເພິ່ນດີໃຈໂດຍຮຽນແບບເພິ່ນ. ເມື່ອເຮັດແບບນີ້ ຄົນອື່ນອາດສັງເກດວ່າເຮົາແຕກຕ່າງຈາກຄົນທົ່ວໄປໃນໂລກຊົ່ວນີ້. (ມທ. 5:14-16) ຕອນທີ່ເຮົາຕິດຕໍ່ພົວພັນກັບເຂົາເຈົ້າໃນແຕ່ລະມື້ ເຮົາອາດມີໂອກາດທີ່ຈະອະທິບາຍໃຫ້ເຂົາເຈົ້າຮູ້ວ່າເປັນຫຍັງເຮົາຈຶ່ງບໍ່ເຮັດຄືກັບຄົນທົ່ວໄປ. ຜົນກໍຄືຈະເຮັດໃຫ້ຄົນທີ່ມີຫົວໃຈທີ່ດີໄດ້ຮູ້ຈັກພະເຢໂຫວາ. ເມື່ອເຮົາສັນລະເສີນພະເຢໂຫວາແບບນີ້ ເພິ່ນຈະດີໃຈແທ້ໆ.—1ຕມ. 2:3, 4. ຫ24.02 ໜ້າ 10 ຂໍ້ 7
ວັນອາທິດທີ 27 ກໍລະກົດ
[ໃຫ້] ຊຳນິຊຳນານ . . . [ໃນການ] ໃຫ້ກຳລັງໃຈຄົນອື່ນ . . . ແລະ [ໃນການ] ຕັກເຕືອນ.—ຕຕ. 1:9
ເພື່ອເຈົ້າຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ ເຈົ້າຄວນຝຶກທັກສະບາງຢ່າງ. ການເຮັດແບບນີ້ຈະເປັນປະໂຫຍດຫຼາຍ ເຊັ່ນ: ມັນຈະເຮັດໃຫ້ເຈົ້າຊ່ວຍວຽກໃນປະຊາຄົມໄດ້ ລ້ຽງໂຕເອງແລະຄອບຄົວໄດ້. ນອກຈາກນັ້ນຍັງຊ່ວຍເຈົ້າໃຫ້ໃກ້ຊິດກັບພະເຢໂຫວາຫຼາຍຂຶ້ນ. ຕົວຢ່າງເຊັ່ນ: ໃຫ້ຮຽນອ່ານແລະຂຽນໄດ້ດີ. ຄຳພີໄບເບິນບອກວ່າ ຄົນທີ່ອ່ານແລະຄິດຕຶກຕອງກົດໝາຍຂອງພະເຢໂຫວາທຸກມື້ຈະມີຄວາມສຸກແລະທຸກສິ່ງທີ່ລາວເຮັດຈະສຳເລັດ. (ພສ. 1:1-3) ການອ່ານຄຳພີໄບເບິນທຸກມື້ຈະຊ່ວຍລາວໃຫ້ຮູ້ວ່າພະເຢໂຫວາຄິດແນວໃດແລ້ວກໍຄິດຄືກັບເພິ່ນ ແລະລາວຈະຮູ້ວິທີເອົາຄຳແນະນຳໃນຄຳພີໄບເບິນໄປໃຊ້. (ສພສ. 1:3, 4) ພີ່ນ້ອງໃນປະຊາຄົມຕ້ອງການພີ່ນ້ອງຊາຍທີ່ມີຄວາມສາມາດໃນການສອນແລະໃຫ້ຄຳແນະນຳຈາກຄຳພີໄບເບິນໄດ້. ຖ້າເຈົ້າອ່ານແລະຂຽນໄດ້ດີ ເຈົ້າຈະກຽມຄຳບັນລະຍາຍແລະອອກຄຳຄິດເຫັນໃນແບບທີ່ເປັນປະໂຫຍດຕໍ່ພີ່ນ້ອງແລະຊ່ວຍເຂົາເຈົ້າໃຫ້ມີຄວາມເຊື່ອເຂັ້ມແຂງ. ນອກຈາກນັ້ນ ຖ້າເຈົ້າອ່ານແລະຂຽນໄດ້ດີ ມັນຈະຊ່ວຍເຈົ້າໃຫ້ຮູ້ຈັກຈົດຈຸດທີ່ສຳຄັນ ແລະສິ່ງທີ່ເຈົ້າຈົດໄວ້ຈະຊ່ວຍເຈົ້າໃຫ້ມີຄວາມເຊື່ອເຂັ້ມແຂງແລະໃຫ້ກຳລັງໃຈຄົນອື່ນ. ຫ23.12 ໜ້າ 26-27 ຂໍ້ 9-11
ວັນຈັນທີ 28 ກໍລະກົດ
ພະເຈົ້າທີ່ສະໜັບສະໜູນພວກເຈົ້າຍິ່ງໃຫຍ່ກວ່າມານຮ້າຍທີ່ສະໜັບສະໜູນໂລກນີ້ຢູ່.—1ຢຮ. 4:4
ຕອນທີ່ເຈົ້າຮູ້ສຶກຢ້ານ ໃຫ້ຄິດເຖິງສິ່ງທີ່ພະເຢໂຫວາຈະເຮັດໃນອະນາຄົດ. ໃນການປະຊຸມພາກປີ 2014 ມີການສາທິດໜຶ່ງທີ່ຜູ້ເປັນພໍ່ລົມກັບຄົນໃນຄອບຄົວວ່າໃຫ້ລອງປ່ຽນຄຳເວົ້າທີ່ຢູ່ໃນ 2 ຕີໂມທຽວ 3:1-5 ໃຫ້ເປັນສິ່ງທີ່ຈະເກີດຂຶ້ນໃນໂລກໃໝ່. ລາວເວົ້າວ່າ: “ໃນໂລກໃໝ່ຈະເປັນເວລາທີ່ມີແຕ່ຄວາມສຸກຍ້ອນທຸກຄົນໃນໂລກຈະຮັກກັນ ຮັກຄວາມຈິງ ຈຽມໂຕ ຖ່ອມໂຕ ຍ້ອງຍໍສັນລະເສີນພະເຈົ້າ ເຊື່ອຟັງພໍ່ແມ່ ສຳນຶກບຸນຄຸນ ພັກດີ ຮັກຍາດຕິພີ່ນ້ອງ ຍອມກັນແລະກັນ ຊົມເຊີຍຄົນອື່ນ ຄວບຄຸມໂຕເອງໄດ້ ອ່ອນໂຍນ ຮັກສິ່ງທີ່ດີ ສັດຊື່ ບໍ່ຫົວແຂງ ບໍ່ອວດດີ ບໍ່ເປັນຄົນຮັກຄວາມມ່ວນຊື່ນແຕ່ຮັກພະເຈົ້າ ບໍ່ເປັນຄົນເຄັ່ງສາສະໜາແຕ່ທາງນອກ. ຂໍໃຫ້ເຈົ້າໃກ້ຊິດກັບຄົນແບບນີ້.” ເຈົ້າເດ? ເຈົ້າຢາກລົມກັບຄົນໃນຄອບຄົວຫຼືໝູ່ບໍວ່າຊີວິດໃນໂລກໃໝ່ຈະເປັນແນວໃດ? ຫ24.01 ໜ້າ 6 ຂໍ້ 13-14
ວັນອັງຄານທີ 29 ກໍລະກົດ
ພໍ່ພໍໃຈລູກຫຼາຍ.—ລກ. 3:22
ເຮົາດີໃຈແທ້ໆທີ່ຮູ້ວ່າ “ພະເຢໂຫວາພໍໃຈປະຊາຊົນຂອງເພິ່ນ.” (ພສ. 149:4) ແຕ່ບາງເທື່ອບາງຄົນກໍຮູ້ສຶກບໍ່ໝັ້ນໃຈແລະອາດສົງໄສວ່າ: ‘ພະເຢໂຫວາພໍໃຈເຂົາເຈົ້າແທ້ໆບໍ?’ ຜູ້ຮັບໃຊ້ທີ່ສັດຊື່ຫຼາຍຄົນຂອງພະເຢໂຫວາໃນສະໄໝທີ່ຂຽນຄຳພີໄບເບິນກໍຮູ້ສຶກແບບນີ້. (1ຊມ. 1:6-10; ໂຢບ 29:2, 4; ພສ. 51:11) ຄຳພີໄບເບິນເຮັດໃຫ້ເຫັນແຈ້ງວ່າຄົນທີ່ບໍ່ສົມບູນແບບກໍເຮັດໃຫ້ພະເຢໂຫວາພໍໃຈໄດ້. ເປັນໄປໄດ້ແນວໃດ? ເປັນໄປໄດ້ເມື່ອເຮົາສະແດງຄວາມເຊື່ອໃນພະເຢຊູແລະຮັບບັບເຕມາ. (ຢຮ. 3:16) ດັ່ງນັ້ນ ເຮົາຕ້ອງເຮັດໃຫ້ຄົນອື່ນເຫັນວ່າເຮົາກັບໃຈແທ້ໆຈາກການເຮັດຜິດແລະເຮັດໃຫ້ຄົນອື່ນເຫັນວ່າເຮົາໄດ້ອຸທິດໂຕໃຫ້ພະເຢໂຫວາເພື່ອຈະເຮັດຕາມຄວາມຕ້ອງການຂອງເພິ່ນ. (ກຈກ. 2:38; 3:19) ພະເຢໂຫວາດີໃຈຫຼາຍທີ່ເຮົາເຮັດສິ່ງເຫຼົ່ານີ້ເພື່ອຈະສະໜິດກັບເພິ່ນ. ເມື່ອເຮົາໃຊ້ຊີວິດຕາມການອຸທິດໂຕຕໍ່ໆໄປ ພະເຢໂຫວາຈະພໍໃຈເຮົາແລະຖືວ່າເຮົາເປັນໝູ່ສະໜິດຂອງເພິ່ນ.—ພສ. 25:14. ຫ24.03 ໜ້າ 26 ຂໍ້ 1-2
ວັນພຸດທີ 30 ກໍລະກົດ
ພວກເຮົາເຊົາເວົ້າເລື່ອງທີ່ໄດ້ເຫັນແລະໄດ້ຍິນນັ້ນບໍ່ໄດ້.—ກຈກ. 4:20
ເຮົາສາມາດຮຽນແບບລູກສິດຂອງພະເຢຊູໂດຍປະກາດຕໍ່ໆໄປເຖິງວ່າເຈົ້າໜ້າທີ່ຈະສັ່ງຫ້າມ. ເຮົາສາມາດອະທິດຖານຂໍຄວາມກ້າຫານແລະສະຕິປັນຍາ ແລະເຮົາໝັ້ນໃຈວ່າພະເຢໂຫວາຈະຊ່ວຍເຮົາໃຫ້ເຮັດວຽກຮັບໃຊ້ຂອງເພິ່ນໄດ້. ອະທິດຖານຂໍພະເຢໂຫວາຊ່ວຍເຮົາໃຫ້ຮັບມືກັບບັນຫາ. ພວກເຮົາຫຼາຍຄົນອາດມີບັນຫາທາງດ້ານຮ່າງກາຍຫຼືຈິດໃຈ ຄົນທີ່ເຮົາຮັກຕາຍຈາກໄປ ຖືກຂົ່ມເຫງ ມີບັນຫາໃນຄອບຄົວ ຫຼືບັນຫາອື່ນໆໃນຊີວິດ. ຖ້າເກີດໂລກລະບາດຫຼືມີສົງຄາມ ການຮັບມືກັບບັນຫາເຫຼົ່ານີ້ກໍແຮ່ງຍາກຕື່ມອີກ. ຖ້າເຈົ້າເຈິແບບນີ້ຢູ່ ໃຫ້ເຈົ້າອະທິດຖານລະບາຍໃຫ້ພະເຢໂຫວາຟັງວ່າເຈົ້າກຳລັງເຈິກັບຫຍັງແລະຮູ້ສຶກແນວໃດຄືກັບທີ່ເຈົ້າລະບາຍໃຫ້ໝູ່ສະໜິດຟັງ ແລະໃຫ້ໝັ້ນໃຈວ່າພະເຢໂຫວາ “ຈະຊ່ວຍເຈົ້າ.” (ພສ. 37:3, 5) ການອະທິດຖານເລື້ອຍໆຈະຊ່ວຍໃຫ້ເຮົາ “ອົດທົນເມື່ອພົບຄວາມທຸກລຳບາກ.” (ຣມ. 12:12) ພະເຢໂຫວາຮູ້ວ່າຜູ້ຮັບໃຊ້ຂອງເພິ່ນກຳລັງເຈິບັນຫາຫຍັງ ແລະ “ເພິ່ນຟັງສຽງຮ້ອງຂໍຄວາມຊ່ວຍເຫຼືອຂອງເຂົາເຈົ້າ.”—ພສ. 145:18, 19. ຫ23.05 ໜ້າ 5-6 ຂໍ້ 12-15
ວັນພະຫັດທີ 31 ກໍລະກົດ
ໃຫ້ກວດເບິ່ງຢູ່ສະເໝີວ່າສິ່ງທີ່ພວກເຈົ້າເຮັດເປັນສິ່ງທີ່ຜູ້ເປັນນາຍພໍໃຈຫຼືບໍ່.—ອຟຊ. 5:10
ເມື່ອເຮົາຕ້ອງຕັດສິນໃຈເລື່ອງທີ່ສຳຄັນ ເຮົາຕ້ອງພະຍາຍາມເຂົ້າໃຈວ່າ “ພະເຢໂຫວາຕ້ອງການຫຍັງ” ແລ້ວກໍເຮັດຕາມນັ້ນ. (ອຟຊ. 5:17) ຕອນທີ່ເຮົາເຈິສະຖານະການບາງຢ່າງ ແລ້ວຊອກຫາຫຼັກການໃນຄຳພີໄບເບິນທີ່ກ່ຽວກັບເລື່ອງນັ້ນກໍສະແດງວ່າເຮົາຢາກຮູ້ວ່າພະເຢໂຫວາຄິດແນວໃດ. ເມື່ອເຮົາເຮັດຕາມຫຼັກການຂອງພະເຢໂຫວາ ເຮົາກໍຈະຕັດສິນໃຈໄດ້ຢ່າງຖືກຕ້ອງ. “ໂຕຊົ່ວຮ້າຍ” ທີ່ເປັນສັດຕູຂອງເຮົາຢາກໃຫ້ເຮົາຫຍຸ້ງຢູ່ກັບສິ່ງຕ່າງໆທີ່ເປັນຂອງໂລກນີ້ຈົນເຮົາບໍ່ມີເວລາຮັບໃຊ້ພະເຢໂຫວາ. (1ຢຮ. 5:19) ຄລິດສະຕຽນບາງຄົນອາດໃຫ້ການຫາເງິນ ການຮຽນສູງໆ ຫຼືການເຮັດວຽກສຳຄັນກວ່າການຮັບໃຊ້ພະເຢໂຫວາ. ຖ້າເປັນແບບນັ້ນກໍສະແດງວ່າລາວເລີ່ມຄິດຄືກັບຄົນທົ່ວໄປໃນໂລກ. ທີ່ຈິງ ສິ່ງເຫຼົ່ານີ້ບໍ່ມີຫຍັງຜິດ ແຕ່ມັນບໍ່ຄວນເປັນສິ່ງສຳຄັນທີ່ສຸດໃນຊີວິດຂອງເຮົາ. ຫ24.03 ໜ້າ 24 ຂໍ້ 16-17